3. Mose 5
5
Pash savi doosh hounte vell i firho anlo o Debleske, te vell i doosh krik lino
1Te vell yek glan i čačepangre anlo, te penell lo, hoy lo dikas oun shounas, oun yob rikrell kova peske, oun penell či, ninna te dikas oder shounas lo, hoy koy his. Palle anas lo i doosh ap peste oun hounte hidjrell lat.
2Te taprell yek čomone an, hoy pale-čiddo hi, nay vell i moulo divyo firho, nay vell i vavar moulo firho, ninna i tikno moulo firho, hoy djal pral i phoub, palle hi lo pale-čiddo, oun anas doosh ap peste, ninna te hayvas lo gar, hoy lo kras.
3Ninna te taprell lo ap i mensheste, kay hi pale-čiddo#5:3 oder čomone i menshestar, hoy hi pale-čiddo, hoy kova ninna hi, palle anas lo doosh ap peste, ninna te hayvas lo gar, hoy lo kras.
4Te dell yek pes sovel, yaake te rakrell leskro mouy sik, oun yob hayvell pal i tsiro, hoy lo kras, – hi yek, te hi kova, hoy lo penas, lačo oder čilačo leske – palle anas lo i doosh ap peste.
5Te anas yob yaake te yaake doosh ap peste, palle hounte penell lo, havo koova yob kras. 6Koy doshake hounte anell lo o baro Debleske i bakri oder i bouzni, oun marell lat, te vell leskri doosh krik lino. Oun o rashay lell ko firho oun rhačrell leskro thulepen, oun yaake krell lo, te vell lauter pale mishto mank ko mensheste oun o baro Debleste.
7Te hi ko morsh čorvelo oun nay anell kek bakri vitar kek bouzni, nay anell lo douy taube. Kolla nay hi douy divye taube oder douy vavar taube, yek, te vell i doosh krik lino, oun yek, hoy o baro Debleske tseles rhačedo vell#5:7 te dikell o Devel lačes ap ko mensheste. 8Yob anell len pash o rashayeste. Oun kova anell glanstounes koy tauba hoy i doshake anlo vas, oun phagell lake i meen, o shero tele činell lo lake gar. 9Yob vitsrell ko ratestar ap i rig foun i rhačepaskri, oun moukell o tselo vavar rat vin ratell tella pash i rhačepaskri. Yaake hounte vell i firheha kerdo, hoy maredo vell, te vell i doosh krik lino.
10Oun koy vavar tauba rhačrell lo yaake, har o baro Devel penas, te vell kerdo i firheha, hoy tseles rhačedo vell. Yaake krell o rashay, te vell lauter pale mishto mank ko mensheste oun o baro Debleste. Oun o baro Devel bistrell koy doosh, hoy ko mensho ap peste anas.
11Te hi kova, kay doosh ap peste anas, yaake čorvelo, te nay anell lo gar douy taube, palle anell lo yek kilogrammi lačo yarro o baro Debleske, te vell leskri doosh krik lino. Yob hounte čivell kek djet pre, vitar kek soungepaskro koova. Kava hi i rhapen, hoy o Debleske anlo vell, te vell i doosh krik lino. 12Yob anell ko yarro pash o rashayeste, oun o rashay lell i vast pherdo, oun moukell kava ap i rhačepaskri te rhačrell o baro Debleske. Kava sikrell, kay ko tselo rhapen, hoy anlo vas, o baro Debleske hi. Kava hi i rhapen, hoy o baro Debleske anlo vell, te vell i doosh krik lino.
13Yaake krell o rashay, te vell i doosh kolestar krik lino, hoy doosh ap peste anas an hako koova, kolestar kate penlo vell. Oun lauter vell pale mishto mank ko mensheste oun o baro Debleste. Oun o baro Devel bistrell leskri doosh. O yarro, hoy pral ačell, hi o rashayeske, yaake har pash o vavar rhapen dran djob, hoy o Debleske dino vas.
I firho, hoy maredo vell, te vell i doosh pale mishto
14Oun o baro Devel penas ap o Mose: 15Te dals yek gar o baro Debleste, hoy hounte dals lo leste, rhorhras lo o baro Debles, ninna te djinas lo kova gar. Yob hounte anell o Debleske i bakro#5:15 i morsh bakro, hoy sasto hi, te vell leskri doosh pale mishto. Kava bakro hounte vell yaake boud roupene beme moldo, har tou peneh. Yek roupeni bema hi yaake pharo har i roupeni bema an o Debleskro kheer hi. 16Oun ninna hounte anell lo ko koova, hoy anas lo gar o baro Debleske, oun o pančto kolestar gomme pashel. Oun kova lauter dell lo o rashayeste an o vast. Oun o rashay marell ko bakro oun rhačrell leskro thulepen, te vell lauter pale mishto mank o Debleste oun o mensheste. Oun o baro Devel bistrell koy doosh.
17Te krell yek čomone, kolestar o baro Devel penas, te krell lo les gar, anas lo i doosh ap peste, ninna te djinas lo gar, te penas o baro Devel: “Ma kre kova!” 18Yob hounte anell o rashayeske i bakro#5:18 i morsh bakro, hoy sasto hi, te vell leskri doosh pale mishto. Kava bakro hounte vell yaake boud moldo, har tou peneh. Koleha krell o rashay, te vell lauter pale mishto mank o Debleste oun ko mensheste, kay gar djinas, kay kova, hoy lo kras, i doosh his. Oun o baro Devel bistrell leskri doosh. 19Yaake hounte krell kova, kay kras i čilačepen ap o baro Debleste, te vell leskri doosh pale mishto.
20Oun o baro Devel penas ap o Mose: 21Hakeno, kay i vavares rhorhell, krell i čilačepen ap mande, o baro Debleste. Koon penell kolestar, hoy i vavar leske patsas, oder das, te dell lo yak pre kova hi mange, kova anell doosh ap peste. Kova hi ninna yaake, te čoras yek i vavares, oder las čomone lestar rhorhepah, 22oder hatsas čomone, hoy nashedo his, oun penell, te hatsas lo či. Oun dell pes i rhorheni sovel an kava koova oder an vavar koova, hoy i mensho lauter nay krell, koleha yob doosh ap peste lell, 23palle las lo doosh ap peste. Oun yob hounte dell ko koova pale, hoy lo o vavarestar rhorhepah las oun rikras, 24oder pral kova yob pes rhorhenes sovel das. Kava tselo koova hounte dell lo pale, oder yaake boud har kova moldo his, oun i pančto kolestar gomme pashel. Oun koneske kova his, koleste vell kova pale dino ap ko dives, kay yob o baro Debleske i firhes anell, te vell leskri doosh pale mishto. 25Ko firho hounte vell i bakro, hoy sasto hi, oun kolestar tou penal, har boud kova hounte moldo vell. Oun yob anell les pash o rashayeste, te vell leskri doosh pale mishto. 26Oun o rashay marell ko bakro oun rhačrell leskro thulepen, te vell lauter pale mishto glan o baro Debleste oun ko mensheste. Oun o baro Devel bistrell halauter, hoy ko mensho kras, oun koleha yob doosh ap peste anas.
Currently Selected:
3. Mose 5: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
