1 Korintos 11

1 # 1 Korintos 4:16 Anu Masiix misaal akah kataakah, atin yi misaal kataa mara tika.

Amo yaybuzuziinim

2Ummanidde yi xunsussaanah, tamaa labcad anu akah sinalle tillaabisheekah qath-ishshaanamhi sabbatah sin faylishak aniyo. 3Laakin umman xiyawtohi amo Masiix kinam, numat amo lel labhatto kinam, Masiix amo lel Yalla kinam taarhagoona sinak farha. 4Amo yabbuzuzeh dhaaco abe kee nabii balih waanishe yakke labhatti ishi amo yascundhuwe. 5Amo abbuzuzekkah dhaaco abe kee nabii balih waanishe akkinnan numa, amo togoorhoye tiyä balih kinamhi sabbatah, ishi amo tascundhuwe. 6Numa ishi amo aybuzuze waytemko, dagar tuyshudhdhurheh tagraco teelle tane! Numa ishi dagar tagricem hido taggoorhoyem laakin caybe kinamhi sabbatah, ishi amo taybazazoo. 7#Erhedhdhö 1:26-27Labhatti Yallih misle kee nabne kinamhi sabbatah ishi amo yabbazazo kaalle mitane, numa laakin labhatti nabne kinni. 8#Erhedhdhö 2:18-23 Numa kinni labhattooko tunkhulluqhe tiyä kibah labhatti numaako mankhallaqhinna. 9Amayim balih, numa kinni labhattoh tunkhulluqhe tiyä kibah, labhatti numah mankhallaqhinna. 10Amaymih kinni, amaa malaykutti sabbatah, numa reezat tuumar amok hayto teelle tanem. 11Yakko kibah, Maddaradde lino aniinah laakin, numa labhatto hinnim marto mirhicta, labhatti lel numa hinnim maro mirhiica. 12Numa labhattooko akah tewceekah, kado labhatti numaako yaabuke. Ummannim lel Yallaako kinni. 13Atin sinneh ifrida: numa amo aybuzuzekkah Yallah tassilliyem arax kinni? 14Labhatti dagar yayrheerhem caybe kinam thabiica isheh sin tayduruse, 15numa dherh dagar teellemko laakin, teyah kibra makini? Amayim lel dagar teyah yomxoyem bazuzeh kinamhi sabbatah kinni. 16Akkinnanti tayimhi zacabah yankaaxado farhemko, nanu ta gina le labcad malino, Yallih kanaayis gantah male.

Maddari dirar

17Takattiinim umaanih kibah mecaanih makinamhi sabbatah, ta santo sinah axayuk, sin mifaylisha. 18Afti gabolle, kaniisak takattin gedda, sin fanadde barhsi yanem aabbe. Amayimko wulim rumma kinam aamine. 19Sinko xaqqedde yane mari yamadhdhagoona ciloh, sin fanadde barhsi yakko alle tane. 20Inkidde takattin gedda, Maddari dirar maki bettaanam. 21Bettan gedda, ummanti ishi-ishi dirar kinni beetam. Wuliti safriitak, aketti yaskire. 22Ayim kinni tayim! Adde bettaanah adde taacubin carwa malitiini? Yallih kaniisa ilacteenih, tamaa hin mara xoolayshak taniini? Ayim sinak arhxo kinni? Taymih sin faylisho? Maale, sin mifaylisha.

23Tamaa sinalle tillaabishem Maddaraako kabbaatem kinni, Maddara kin Yeesus tamaa kaa yosxoyin bar kinnas yooqhoceh, 24cawwatoyshitek sarrah, yigdileyaako: “Tati sinah yomxoye yi nabse kinni. Tayim yi xunsusuh abanta” yerhxe. 25#Muuca 24:6-8; Luukas 22:20Amayim balih lel, kobbaaya gantah yooqhoceyaako, dirarak sarrah: “Ta kobbaayatti yi biiloh yakke cusub cahde kinni. Tayim aacubinnan gedda, yi xunsusuh abanta” yerhxe. 26Ta kinnas beetinnan gedda kee ta kobbaayatto aacubinnan gedda, Maddari yamiitendah kaa raba kinni warroyishshaanam.

27Amayimhi sabbatah, akkinnanti ammissilinnixe araxah Maddari kinnas beetemko hido Maddari kobbaayatto yoocobemko, Maddari nabse kee biili zacabah cagab wanna kinni. 28Amaydo, akkinnanti ta kinnas beetekkah, ta kobbaayatto lel aacubekkah, yookomeh ishe yamarmaroo. 29Akkinnanti Maddari nabse meceetih aarhigekkah beeteh yoocobemko, betto kee macabah ishi bukalle firde baahak yane. 30Amayimhi sabbatah kinni lel sinko mango mari yurkutiinih laxuuteenim, gari lel rabeenih yaniinim. 31Laakin ninne rummah nifrideh nakkeedo, amfirride mirhaarhino. 32Laakin ta caalamlih nanqitstsicemko, Maddari ni yafride gedda, araxah gaxna.

33Amaydo, yi saculo, bettoona inkidde takattin gedda sittiya ilala. 34Sin akotta firdeh takkemko ciloh, safriiteti yinniyemko, carelle beeto. Aki ractemih yekkemko, amiite gedda asxossas sinah axawo kiyo.

Currently Selected:

1 Korintos 11: SCC

Highlight

Copy

Compare