Buă Ngă 5
5
Ananieh dua ñu Saphira
1Hmâo đahkơi ha r̂ăng a iâo ƀŏ ñu Ananieh, bơnai ñu a iâo Saphira, dua kơi bơnai ñu ƀuo lôi kơnah hua gơñu, 2len pơanah Ananieh čr̂oh ñu pô, bơnai ñu thâo klơi nŭn mơ̆n, jr̂ŏng nŭn ñu tô̆ len pơanah ba nao čr̂oh ti le môt r̂ă tang Yêsu. 3Pêtrôih kơña ñu: «Ơ Ananieh, yua yĕt satan dŏ bŏ mơ̆ng bŭt-tai ih, tơl ih khĭn ƀlơl Yang Bơngăt Hiam, dăp tô̆ len ih ƀuo kơnah, pơanah čr̂oh ih pô nĭng nŭn lĕ? 4Pah ih ka ƀuo kơnah nŭn, hiư̆m, kơnah nŭn bĭ djơ̆ kơnah ih pô ôh? Tơl ih ƀuo lôi kơnah nŭn, hiư̆m, len nŭn bĭ djơ̆ sĭt ih pô ôh? Yua yĕt bŭt ih khư̆t ngă nĭng nŭn lĕ? Bĭ djơ̆ ih ƀlơl mơnuih ôh, ih ƀlơl Ơi Adai yơh!»#An Juăt 23:21-22. 5Tơl Ananieh hmĭ klơi nŭn, ñu lơbuh tr̂ŭn tĕ hĕ pr̂an, jr̂ŏng nŭn bih mơnuih hmĭ a r̂ă mơ̆ng klơi nŭn, gơñu huĭ jat. 6Nŭn môt dơdăm gŭ đĭ, mă pŏn lôi dr̂ơi-jĕn ñu, jr̂ŏng nŭn ba nao dŏl lôi.
7Ai-ñu klâo mông dơdơi mơ̆ng anŭn, bơnai ñu mŭt nao mơ̆n, ñu bĭ thâo mơ̆ng buă nŭn ôh. 8Pêtrôih kơña ñu: «R̂ă br̂ơi kâo wŏ, ih ƀuo kơnah hmâo len dơm ne yơh?» Ñu til glaĭ: «Ơ̆, dơm nŭn yơh.» 9Pah anŭn Pêtrôih pơhiăp nao pơ ñu: «Yua yĕt gô-ih phom hr̂ŏm gŏp gô-ih long-lăng Yang Bơngăt Khua Yang nĭng nŭn lĕ?#An Biă 17:2. Nêne, le môt dŏl lôi kơi ih tơl r̂ai ti bah amăng boih, gơñu ti ba nao ih mơ̆n.» 10Tăñ pah anŭn he boih, ñu lơbuh tr̂ŭn ti le Pêtrôih, jr̂ŏng nŭn tĕ hĕ pr̂an. Tơl môt dơdăm mŭt r̂ai, gơñu ƀôh ñu djai, jr̂ŏng nŭn gơñu ba nao dŏl lôi dr̂ơi-jĕn ñu jĕ kơi ñu. 11Bih-tih môt sang jnŭm dăp bih mơnuih hmĭ mơ̆ng buă ne, gơñu huĭ kơtang jat.
Môt r̂ă tang Yêsu pơhuai mơnuih wă-nuă
12Môt r̂ă tang Yêsu ngă lô klơi kơtang myang,#5:12 Môt r̂ă tang Yêsu ngă lô klơi kơtang myang lơ «Ơi Adai yua môt r̂ă tang br̂ơi Yêsu ngă lô klơi kơtang myang.» dăp buă myang mơsêh, tăm môt nă plơi lan. Bih-tih gơñu hmâo ha bŭt ha tai pơtŭm gŏp gơñu tăm ƀon He Salômôn,#An Buă 3:11. 13mơnuih pơkŏn dŏng, bĭ khĭn mŭt pơtŭm hr̂ŏm môt gơñu ôh, plai dŏng nă plơi lan pơpô̆ bơyom môt gơñu. 14Hmâo mơnuih phr̂âo, ngư̆ Khua Yang jai lô tui lô tui, dăp đahkơi dăp đahmơi lô-lĭn. 15Nŭn yơh, r̂ăng ba nao mơnuih wă-nuă phar̂a-phar̂a pơ glan, pơđih br̂ơi gơñu tăm čiao, tăm jao, čiăng kơmai Pêtrôih djơ̆ nao pơ môt gơñu pơanah, tơl ñu bat găn ha anŭn. 16Hmâo lô mơnuih dŏ jŭm dăl plơi Yêrusalĕm, jak gŏp gơñu ba nao mơnuih wă-nuă dăp mơnuih yang set ngă pơkơnap, jr̂ŏng nŭn bih-tih gơñu huai soh-sel.
R̂ăng bơjăm bơjuă môt r̂ă tang Yêsu
17Pah anŭn, pô khua ngă yang, dăp bih mơnuih dŏ hr̂ŏm ñu, môt nŭn a iâo môt Sađusi, gơñu gŭ bơgăng glaĭ, yua bŭt gơñu bŏ mơ̆ng klơi nač, 18gơñu mă môt r̂ă tang Yêsu, ba nao kr̂ĭ lôi tăm sang khŭk, 19tơl mlăm, hmâo ling-jang Khua Yang ha r̂ăng nao pih bah amăng sang khŭk, ba biă môt gơñu,#An Doh 34:7. jr̂ŏng nŭn r̂ă laĭ: 20«Br̂ơi nao dŏ dŏng tăm lan sang yang, jr̂ŏng nŭn r̂ă r̂oi br̂ơi nă plơi lan hmĭ, tơgr̂ư̆ klơi pơhiăp mơ̆ng klơi hơdĭp phr̂âo ne.»#An Yôh 3:14-16. 21Tơl gơñu hmĭ nĭng nŭn, môt gơñu mŭt nao tăm lan sang yang mơ̆ng hr̂oih, jr̂ŏng nŭn gơñu pơto.
Tơl pô khua ngă yang dăp bih-tih mơnuih dŏ hr̂ŏm ñu#An Buă 4:5-6. tơl r̂ai, gơñu iâo môt khua tr̂ĕ kơđi dăp bih-tih môt kŏng-tha nă čo Israel, r̂ai pơtŭm gŏp gơñu, jr̂ŏng nŭn pơđơi r̂ăng nao pơ sang khŭk, ba r̂ai môt r̂ă tang Yêsu. 22Pah môt gak sang yang tơl nao pơ anŭn, gơñu bĭ ƀôh môt r̂ă tang Yêsu tăm sang khŭk ôh, nĭng nŭn yơh, gơñu wŏt glaĭ dŏng, jr̂ŏng nŭn r̂ă laĭ: 23«Môt mơi ƀôh bah amăng sang khŭk dŏ nŏng a kr̂ĭ lôi klĕp, wŏt môt gak dŏ nŏng dŏ dŏng ti bah amăng mơ̆n, tơl mơi pih bah amăng, mơi bĭ ƀôh mơnuih dŏ tăm anŭn ôh.» 24Tơl khua gak sang yang, dăp môt tha ngă yang hmĭ nĭng nŭn, môt gơñu tuêl tăm bŭt mơ̆ng buă gơñu hmĭ nŭn. 25Pah anŭn hmâo ha r̂ăng mŭt nao r̂ă br̂ơi môt gơñu, ñu laĭ: «Hmĭ wŏ! Môt đahkơi gô-ih kr̂ĭ lôi tăm sang khŭk nŭn, nêne gơñu dŏ pơto nă plơi lan tăm lan sang yang dih!» 26Jr̂ŏng nŭn môt gak sang yang dăp khua gơñu, môt gơñu nao tô̆ môt r̂ă tang Yêsu, plai gơñu bĭ khĭn pơkhŏm-bơgŏ ôh, yua gơñu huĭ nă plơi lan jiah gơñu mơ̆ng bohtâo.
27Gơñu ba nao môt r̂ă tang Yêsu, dăp pơđơi gơñu dŏ dŏng gah năp môt khua tr̂ĕ kơđi. Jr̂ŏng nŭn pô khua ngă yang pơhiăp hr̂ŏm gơñu, ñu laĭ: 28«Mơi khă gô-ih bĭ br̂ơi pơto mơ̆ng ƀŏ pô nŭn ôh,#An Buă 4:18. plai nêne dŏng, gô-ih dŏ nŏng pơto bŏ mơ̆ng plơi Yêrusalĕm, dăp gô-ih hăt ti săl mơi, čiăng mơi đom kơđi mơ̆ng dr̂ah pô nŭn dŏng.»#An Mat 23:35; 27:25. 29Nŭn Pêtrôih dăp môt r̂ă tang Yêsu pơkŏn dŏng, gơñu til đĭ: «Mơi khŏm ngư̆ tui Ơi Adai, hiam hloh mơ̆ng mơi ngư̆ tui nă mơnuih.#An Biă 1:17; Buă 4:19. 30Ơi Adai, Yang ơi don ta, ñu bơdĭp glaĭ Yêsu, pô gô-ih pŏng pơdjai lôi pơ kơyâo pơkăl. 31Ơi Adai pô̆ đĭ Yêsu br̂ơi dŏ gah nuă ñu, čiăng bơdŏ br̂ơi Yêsu ngă khua wai-lăng, dăp jr̂ŏng pô pơklaih, čiăng pha br̂ơi môt sô̆n-sat Israel hmâo klơi pơlih bŭt-tai, dăp pha br̂ơi gơñu hmâo klơi klaih lôi klơi glaĭ he mơ̆n.#An Mat 1:21. 32Mơi ne yơh, môt ƀôh jel dăp r̂ă pơthâo mơ̆ng buă nŭn,#An Lŭk 24:48. wŏt Yang Bơngăt Hiam#An Yôh 15:26. r̂ă pơthâo mơ̆n, Yang Bơngăt Hiam nŭn yơh Ơi Adai pha br̂ơi bih-tih mơnuih ngư̆ tui Ơi Adai.»
33Tơl môt khua tr̂ĕ kơđi hmĭ nĭng nŭn, bŭt gơñu hêl hang-hik, dăp čiăng pơdjai lôi môt r̂ă tang Yêsu he mơ̆n. 34Plai hmâo Pharasi ha r̂ăng, ñu gŭ đĭ tăm môt khua tr̂ĕ kơđi. A iâo ƀŏ ñu Kamaliel, ñu gru pơto klơi juăt Môsê, ñu nŭn mơnuih nă plơi lan pơpô̆ bơyom. Ñu pơđơi r̂ăng ba biă môt r̂ă tang Yêsu gah ia-wang ha ƀiă ƀơĭ. 35Jr̂ŏng nŭn ñu pơhiăp nao pơ môt khua tr̂ĕ kơđi, ñu laĭ: «Ơ môt Israel, br̂ơi lơwăng hŏ mơ̆ng buă gô-ih khư̆t čiăng ngă mơ̆ng môt ne. 36Yua pah ahlâo, hmâo đahkơi ha r̂ăng a iâo ƀŏ ñu Thơđah, ñu gŭ đĭ, dăp laĭ pô ñu mơnuih ngă pr̂ŏng, ai-ñu hmâo mơnuih bat tui ñu pă tuh r̂ăng. Tơl a pơdjai lôi ñu, dơm mơnuih dŏ hr̂ŏm ñu, đuĕ br̂u-br̂a bih blao. 37Dơdơi mơ̆ng anŭn, hmâo đahkơi ha r̂ăng dŏng a iâo ƀŏ ñu Yuđah, ñu r̂ai mơ̆ng Galilê, ñu gŭ đĭ mơ̆n, pah nôk r̂ăng yap kŏ mơnuih, jr̂ŏng nŭn ñu yô pơsôl mơnuih pơanah čiăng bat tui ñu. Ñu djai mơ̆n, jr̂ŏng nŭn dơm mơnuih bat tui ñu, đuĕ br̂u-br̂a bih blao. 38Gah buă ne dŏng, kâo r̂ă br̂ơi gô-ih, anăm wŏn-wai mơ̆ng môt ne ôh, wŏt anăm ngă nŏ yĕt mơ̆ng gơñu le. Jơ̆ laĭ klơi gơñu khư̆t, lơ buă gơñu ngă ne r̂ai mơ̆ng mơnuih, nŭn ti r̂ăm lơñă lôi, 39jơ̆ laĭ buă ne r̂ai mơ̆ng Ơi Adai, nŭn gô-ih bĭ thâo bơr̂ăm lôi gơñu ôh. Ha tô̆ dŏng, huĭ gô-ih bơgăng glaĭ mơ̆ng Ơi Adai!»#An Pơđĭk 21:30; Êsai 46:10. Nŭn yơh, môt khua tr̂ĕ kơđi phom tui ñu. 40Nŭn gơñu iâo r̂ai môt r̂ă tang Yêsu, jr̂ŏng nŭn pơđơi r̂ăng buăt môt gơñu mơ̆ng wĕ,#An Mat 10:17. dăp khă bĭ br̂ơi môt gơñu pơto mơ̆ng ƀŏ Yêsu dŏng tah, jr̂ŏng nŭn klaih lôi gơñu. 41Pah anŭn, môt r̂ă tang Yêsu biă đuĕ mơ̆ng môt khua tr̂ĕ kơđi dăng hôk-blôk, yua Ơi Adai bơyom gơñu, tui tam klơi r̂ăng bơjăm bơjuă ngă bơmlâo gơñu, yua mơ̆ng ƀŏ Yêsu.#An Mat 5:11-12; Yôh 15:21. 42R̂ĭm r̂ơi, gơñu pơto tăm lan sang yang, tăm sang gơñu pô, gơñu bĭ lôi ôh, r̂ă r̂oi klơi phr̂âo hiam laĭ, Yêsu yơh Yang Krih.
© 2024, Wycliffe Bible Translators, Inc.