Buă Ngă 6
6
A r̂ih mơnuih ngă buă juh r̂ăng
1Pah anŭn, môt hyĕn tui lal đĭ lô tui, nŭn môt sô̆n-sat Yuđa pơhiăp Krĭk,#6:1 Môt sô̆n-sat Yuđa pơhiăp Krĭk tui tam boh hiăp Krĭk a iâo gơñu «Môt Hêlên.» gơñu tr̂ŭk mơ̆ng môt sô̆n-sat Yuđa pơhiăp Hêbrơ, yua môt pơhiăp Hêbrơ ngă pơlŏm-pơloi mơ̆ng buă ček nŏ ƀŏng r̂ĭm r̂ơi br̂ơi môt đahmơi gơdr̂ô gah môt pơhiăp Krĭk.#An Buă 4:35. 2Môt r̂ă tang Yêsu pluh dua r̂ăng, gơñu iâo r̂ai bih-tih môt hyĕn tui, jr̂ŏng nŭn pơhiăp laĭ: «Mơi bĭ găl klaih lôi klơi pơhiăp Ơi Adai, nao dŏng buă ček nŏ ƀŏng đơč ôh. 3Nĭng nŭn yơh, ơ yŏng dơi, br̂ơi gô-ih r̂ih đahkơi juh r̂ăng tăm môt gô-ih, mơnuih nŭn a i gơñu mơnuih hơdĭp hiam, bŏ mơ̆ng Yang Bơngăt Hiam, dăp lơgơi, nŭn mơi ti bơdŏ br̂ơi gơñu ngă buă ne.#An Biă 18:21. 4Gah môt mơi dŏng, mơi khư̆t kăn klơi iâo-laĭ, dăp buă pơto klơi pơhiăp Ơi Adai đơč.» 5Bih-tih môt gơñu bŏ bŭt mơ̆ng klơi pơhiăp môt r̂ă tang Yêsu, jr̂ŏng nŭn gơñu r̂ih Stêphan, ñu mơnuih bŏ mơ̆ng klơi ngư̆, dăp bŏ mơ̆ng Yang Bơngăt Hiam, dăp Philip, Prôkhôrôh, Nikanơ, Timôn, Pamêna, wŏt Nikôlah, mơnuih plơi Ăntiyôk, ñu mơnuih mŭt sô̆n-sat Yuđa.#6:5 Môt đahkơi juh r̂ăng ne, a iâo ƀŏ gơñu tui tam Krĭk, nŭn ngă br̂ơi ta ƀôh laĭ, môt sang jnŭm r̂ih sô̆n-sat Yuđa pơhiăp Krĭk čiăng dŏng buă ček hnă br̂ơi đahmơi gơdr̂ô pơhiăp Krĭk mơ̆n. 6Gơñu ba nao môt juh r̂ăng nŭn, nao dŏ dŏng gah năp môt r̂ă tang Yêsu, jr̂ŏng nŭn gơñu iâo-laĭ ah ngan ngŏ môt nŭn.
7Klơi pơhiăp Ơi Adai hmĭ i yô jai kơtang tui, nŭn môt hyĕn tui Yêsu lal đĭ lô tui mơ̆ng plơi Yêrusalĕm, wŏt hmâo môt ngă yang lô-lĭn mŭt gah yô̆ klơi ngư̆ nŭn mơ̆n.
R̂ăng mă Stêphan
8Stêphan, ñu mơnuih bŏ mơ̆ng klơi khăp-pap Ơi Adai, dăp klơi kơtang myang, ñu ngă buă myang mơsêh wŏt klơi kơtang myang pr̂ŏng-pr̂ŏng tăm môt nă plơi lan. 9Pah anŭn, hmâo mơnuih pơanah gah sang luôm ha boh a iâo “Sang Luôm Môt Lơngai,” môt gơñu r̂ai mơ̆ng plơi Kirên, r̂ai mơ̆ng plơi Alĕk-santrie, r̂ai mơ̆ng tr̂ing Kilikie, dăp r̂ai mơ̆ng tr̂ing Asi, gơñu gŭ pơƀel hr̂ŏm Stêphan. 10Plai dŏng, gơñu bĭ anăm pơƀel hr̂ŏm Stêphan ôh, yua ñu pơhiăp mơ̆ng klơi lơgơi r̂ai mơ̆ng Yang Bơngăt Hiam.#An Lŭk 21:15. 11Nĭng nŭn yơh, gơñu yô pơsôl mơnuih pơanah mơ̆ng klơi hơ-et, pơđơi gơñu laĭ hla ne: «Mơi hmĭ pô ne hiăp pơmat Môsê dăp hiăp pơmat Ơi Adai.» 12Nĭng nŭn yơh, gơñu yô pơčŭt nă plơi lan, môt kŏng-tha, dăp môt gru pơto klơi juăt, jr̂ŏng nŭn gơñu nao mă Stêphan ba nao pơ môt khua tr̂ĕ kơđi. 13Môt gơñu pơtă čr̂oh mơnuih r̂ă pơhaih ƀlơl, br̂ơi gơñu pơhiăp hla ne: «Pô ne thâo ha tô̆ hiăp bơgăng glaĭ mơ̆ng sang yang lơgoh hiam dăp klơi juăt Môsê, 14yua mơi hmĭ ñu pơhiăp laĭ, mơnuih a iâo Yêsu plơi Nasaret, ñu ti bơr̂ăm lôi ƀon ne,#An Yôh 2:19. dăp pơlih lôi klơi juăt Môsê čr̂oh br̂ơi ta he mơ̆n!» 15Bih-tih môt khua tr̂ĕ kơđi dŏ ben pơ anŭn, gơñu ep pơčŏng ƀŏ Stêphan, nŭn gơñu ƀôh ƀŏ ñu hla ti ƀŏ ling-jang.
© 2024, Wycliffe Bible Translators, Inc.