3. Mose 4
4
I firho, hoy vell maredo, te vell i doosh krik lino
1O baro Devel rakras ap o Mose oun penas: 2Rake i Israelentsa oun pen lenge: Te kras yek čomone, hoy hounte krals lo gar, anas lo doosh ap peste, ninna te djinas yob gar, te penas o baro Devel: Ma kre kova!
3Te hi kova o pralstouno rashay, kay rikras pes gar ap o Debleskro lab, oun anas yaake doosh ap i tsele Israelitaryen, palle lell lo i terno gouroum, hoy gar nasselo hi, oun anell les o baro Debleske, te vell leskri doosh, hoy lo ap peste anas, krik lino. 4Oun yob anell ko gouroum glan o baro Debleste, pash o voudar glan o Debleskro kheer, oun čivell peskro vast ap o firheskro shero oun marell les kote glan o baro Debleste. 5Oun o pralstouno rashay lell o ratestar oun hidjrell les an o plarhteno kheer. 6Yob čivell peskro goushto an ko rat, oun vitsrell efta kope ko ratestar glan o layntikro kotar than, hoy hi glan o Debleskri kouč isema. 7Ninna makell lo ko ratestar ap i shinga, hoy ap i star ekke o bobestar hi, kay o soungepaskro koova rhačedo vell. Ko bob hi tardo an o Debleskro plarhteno kheer. O tselo vavar rat čorell lo vin tella pash koy rhačepaskri, kay i firhe rhačedo venna. Koy rhačepaskri hi tardo vin glan o voudar o Debleskro plarhteno kherestar.
8Palle činell lo o tselo thulepen dran ko firho vin: ko thulepen hoy ap oun pral i bouke hi, 9kol douy nire oun ko thulepen, hoy ap lende hi, ninna ko thoullo kotar, hoy ap i lebra hi. Pash i nire hounte činell lo les tele. 10Kava vell yaake kerdo har kova kerdo vell pash ko firheste, hoy yek glan o Debleste anell, te rhan le les khetne. Oun ko rashay rhačrell kal kotya ap o Debleskri rhačepaskri. 11Kol tsele vavar kotya ko gouroumestar, leskri hauta, leskro tselo mass, leskro shero, leskre herya, leskre bouke oun hoy koy dren hi, 12kova lauter hidjrell lo vin, krik dran koy platsa, kay i menshe hi. Oun anell kova ap i djoudji platsa, kote kay i yagakri čik vin čoredo vell. Kote rhačrell lo lauter an i yag dran kasht.
13Te kran i tsele Israelitarya čomone, hoy gar čačo his glan o Debleskre yaka, anan le doosh ap pende, ninna te djinan le gar, te penas o baro Devel, te krenn le kova gar. 14Te hayvenn le pal i tsiro, kay kova, hoy yon kran, gar čačo his glan o Debleskre yaka, palle hounte anenn le i terno gouroum o baro Debleske, te vell lengri doosh krik lino. Yon hounte anenn les glan o voudar o Debleskro plarhteno kherestar. 15Oun i phoureder lendar čivenn pengre vasta ap o firheskro shero oun marenn les kote glan o baro Debleste. 16Oun o pralstouno rashay lell o ratestar oun hidjrell les an o Debleskro plarhteno kheer. 17Yob čivell peskro goushto an ko rat, oun vitsrell efta kope ko ratestar glan o layntikro kotar than, hoy hi glan o Debleskri kouč isema, kay o baro Devel djivell. 18Ninna makell lo ko ratestar ap i shinga, hoy ap i star ekke o bobestar hi, kay o soungepaskro koova rhačedo vell. Ko bob hi tardo glan o baro Debleste an leskro plarhteno kheer. O tselo vavar rat čorell lo vin tella pash koy rhačepaskri, kay i firhe rhačedo venna. Koy rhačepaskri hi tardo vin glan o voudar o Debleskro plarhteno kherestar.
19Palle činell lo o tselo thulepen dran ko firho vin oun rhačrell les ap o Debleskri rhačepaskri. 20Oun yob krell kava firheha yaake har yob kova ko firheha kras, hoy yob peskri doshake maras. Yaake krell o rashay, te vell lauter pale mishto mank i Israelitarya oun o baro Debleste. Oun o baro Devel bistrell lengri doosh. 21Kova, hoy kava gouroumestar pral ačas, anell yob vin, krik dran koy platsa, kay i menshe hi, oun rhačrell les yaake har yob kova rhačras, hoy ko gouroumestar pral ačas, hoy yob peskri doshake maras. Yaake hounte vell i gouroumeha kerdo, hoy maredo vell, te vell i doosh i tsele Israelendar krik lino.
22Te kras i pralstouno čomone, hoy hounte krals lo gar, anas lo doosh ap peste, ninna te djinas yob gar, te penas o baro Devel: Ma kre kova! 23Te hayvell lo pal i tsiro, kay kova, hoy lo kras, gar čačo hi glan o Debleskre yaka, palle hounte anell lo leske i morsh bouzni, hoy gar nasselo hi. 24Oun čivell peskro vast ap o firheskro shero oun marell les glan o baro Debleste, kote kay i firhe maredo venn, hoy o Debleske rhačedo venn. Yaake vell i firheha kerdo, hoy maredo vell, te vell i doosh krik lino. 25Oun o rashay lell peskro goushteha ko ratestar oun makell les ap i shinga, hoy ap i star ekke pral ap koy rhačepaskri hi, kay i firhe rhačedo venna. O tselo vavar rat čorell lo vin tella pash i rhačepaskri. 26Oun o tselo thulepen rhačrell lo ap i rhačepaskri yaake, har rhačrell lo o thulepen ko firhestar, hoy yek o Debleske anell, te rhan le les khetne glan leste. Yaake krell o rashay, te vell lauter pale mishto mank o pralstuneste oun o baro Debleste. Oun o baro Devel bistrell leskri doosh.
27Te kras yek i Israelendar čomone, hoy hounte krals lo gar, anas lo doosh ap peste, ninna te djinas yob gar, te penas o baro Devel: Ma kre kova! 28Te hayvell lo pal i tsiro, kay kova hoy lo kras, gar čačo hi glan o Debleskre yaka, palle hounte anell lo leske i bouzni, hoy gar nasselo hi. Kova hounte krell lo, te vell leskri doosh krik lino. 29Oun yob hounte čivell peskro vast ap o firheskro shero oun marell les kote kay i firhe maredo venn, hoy rhačedo venn o Debleske. 30Oun o rashay lell peskro goushteha ko ratestar oun makell les ap i shinga, hoy ap i star ekke pral ap koy rhačepaskri hi, kay i firhe rhačedo venna. O tselo vavar rat čorell lo vin tella pash i rhačepaskri. 31Oun o tselo thulepen činell lo tele, yaake har činell lo o thulepen tele ko firhestar, hoy yek o Debleske anell, te rhan le les khetne glan leste. Oun ko rashay rhačrell kal thoulle kotya ap o Debleskri rhačepaskri, te vell i lačo soungepen vin, hoy baro Debleske mishto soungella. Yaake krell o rashay, te vell lauter pale mishto mank ko mensheste oun o baro Debleste. Oun o baro Devel bistrell leskri doosh.
32Te kamell yek i bakro o Debleske te anell, te vell leskri doosh krik lino, palle anell lo i bakri, hoy gar nasselo hi, 33oun čivell peskro vast ap o firheskro shero, oun marell les kote, kay i firhe maredo venn, hoy o Debleske rhačedo venn. Kova hounte krell lo, te vell leskri doosh krik lino. 34Oun o rashay lell peskro goushteha ko ratestar oun makell les ap i shinga, hoy ap i star ekke pral ap koy rhačepaskri hi, kay i firhe rhačedo venna. O tselo vavar rat čorell lo vin tella pash i rhačepaskri. 35Oun o tselo thulepen činell lo tele yaake har činell lo o thulepen tele ko bakrestar, hoy yek o Debleske anell, te rhan le les khetne glan leste. Oun ko rashay rhačrell kal thoulle kotya ap o Debleskri rhačepaskri khetne ko vavar masseha, hoy o baro Debleske rhačedo vell. Yaake krell o rashay, te vell lauter pale mishto mank o baro Debleste oun ko mensheste, kay doosh ap peste anas. Oun o baro Devel bistrell leskri doosh.
Currently Selected:
3. Mose 4: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
