2. Mose 2
2
O Mose vell boldo
1Koy his i morsh kol menshendar, kay venna pal o Levi. Kova las peske i romni, kay his ninna i Leviteskre menshendar. 2Yoy vas an vavar koova oun las i čavo. Har dikas yoy, kay hi o čavo sasto oun shoukar, khatras yoy les triin čon. 3Har khatras li les nay bouder gar, kras yoy i tikni korba, makas i korba mit čomone dren, kay djal kek pani dren, oun čivas lakro ternepen koy dren, las koy korba, čivas les mank ko baro panyeskro khass pash o pani Nil. 4O tikno čaveskri pheen khatras pes gar dour, te dikell yoy, hoy leha djala.
5Koy vas o baro rayeskri čay oun kamas pes an ko pani Nil te thovell. Oun kol djouvya, kay lake boudran, nashan pash o pani. Ap yek kopo dikas yoy koy korba mank ko baro panyeskro khass, oun bičras lakri boudepaskretsa koy, te anell li koy korba. 6Har yoy koy korba pre kras, dikas yoy i tikno čaves, hoy rovas. Kova khaytas lat oun yoy penas: “Kova hi i hebretikro čavo.”
7O tikno čaveskri pheen poučas o rayeskri čatar: “Dap me i hebretikri djouvel gole, hoy dell kol ternepen o beč te piyell?”
8“Ava, kre kova!” penas yoy. Koy las koy čay o ternepaskri dat.
9Oun o rayeskri čay penas ap late: “Le ko ternepen oun de leste te piyell! Me playsrau tout mishto.”
Yaake las i day peskro ternepen pale oun das les te piyell. 10Har his o čavo bares doha, anas yoy les pale o rayeskri čake. Koya las ko čaves har te vals lo lakro čavo. Yoy penas: “Me tserdom les dran o pani vin.” Doleske das yoy les o lab Mose#2:10 O lab Mose hi an hebretikes: dran o pani tserdedo .
O Mose nashell peske
11Har his o Mose baro, vas i dives, kay djas lo pash peskre menshende. Koy dikas yob har yon phares hounte boudrenn, oun har das yek Egiptari i Hebreares. 12Koy dikas o Mose pes trouyel, te nay dikell les kek. Palle das yob o Egiptari moulo, oun čivas les tel i phoub. 13O vavar dives djas yob pale vin. Yob dikas har čingran pen douy Hebretikre morsha. Oun yob penas ap koleste, hoy gar an o čačepen his: “Hoske deh tou i romes, kay hi tire menshendar?”
14Kava penas: “Koon penas, te vess tou ray pral mende? Kameh tou man ninna moules te dell har ko Egiptares?”
Kote las o Mose traash oun penas peske: “Har vas kova vin?”
15Har o Farao kova shounas, kamas yob o Moses te marell. O Mose nashas an ko them Midian. Kote beshas yob pes pash i brounna.
16O rashay an ko them Midian his efta ča. Kolla van pash i brounna, te denn le pengro dadeskre bakre oun bouzya pani te piyell. 17Palle van bakrengre oun tradan len ap i rig. O Mose stas pre oun vas ap lengri rig, oun das lengre bakre oun bouzya pani te piyell.
18Har van i ča khere pash pengro dadeste, o Regouel, poučas lo len: “Hoske van t'mer yaake sik pale?”
19Koy penan yon: “Yek Egiptari vas ap mari rig, oun das mare bakre oun bouzya te piyell.”
20“Kay hi lo? Hoske moukan les vin?” poučas o Regouel peskre ča. “Anenn les, te rhal lo mentsa!”
21O Regouel poučas o Mosestar, te ačell yob pash leste, oun o Mose penas: “Ava! Mishto!” O rashay das peskri čay, i Sefora, leste, te romedinerell yob lat. 22Har yoy i morsh čavo ap i phoub anas, penas o Mose: “Me nashom an i them, hoy hi gar miro them. Doleske dau les ko lab Gershon#2:22 Gershon kharella: vi-themari .”
23Pal i rah tsiro meras o baro ray pral o them Egiptia. Fothe phares hounte boudran i Israelitarya tel dava oun dan gole, te shounas len o Devel. 24Oun yob shounas lengri gole, oun bistras gar ko lab, hoy das yob o Abraham, o Isaak, oun o Yakob, te vell lo lengro Devel oun yon peskre menshe. 25Oun o Devel dikas lačes ap i Israelitarya oun vas ap lengri rig.
Currently Selected:
2. Mose 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
