2. Mose 1
1
I Egiptarya djan zoreles ap i Israelitarya
1Kolla hi kol laba kol morsh čavendar, kay van o Yakobeha an o them Egiptia. Hakeno vas peskri familyah: 2-4o Ruben, o Simeon, o Levi, o Youda, o Issakar, o Zabulon, o Benyamin, o Dan, o Naftali, o Gad, o Asser 5Khetne pengre čaventsa oun čavengre čaventsa his le 70 (efta-deesh). O Yosef his glan lende an o them Egiptia.
6Pale meras o Yosef oun peskre phrala oun leskre tsele menshe, kay an ko tsiro djivan. 7Lengre čave lan yaake boud čave, kay vas o them pherdo lendar.
8Pal boud bersha vas i nevo baro ray an o them Egiptia. Kava djinas o Yosefestar či, 9oun rakras peskre menshentsa oun penas: “Kol menshe, i Israelitarya, hi boudeder oun zorleder har mer. 10Mer hounte hatsas i drom, te venn yon gar gomme boudeder. Te phagals i baro kourepen vin, nay dans pen yon ap i vavar rig, oun mer hounte kourams men lentsa, oun yon djans dran ko them vin.”
11I Egiptarya čivan pralstoune pral i Israelitarya. Kolla dan garda te boudran i Israelitarya phares, oun yaake rikran le len tele. Oun yon kran i forya Pitom oun Ramses, te vell kote o rhapen čiddo o baro rayeske, o Farao. 12Ninna te djan le zoreles ap lende, van yon boudeder oun zorleder. Oun i Egiptarya daran lendar, 13oun kran, te boudrenn i Israelitarya gomme phareder. 14Len his kek dji lenge oun kran lengro djipen phares. Oun i Israelitarya hounte rhačan barra dran čik. Ninna hounte boudran le phares ap i harhetikri phoub.
15O baro ray pral o them Egiptia das kol douy rhačede rhalya, i Shifra oun i Poua, gole. Kolla his hebretikre djouvya. Oun yob penas ap lende: 16“Te lenn kol hebretikre djouvya čaven, pale krenn i morsh čaven moules, kol čen moukenn te djivell!”
17Kol douy rhačede rhalya daran o Deblestar oun shounan gar ap o baro rayeste, hoy yob penas. Yon moukan ninna kol morsh čaven te djivell.
18Palle moukas o baro ray kol rhačede rhalya te vell oun penas: “Hoske shounan t'mer gar ap mande oun moukan kol morsh čaven te djivell?”
19Kol rhačede rhalya penan ap o Farao: “Kol hebretikre djouvya hi gar yaake har kol egiptikre djouvya, yon hi zorleder djouvya. Glan kova, kay mer vah, hi i čave boldo.”
20-21I rhačede rhalya daran o Deblestar. Doleske moukas o Devel lenge mishto te djal oun das len bari barht.
I Israelitarya van boud oun boudeder oun zorelo oun zorleder. 22Kanna penas o Farao ap i Egiptarya an peskro tselo them: “Kol tsele morsh čave, hoy neves boldo van, vitsrenn an o pani Nil! Oun i čen moukenn te djivell!”
Currently Selected:
2. Mose 1: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
