Biă 19

Nă čo Israel tơl nao pơ kŏ čĭ Sinai

1Dơdơi mơ̆ng nă čo Israel biă mơ̆ng čal Êjĭp, tơl bih lôi dua blan, mŭt r̂ơi ti sa blan klâo, nŭn gơñu tr̂uh nao pơ čol dơdang a iâo čol Sinai. 2Gơñu biă mơ̆ng Rêphiđim,#An Biă 17:1. tơl nao pơ čol Sinai, jr̂ŏng nŭn gơñu bơdŏng sang seng tŏng pơ čol dơdang nŭn. Môt Israel bơdŏng sang seng tŏng gah năp kŏ čĭ Sinai,#An Biă 3:1, 11-12; 18:5. 3plai Môsê dŏng, ñu đĭ nao pơ Ơi Adai mơ̆ng kŏ čĭ. Jr̂ŏng nŭn Yêhôwa pơhiăp hr̂ŏm Môsê mơ̆ng kŏ čĭ: «Br̂ơi ih pơhiăp hr̂ŏm khŭl-khap sang-nŏ Yakô̆p, nă čo Israel, čiăng ih r̂ă br̂ơi gơñu hla ne:

4“Gô-ih ƀôh pô gô-ih boih, bih buă kâo ngă mơ̆ng môt sô̆n-sat Êjĭp, dăp buă kâo ba r̂ai gô-ih pơ kâo, hla ti kâo čơ gô-ih mơ̆ng čăng čĭm klang. 5Nêne, jơ̆ laĭ gô-ih hmĭ tui klơi pơhiăp kâo, dăp djă čr̂oh klơi uăn bơgop kâo, nŭn bih-tih sô̆n-sat pơkŏn-pơkŏn, gô-ih yơh kâo ti čr̂oh hla ti dr̂ăm a gĭt jat,#An Juăt 7:6; 26:18; Tit 2:14. yua bih-tih lŏn kơnah dr̂ăm kâo soh-sel,#An Biă 9:29. 6bih gô-ih ti jr̂ŏng môt pơtao dăp môt ngă yang,#19:6 Bih gô-ih ti jr̂ŏng môt pơtao dăp môt ngă yang lơ «Gô-ih ti jr̂ŏng čal môt pơtao dăp môt ngă yang.» wŏt gô-ih ti jr̂ŏng sô̆n-sat lơgoh hiam ti năp kâo.”#An 1Pê 2:5, 9.

Klơi pơhiăp ne yơh, ih ti r̂ă br̂ơi nă čo Israel.»

7Tơl Môsê wŏt glaĭ, nŭn ñu iâo r̂ai môt kŏng-tha nă plơi lan, jr̂ŏng nŭn ñu r̂ă br̂ơi gơñu bih klơi Yêhôwa pơtă br̂ơi ñu. 8Nŭn bih nă plơi lan til đĭ hr̂ŭp ha wŏt glih, gơñu laĭ: «Mơi ti ngă tui tơgr̂ư̆ klơi Yêhôwa pơhiăp nŭn.» Jr̂ŏng nŭn Môsê tô̆ klơi gơñu pơhiăp nŭn, nao r̂ă br̂ơi Yêhôwa dŏng. 9Yêhôwa pơhiăp hr̂ŏm Môsê: «Nêne, kâo ti nao pơ ih tăm kơthŭl gơnăm kơnăm-hyeng, čiăng nă plơi lan hmĭ pah kâo hiăp hr̂ŏm ih, jr̂ŏng nŭn gơñu ti ngư̆ ih nao-nao.»

Tơl Môsê r̂ă br̂ơi Yêhôwa klơi nă plơi lan pơhiăp nŭn jr̂ŏng boih, 10nŭn Yêhôwa pơhiăp hr̂ŏm Môsê: «Br̂ơi ih nao pơ nă plơi lan dŏng, čiăng ngă br̂ơi gơñu lơgoh hiam, r̂ơi ne r̂ơi gla, br̂ơi gơñu boh lôi khô ao gơñu he mơ̆n. 11Br̂ơi gơñu met-set pô gơñu hlâo r̂ơi ti klâo, yua r̂ơi ti klâo nŭn, kâo Yêhôwa ti tr̂ŭn dŏ ngŏ kŏ čĭ Sinai, br̂ơi bih-tih nă plơi lan ƀôh. 12Br̂ơi ih dă goi jŭm dăl tơkai čĭ, čiăng nă plơi lan ƀôh, jr̂ŏng nŭn r̂ă thâo br̂ơi gơñu:

“Br̂ơi lơwăng hŏ, anăm đĭ nao pơ kŏ čĭ ôh, wŏt anăm juă djơ̆ tơkai čĭ le, yua lơi juă djơ̆ čĭ, pô nŭn r̂ăng ti pơdjai lôi ñu he yơh, 13bĭ br̂ơi lơi nao mă pô nŭn mơ̆ng ngan ôh, plai br̂ơi r̂ăng jiah pô nŭn mơ̆ng bohtâo, lơ pơnah pô nŭn mơ̆ng hr̂ă, wŏt čĭm wŏt mơnuih, bĭ br̂ơi dŏ dĭp ôh.”

Tơl hmĭ ñi a hyŭp đing kê, nŭn gơñu ti thâo đĭ nao pơ kŏ čĭ.» 14Jr̂ŏng nŭn, Môsê tr̂ŭn mơ̆ng kŏ čĭ nao pơ nă plơi lan, nŭn ñu ngă br̂ơi môt gơñu lơgoh hiam, dăp br̂ơi gơñu boh lôi khô ao gơñu. 15Môsê pơtă nă plơi lan: «Br̂ơi gô-ih met-set pô gô-ih hlâo r̂ơi ti klâo, anăm jĕ jiăm hr̂ŏm đahmơi ôh.»

16Mơ̆ng guah r̂ơi ti klâo, hmĭ ñi gr̂ŏm kơtal, dăp čă-kla, wŏt hmâo kơthŭl gơnăm kơnăm-hyeng ngŏ kŏ čĭ, dăp hmĭ ñi a hyŭp đing kê jua tăl đut, jr̂ŏng nŭn nă plơi lan dŏ mơ̆ng ƀon gơñu bơdŏng sang seng tŏng, bih gơñu tơtĭ-djĭl. 17Nŭn Môsê ba biă nă plơi lan mơ̆ng ƀon gơñu dŏ, nao pơ Ơi Adai, jr̂ŏng nŭn môt gơñu dŏ dŏng r̂ok tơkai čĭ. 18Hmâo săp phui bŏ čĭ Sinai, yua Yêhôwa tr̂ŭn r̂ai tăm phui, dŏ ngŏ kŏ čĭ, săp nŭn biă đĭ klông-kôih, hla ti săp biă đĭ mơ̆ng lo a čuh ĕt, dăp bih ha boh kŏ čĭ nŭn pơpĭ tơtăl. 19Hmĭ a hyŭp đing kê jua kr̂aih, jai kơtang tui kơtang tui, pah anŭn, Môsê pơhiăp nao pơ Ơi Adai, nŭn hmĭ jua Ơi Adai pơhiăp til glaĭ pơ ñu dŏng.#19:19 Ơi Adai pơhiăp til glaĭ pơ ñu dŏng lơ «Ơi Adai pơhiăp til glaĭ pơ ñu mơ̆ng jua gr̂ŏm.» 20Nŭn Yêhôwa tr̂ŭn r̂ai dŏ ngŏ kŏ čĭ Sinai, jr̂ŏng nŭn Yêhôwa iâo r̂ai Môsê mơ̆ng kŏ čĭ, nŭn Môsê đĭ nao hĕ. 21Jr̂ŏng nŭn, Yêhôwa pơhiăp hr̂ŏm Môsê: «Tr̂ŭn nao wŏ, khă lôi nă plơi lan, lah gơñu kao lôi goi r̂ai pơ kâo Yêhôwa, čiăng ep. Jơ̆ ngă nĭng nŭn, lô gơñu ti djai. 22Gah môt ngă yang dŏng, hlâo gơñu ti mŭt r̂ai jĕ kâo Yêhôwa, gơñu khŏm ngă br̂ơi pô gơñu lơgoh hiam, huĭ lah kâo Yêhôwa kluh nao pơdjai lôi gơñu mơ̆n.» 23Nŭn Môsê til glaĭ pơ Yêhôwa: «Nă plơi lan bĭ thâo đĭ r̂ai pơ kŏ čĭ Sinai ôh, yua ih yơh laĭ br̂ơi mơi: “Br̂ơi dă goi jŭm dăl tơkai čĭ, čiăng čr̂oh kŏ čĭ ne ƀon lơgoh hiam.”» 24Yêhôwa pơhiăp hr̂ŏm Môsê: «Br̂ơi ih tr̂ŭn glaĭ wŏ, jr̂ŏng nŭn đĭ r̂ai dŏng, dăp jak ba Ơrô̆n đĭ r̂ai hr̂ŏm ih mơ̆n. Plai môt ngă yang, dăp nă plơi lan, anăm br̂ơi gơñu kao lôi goi r̂ai pơ kâo Yêhôwa ôh, huĭ lah kâo Yêhôwa kluh nao pơdjai lôi gơñu.» 25Nŭn yơh, Môsê tr̂ŭn nao pơ nă plơi lan dŏng, jr̂ŏng nŭn ñu r̂ă br̂ơi gơñu.

Currently Selected:

Biă 19: JKB

Highlight

Copy

Compare