NGOUG JI: 4
4
Yerusalem Byo, Yoin" Lo" Thang: Ri:
1Ngoonu" da" lo, lo, doug bang da" sheing: gi shoem: loo" bye:.
Noku Yhoem: Moo" mo lugzeing joem gi
voogung fu" moo" khyoo: cang lhu: sain" to" boem abye:.
2Ziun mo zoolu: zoo: yigi ngoonu" shid re" sheing: yo' dakhyoo" ti"
phoug" dab, nyid ago". Nghoid loug we'
akhid" nyangnu" gi myid oug" yo' dakhyoo" ti"
nau khyo" zheung: koid ago".
3Zeigni myhi' lang" ri nya: zoo: noug" nu" ri
noug se' jhug nghoid loug we' nga" byumyu" yigi
ngho' goola ug yo' dakhyoo" ti"
nyangnu" da" zooshang: yiri gi akoid nghoid da:.
4Nyangnu" gi nyangnu" da" zoonu" yiri zooyoid gyid shed zi
shoug" nhang: boem lho: to" said pyam ago".
Zooshang: yigi hang" abyid: wa da" zoo: shug joem ri cang mho' yen" ago".
5Shid phyang" ngham" thang da" zoo: noem ri zo: nyid mo, gi
fu" moo" khyoo: joem moo: zooyoid shid: jo, boem ago".
Ngi: boo tung" zo: shoug lho: khu: kaid mo, gi
pho kyug boem moo: zoo: noem ri byeug sho: yen" ago".
6Nga" mung" byu yigi Mangso lo, khoug: moo: nyeigdain tung"
gyoeb, gyo" lo" da" Sodom voo moo: nyid mo, tho' re"
je" gyi: dam xo: yooboo dam ri loem zo: ago".
7Ngoonu" da" khokham zoomyi: nu" yigi: noo aboo-
gyu: yhang: ti" young" gyeing" jo, ziyo' yang" zain" yoem: bo nyid ago".
8Akhid" koem gi fu" moo" khyoo: joem moo nyangnu" ri
hang" we' ase' zi leung jo, ago".
Nyangnu" da" myonhoo: joem gi shid: yoomo ceig ceig no, byoug boem bye:.
Seig kug su" kyoug byoug da:.
Nyangnu" shooyid joem gi shooyoug: joem moo: kyoug dab, pyam ago".
9Meing: zain: jang: moo shid: loo" mo, gi kangso' dei nyid wa shid re"
zoo: noem ayoo" wigi zo" re zooyoid shid: loo" mo, tho' moo: je" ge nyid.
10Nga" byumyu" yi jang" moo bue" lo da" yau: khe" khyoo: gi
gyoug dain pho" zi nghoid.
Jheddab myid bo da" myhi' zeing yigi nyangnu" da" zooshang: yiri
zoo: noem khyo" poo" zo: pyam boem da,.
11 Aseing gi nya: nheig yo: khyoo: ri yoem: byeung" sho' phain" thu' kaid.
Ziun ri myidgung ju" sho' nghe' jhoem" pyam da" myi: ri tab kaid da:.
12Khayo hang" we' tungbau meing: mo zoug: yi lang" ri
Yerusalem voomoo" khoem" khyoo: ayo" jhen" vang yhi: ga: myid loem ago".
13Nghoid loug we' nya: lapi: yigi yooboo shoid nyid boem ziyo'
nya: khainjung yigi ce: yooboo we' ayoo" mo, ri
shid: shoug" nhang: da" gang mo hougsu" bue" lo" boem bye:.
14Nya: vhujhung: yigi fu" moo" khyoo: joem moo: myo, jed, bang: yhang: ti" nyid lam" yen" ago".
Nyangnu" gi suid" yo' lhu" ci: boem yoomo dayug we'
nyangnu" avoem" yhe: tain" nghoid ago".
15Byumyu" yigi phang: loo" ge'. Nanu" gi dam dab abye: go".
Ngoo ri atain" goo" ga: nyho: ago".
Houg: yoomo nyangnu" gi damung" mo zi damung" khyoo:
hang" alhoem: tau yu zi nyid yen" ago".
16 Aseing gi nyangnu" shid mo ce: gung ayoug loo: nghoid da:.
Nyang: gi nyangnu" ri khaid sain" pyam bye:.
Nyangnu" da" khainjung yiri we' vhujhung: yiri we'
cisoin: loo: wa zi anghoid.
17Ngoonu" gi khanham we' ngoonu" jang" moo: aju" re" yu" shi" da"
pang" thoug su: ri ayo" lang" loo: sho' yu" bye:.
Ngoonu" ri pang" yu wa ayo" da" mungdain: daloem: moo:
pang" thoug wa ziri xo' lang" nyid boem.
18Gyivoo joem gi ngoonu" ri lang" yu" nyid da:.
Ngoonu" gi fu" moo" khyoo: moo: lang" atho' yo" so" yen".
Ngoonu" da" bidnyid joem gi thang byug bye:.
Lo" thang da" ayo, we' ju" loo bye:.
19Nyangnu" gi mougkhung: mo dang: lho:
gyo" re" da" zoin bung: tho' moo: je" myab, khyo" ngoonu" ri cang khaid lo ago".
Nyangnu" gi ngoonu" ri bouggung joem moo ju" sho' cang khaid ago".
Nyangnu" gi ngoonu" ri dain" pyoid yoo: moo nyeigdain tung" lhoem: myheug yu ago".
20Nyangnu" gi ngoonu" da" kangso' apoem: ayang: ri to" da" Khokham phoo ri
jhen" vang lo da" yugkhang" moo" mo,
ngoonu" ri goem loem byid: wa ein: ngoonu" myid loem too" su: Aseing wigi:
khyen: to" su: ri myheug yu pyam byed: boem ago".
21Edom yo' Uza voobyu yi we"- yi nyid ge'.
Nanu" yo" ngei pyo: uri ngei pyo: nyid ge'.
Nanu" da" yau: khe" kyi" khyeug khyoo: gi ju" lo nyid bye:. Nanu" gung cen: so" leung baid yen" ziyo' sho' thu' goo" wa.
22Ziun gi nya: yooboo jhen: xab abye:. Aseing gi
ngoonu" ri pyoung" nyhid: to" jang" mo myang" sho' atoo" loo.
Nghoid loug we' Edom we" Aseing gi
nang ri yooboo dam byid: wa nghoid.
Nyang: gi re" yooboo moo" zoo" joem ri phang shug wa zi nghoid.
Currently Selected:
NGOUG JI: 4: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.