Phŭn Blŭng 48

Yakô̆p br̂ơi nă Yôsep klơi nŭk-nua

1Dơdơi mơ̆ng buă nŭn, r̂ăng r̂ă br̂ơi Yôsep: «Nêne ma ih wă.» Nŭn Yôsep jak ba nă ñu dua r̂ăng nao hr̂ŏm ñu, Manasê dua ñu Êbraĕm. 2Jr̂ŏng nŭn r̂ăng r̂ă br̂ơi Yakô̆p: «Ep wŏ, Yôsep nă ih tơl r̂ai yơh.» Nŭn Yakô̆p#48:2 Yakô̆p Hêbrơ laĭ «Israel.» khŏm amr̂al gŭ đĭ dŏ ben mơ̆ng gr̂e. 3Nŭn Yakô̆p pơhiăp hr̂ŏm Yôsep: «Ơi Adai Yang Kơtang Hloh, ñu pơƀôh br̂ơi kâo ƀôh ñu mơ̆ng plơi Luih, tăm lŏn-ia Kanan, jr̂ŏng nŭn ñu pha br̂ơi kâo klơi nŭk-nua, 4Ơi Adai pơhiăp hr̂ŏm kâo, ñu laĭ ñu ti ngă br̂ơi kâo hmâo nă čo lal đĭ lô, nŭn kâo ti jr̂ŏng sô̆n-sat pr̂ŏng hmâo lô phung pơkŏn-pơkŏn. Lŏn-ia ne ñu ti br̂ơi djuoi kâo dơdơi kơñ, čiăng gơñu hmâo lŏn-ia ne nao-nao hayoh.#An Phŭn 28:13-15. 5Nêne nă đahkơi ih dua r̂ăng a pơpôn mơ̆ng čal Êjĭp, hlâo kâo ka r̂ai pơ ih mơ̆ng čal Êjĭp ne,#An Phŭn 41:50-52. kâo yap gơñu hla ti nă kâo pô, Êbraĕm dăp Manasê kâo yap gơñu hla ti nă kâo Ruƀên dua ñu Simien mơ̆n. 6Plai nă-bă ih pơpôn r̂ai dơdơi gơñu, nă-bă nŭn a ti yap nă ih pô. Nă a pơpôn r̂ai dơdơi nŭn, a ti yap phung gơñu tui ƀŏ môt yŏng gơñu Êbraĕm dăp Manasê, nŭn gơñu ti hmâo dr̂ăm pơđŏk yua mơ̆ng môt yŏng gơñu mơ̆n. 7Plai kâo dŏng, pah kâo wŏt glaĭ mơ̆ng ƀon Pađăn-ơram,#48:7 Ƀon Pađăn-ơram Hêbrơ laĭ «Pađăn.» mĭ ih Račel djai lôi kâo r̂ok glan, tăm lŏn-ia Kanan pah ta dŏ taih mơ̆ng plơi Êbrata, jr̂ŏng nŭn kâo dŏl lôi ñu r̂ok glan a nao pơ plơi Êbrata» (plơi Êbrata hmâo ƀŏ dua, a iâo ha tô̆ dŏng plơi Ƀêthlêhĕm).#An Phŭn 35:16-20.

8Jr̂ŏng nŭn Israel ƀôh nă Yôsep, nŭn ñu kơña: «Lơi gơñu ne?» 9Yôsep r̂ă br̂ơi ma ñu: «Ne nă kâo, nă Ơi Adai pha br̂ơi kâo mơ̆ng čal ne.» Nŭn Israel laĭ: «Dueh mơ̆ng ih ba r̂ai gơñu pơ kâo wŏ, kâo čiăng br̂ơi gơñu klơi nŭk-nua.» 10Plai săl ta Israel kơnăm, yua ñu tha jat boih, ñu bĭ gan thâo ƀôh ôh. Nŭn yơh Yôsep ba nao nă ñu jĕ ma ñu, jr̂ŏng nŭn ma ñu čô̆m kuôp gơñu. 11Israel pơhiăp hr̂ŏm Yôsep: «Ahlâo kâo bĭ čăng-măng ti ƀôh ƀŏ ih ôh, plai nêne dŏng, Ơi Adai br̂ơi kâo ƀôh djuoi ih he mơ̆n.» 12Jr̂ŏng nŭn Yôsep mă lôi nă ñu mơ̆ng ŭt ma ñu, nŭn ñu bon kô̆p kŏ tơl pơ kơnah. 13Jr̂ŏng nŭn Yôsep tô̆ nă ñu dua r̂ăng, ngan ñu gah nuă djă Êbraĕm, djơ̆ ngan gah djao Israel, ngan ñu gah djao dŏng djă Manasê, djơ̆ ngan gah nuă Israel, jr̂ŏng nŭn Yôsep ba nao nă ñu jĕ Israel. 14Jr̂ŏng nŭn Israel čr̂oh ngan gah nuă ñu mơ̆ng kŏ Êbraĕm, wŏt Êbraĕm nŭn adơi, jr̂ŏng nŭn ñu čr̂oh ngan gah djao ñu mơ̆ng kŏ Manasê, wŏt Manasê nŭn nă phŭn. Nĭng nŭn yơh ñu mơ̆ng pơčuăl ngan ñu. 15Nŭn ñu br̂ơi Yôsep klơi nŭk-nua, ñu laĭ:

«Ơ Ơi Adai,

Ih yơh Yang Abrahăm dăp Isă,

Gơñu bat hr̂ŏm ih,

Ơ Ơi Adai,

Ih yơh r̂ăk-r̂em kâo hla ti pô čiă triw,

Tô̆ mơ̆ng a pơpôn kâo khă tơl r̂ĭm r̂ơi ne,

16Ơ ling-jang,#48:16 Yakô̆p iâo Ơi Adai ling-jang yua Ơi Adai juăt pơƀôh pô ñu hla ti ling-jang lơ pơđơi ling-jang ba pơhiăp tang br̂ơi ñu. An Phŭn 16:7-14; 21:17-19; 22:11-18; 31:11-13.

Pô song tô̆ kâo klaih mơ̆ng tơgr̂ư̆ klơi set,

Dueh mơ̆ng ih pha br̂ơi nă dăm dua r̂ăng ne klơi nŭk-nua,

Br̂ơi r̂ăng hơdŏl glaĭ ƀŏ kâo r̂ai mơ̆ng gơñu,

Dăp ƀŏ môt ơi gơñu Abrahăm dăp Isă,

Br̂ơi dua gơñu ne hmâo nă čo lal đĭ lô-lĭn mơ̆ng lŏn kơnah.»

17Tơl Yôsep ƀôh ma ñu čr̂oh ngan gah nuă mơ̆ng kŏ Êbraĕm, nŭn bŭt ñu bĭ ak ôh. Ñu mă ngan ma ñu mơ̆ng kŏ Êbraĕm, čiăng čr̂oh nao mơ̆ng kŏ Manasê dŏng. 18Nŭn Yôsep r̂ă br̂ơi ma ñu: «Bĭ ôh, ma. Ne nă phŭn la, br̂ơi ih čr̂oh ngan gah nuă ih mơ̆ng kŏ ñu wŏ.» 19Plai ma ñu bơjah glaĭ: «Ơ nă, kâo thâo yơh, kâo thâo yơh. Manasê ne ti jr̂ŏng sô̆n-sat ha tô̆ mơ̆n, ñu ti ngă pr̂ŏng he mơ̆n. Plai adơi ñu dŏng, ñu ti ngă pr̂ŏng hloh mơ̆ng yŏng ñu, dăp djuoi ñu ti jr̂ŏng lô sô̆n-sat pơkŏn-pơkŏn mơ̆n.» 20R̂ơi nŭn yơh, Israel pha br̂ơi dua gơñu nŭn klơi nŭk-nua, ñu laĭ: «Pah môt Israel br̂ơi nao r̂ai klơi nŭk-nua gŏp gơñu, gơñu ti yăl glaĭ ƀŏ gô-ih,#48:20 Gô-ih Hêbrơ laĭ «Ih.» gơñu ti laĭ, “Dueh mơ̆ng Ơi Adai ngă br̂ơi ih hmâo klơi nŭk-nua hla ti Êbraĕm dua ñu Manasê.”» Hla nŭn yơh Israel yăl ƀŏ Êbraĕm hlâo Manasê.#An Hêb 11:21.

21Jr̂ŏng nŭn Israel pơhiăp hr̂ŏm Yôsep: «Nêne kâo iă ti djai boih. Ơi Adai ti dŏ hr̂ŏm gô-ih, wŏt ñu ti ba glaĭ môt gô-ih pơ lŏn-ia môt ơi gô-ih dŏng. 22Mơ̆ng môt yŏng dơi ih, ih yơh kâo ček thim br̂ơi kŏ čĭ Sigem, kŏ čĭ nŭn kâo tô̆ mơ̆ng ngan môt sô̆n-sat Amôri yua mơ̆ng đao dăp hr̂ă.»

Currently Selected:

Phŭn Blŭng 48: JKB

Highlight

Copy

Compare