Romanos 10

1Pplalalen ando Jesukristo, so mangau sa me liea, ta moliuman e Devleke si te sai aven braduime e israelitura. 2Me chachimaia llanau kai von mangen te blagosin e Devle ta ni llanen te sai cherel le. 3Ni acharen kai samo o Del llinel chache e manusen, a von mangen te chacharen isto von pe; ta gia ni ttoven sama sar mangel o Del te llinel chache e manusen. 4Soke ando Kristo cherdol sa o zakono te sai aven llinde chache sa gola kai pachan ande lete.#Rm 7.4-6; Gl 3.24.

5Kana del orba katar e llene kai kanden o zakono te sai aven chacharde, o Moises pisisarda gala alava: “O lleno kai kandela o zakono ka avel braduime cheres o zakono”#Lv 18.5. 6A o chachipe kai avel katar o pachape, ppenel gia: “Na mislisao: ‘¿Ko ka llal upre ando miloso?’ —Gava si, te cherel e Kristo te fuliel—; 7O ‘¿Ko ka fuliel chak tele?’ ” 8¿A so si so ppenel? “E alava kai si pasa tu kai si ande cho mui ta ande cho lio.” Gava si o alau pachamako kai ppena:#Dt 30.12-14. 9Te ppenea che muiea kai o Jesus si o Gazda ta te pachaia sa che liea kai o Del vazdia le katar o meripe, ka ave braduime. 10Soke e liea pachalpe te sai avel o manus llindo chacho, ta e muiea ppenel o manus kai pinllarel e Jesukristo te sai avel o manus braduime.

11O Pisipe ppenel gia: “Ko pachala ande lete ni ka chel ando lallao.”#Is 28.16. 12Ni chitilpe te avena judiura o te na avena, soke saurre si len isto gua Del, ta o Del si lacho sa golenchar kai mangen letar. 13Ta i o Pisipe ppenel gia: “Sa gola kai ikkarena e Devle, ka aven braduime.”#Jl 2.32. 14Akana, ¿Sar ka ikkaren le kana ni pachan ande le? ¿Ta sar ka pachan ande lete, kana ni llanen niso letar? ¿Ta sar ka llanen kana niko ni del lenge orba katar o Gazda o Jesukristo? 15¿Ta sar ka den orba katar o Jesukristo kana o Del ni bichalel len? Sar ppenel o Pisipe: “¡Savo sukaripe si kana dikka kai aven gola kai anen e lachi viasta!”#Is 52.7; Nah 1.15.

16A ni lie saurre gaia lachi viasta. Gia sar ppenda o porauko Isaias: “Gazda, ¿Ko pachaia e orbe kai andam?”#Is 53.1. 17Goleke o pachape ando Del avel kana asune e orba katar o Kristo.

18Me puchau iek ezgoda: ¿Sai avelpe kai ni asunde e orba? ¡O chachipe von asunde la! Soke o Pisipe ppenel:

“Ande sa o sueto asundili lengi orba

pe suako rig katar e ppuv asundile leke alava.”#Sal 19.4.

19Goleke pale puchau ¿sai avelpe kai o Israel ni llangla gava? Mai anglal o Moises ppenel gia:

“Me ka cherau te avel tumenge joli pe iek foro kai inai foro;

ka cherau te joliaon pe iek foro

kai ni kamel te sikol.”#Dt 32.21.

20Ta kana del orba katar e israelitura, o Isaias ppenel gia:

“Gola kai rodena man, malade man;

ta sikadilem golenge kai ni puchena mandar.”#Is 65.1; Rm 9.30.

21Ta kana del orba katar e israelitura, o Isaias ppenel gia: “Sorro llive inzardem me va iekke foroke kai si zurale soreko ta kai ni kandel.”#Is 65.2.

Currently Selected:

Romanos 10: ROM07

Highlight

Copy