NGOUG JI: 3
3
Yooboo Dam Byid: zi Nheigloem: Thid ziyo' Myid byu Khyoo:
1Ngoo gi Mangso wigi yooboo dam byid: ga: zi
ci: nghoid ein: ziri si su: nghoid.
2Nyang: gi ngoo ri no, tho' mo je" no, da"
moug: coid khoug: khyoo: shu" vang loo" bye:.
3Houg: lho: ngoo ri nheig khyeug myid aboo loo: doem baid baid koid nyid.
4Nyang: gi shoo" ri byo, jeug loo" nhang: lho:
shoomyen ri thug nhang: da: nga" shooyoug: joem ri we'
gyau: moin" loo" nhang: bye:.
5Nyang: gi ngoo ri nheigloem: amyen, akhyoid wim nhang: ziyo'
dayam dayoo: kham' zoo: ca" da" thung: yhoem: moo myhid" lhung to" da:.
6Nyang: gi ngoo ri shid: da" jham" coug: youg coid no, khoug: moo ayoid, ayu" nyid nhang: bye:.
7Nyang: gi ngoo ri jangcoo" tei" joem yo' tei" to" da:.
Ngoo gi phang: loid wa myid byu jang: ajo, da" thung: byu dayug nghoid.
8Ngoo gi pang" thoug yu wa shid re" nyho: yoid kaid nghoid loug we'
Mangsoo gi: atam" gyoo: loo: nghoid da:.
9Ngoo gi khyoo: so" lo" ri khyid: vhu" thoung" wigi
ngoo lo" shoid khyoo: lug vang khyam: yam kyo' to" da:.
10Nyang: gi voem, dadu: yhang: ti" ngoo ri lhoem: nyid wigi
nyang: gi khangkhyi dadu: yhang: ti" nga" tho' moo: byam ne' da:.
11Nyang: gi ngoo ri khyoo: moo cang khaid lo wigi
ngoo ri ajab, amoin" bui" sho' lang: khyam" lho: too" khare".
12Nyang: gi nya: da" lo, lid: ri thoung: yu lho:
ngoo ri nya: myoo: khaid joem shid re" thang" thi: koid da:.
13Nyang: gi nya: myoo khaid joem ri nga" gung moo: no, sho' beug zhoug kaid bye:.
14Mung" byu yigi ngoo ri nyid" goin" coem yi nyid boem.
Ngoo gi houg: bang: dangain" mo, da" yinoug tu' ei" pho" su: bue" loo" bye:.
15Nga" zoo: noem, shid mo nyang: ngoo ri byid: gu: dangain" gi
kyid: kyid: kho" da" yau: khe" kyi" khyeug zi za: nghoid nyid.
16Nyang: gi nga" da" myonhoo: ri myidjang moo doin: gyoid byid:.
Nga" zeijang ri lugzeing joem moo: doin: thung" byid:.
17Ngoo gi yang" zain" khyoo:- ngei pyoo: yug yo khyoo: yo'
ngei pyo: khyoo: ga: ziri to" myhed pyam bye:.
18Ngoo gi myang" sho' nyid loo: wa zi anghoid.
Aseing mo nga" myid byu jang: gi thang byug bye:.
19Ngoo gi dam no ziyo' nyid wa yhoem: ayo" ziri myid boin: zigi
nga" shid mo kyid: kyid: kho" da" dug nghoid nyid.
20Ngoo gi hau: khyoo: ri za: myid nyid wigi
nga" Venyi: gi yoem: shoin: byug bye:.
21Nghoid loug we' ngoo daja: myid boin: kaid ri myid byu jang: doem yo" yu bye:.
22 Aseing da" ashoid avhang: jheddab myid yo'
nheig khyeug khyoo: gi agoin athang loo: dajo, jo,.
23Hau: zigi nab soin: zoo" moo myenjham" wigi
bidxain" re" yhang: ti" deing nyid.
24Ngoo yo" zi dangain" Aseing nyang: za: nghoid.
Houg: lho: nyang: moo nga" myid byu khyoo: to" too" bye:.
25 Aseing gi nyang: ri loem khoug: mo, atho' moo ge nyid zi nghoid.
26Houg: yoomo ngoonu" khyo" nheigloem: sheing: sheing: to" lho:
lang" nyid wa. Nyang: wigi ngoonu" ri khyoid yu wa zigi lang" nyid jang: ge da" zi nghoid.
27Houg: yoomo he: khyoo: ri ngoonu" vedyam" yo, moo
yo" jhau" yu wa zigi ge thang khyoo: nghoid.
28Ngoo kyi" kyeug zi shoug" nyid ri ngoonu" nyang: kyeing" sam: zoo: zhoung: jo, wa zi ge nyid.
29Ngoonu" gi vhuloem goem" lho: goeb, vang ri ge da:.
Khasu" wim ga: ri myid byu joyoo bo ri boo shi" wa.
30Ngoonu" ri baid nghoid loug we' rue" loo nghoid loug we'
dangain" ri ngoonu" gi kham zoo: wa zi ge nyid.
31 Aseing gi jheddab nheig khyeug myid yo' byeung" jo, su: nghoid yoomo
ngoonu" ri pyaid moo too: moo ngeug pyam wa zi anghoid.
32Nyang: gi ngoonu" shid re" kougshu: nhang: nghoid loug we'
ngoonu" ri jheddab khyoo: gi deung wigi yoem: bo nyid.
33Nyang: gi ngoonu" ri kougshu: nhang: ziyo'
dam noo nhang: jang" moo: ngei pyo: zi anghoid.
34Ngoonu" da" Venyi: gi thung: khoug: moo nhe' pye" pyam ziri Aseing gi se' nyid.
35Ngoonu" gi nyang: byid: to" da" amyeing" ri
he: ngeug pyam zi shoug" lang" nyang: gi se' nyid.
36Tarha" yung" moo: ajo da" tarha" dang: phyed wa ayo, ri nyang: gi se' nyid.
37 Aseing nyang: myid vho: khyoo: za: khanham we' dalhoung bue" lo.
38Ge ziyo' age zi eig ja: dakhyoo" ti" nya: da" amyeing" mo bue" lo zi nghoid.
39Ngoonu" gi ngoonu" nya: da" yooboo yoomo
yooboo dam byid: zi loem zo: ri ciwim wigi myeing" myoo: wa lha".
40Nyang: nya: khyoo: ri goolhoo: myid soin: yu" lho:
Aseing jhang khyoo: doem tau" loo" loo: shang.
41Ngoonu" da" nheigloem: gi mougkhung: tho' moo:
Mangsoo ri phang shoug lho: akyu" mho' nyid shang.
42Ngoonu" gi yooboo shoid vhang: lho: thougtheung nyid boem bye:.
Hougsu" nghoid yoomo O" Aseing we"-
nang gi ngoonu" ri yooboo akhyoid byid: shi" nghoid da:.
43Nang ngoonu" ri cang khaid lo lho: said pyam da:.
Re" da" nheig khyeug khyoo: gi nang nheig yo: ziyo' nghoeb pyam abye:.
44Ngoonu" da" akyu" mho' thui: ayo" lid: phyed loo" sho' nang nheig joem: yo: da"
jhoemmoug" thei" gi no, thu: ziyo' nghoeb lhoung to" da:.
45Nang ngoonu" ri mougmyid mo mhoid soid boem bue" loo" nhang: abye:.
46Ngoonu" da" gyivoo yi dangain" mo, gi ngoonu" ri coem rue" lho: juang" yi zi shau" boem bye:.
47Ngoonu" gi kyi" kyeug ziyo' byo, yoin" lo" khyoo: ri loem zo: lo boem bye:.
Ngoonu" gi gyoug dain ci' mau" ja: yo' gyoug pho" joyoo moo: danyid nyid boem.
48Nga" byumyu" yigi: byo, yoin" said toem" pyam zi shoug" yoomo
nga" ngoug byid gi: gyid gyung: su" yau, thu' nyid bye:.
49-50Ngoonu" ri Aseing wigi mougkhung: tho' mo ayu" yu" gi
nga" da" ngoug byid gi athang agoin da" gyid zoo: gyung: su"
dayau gyo" nyid wa zi nghoid.
51Voomoo" mo myiyi: yi byo, yoin" lo" ziri ngoo myang lang"
seing" kho" lho: koug shu: nyid.
52Nyang: gi ngoo ri ngheing" wa khyoo: ci: abo da"
gyivoo joem lo, moo ngho' dadu: ri yhang: ti"
myhi' lhoung to" zi shoug" bye:.
53Nyangnu" gi ngoo ri duang: khuang" khoug: khyoo:
adei phab phab du" khyo' kaid lho duang: khuang" nhoid moo:
lugzeing yo' myhed" to" ago".
54Ngoo ri gyid je: nhe' byeung" lo wigi ngoo gi shid: wa zi
jhang loo bye: ein: myid pyam bye:.
55O" Aseing we"- duang: khuang" thi" mo
ngoo nang ri yoid khe: kaid bye:.
56Houg: yoomo ngoo mho' yoid thui: ri tam" gyoo: byid: wa shid re"
nang ri ngoo mho' uri nang tam" gyoo: byid: bye:.
57Nang gi ngoo ri ‹agyug noo"› ga: tu" byid: bye:.
58«Aseing we" nang gi ngoo ri khyoid yu wa ga: ju" re" wigi
nga" kang: so ri khyoid yu byid: bye:.
59Nga" shoid dab lho: dang: phyed byid: we'.
Ngoo shoid vhang: nyid da" moo" zoo" jhoem ri nang si' byid: nyid da:.
60Nga" gyivoo joem gi ngoo ri khayhi' ngheing" nyid ziyo'
nyangnu" ngoo ri khasu" gyi koid wa ziri nang si' bye:.
61O" Aseing we"- nyangnu" ngoo ri coem rue" nyid ziri nang shoug" gyoo: bye:.
Nyangnu" da" byen pyoo: moo" zoo" dangain" ri nang si' bye:.
62Nyangnu" gi danyid" goin" goin" ngoo ri gei sang: nyid boem lho:
nyangnu" da" byen pyoo: moo" zei: nyid ago".
63Nab soin: mo zi myen" thang: ju" sho' nyangnu" gi
ngoo ri za: da juang" yi nyid boem ago".
64«O" Aseing we"- nyangnu" koid lid: loo bye: moo" zoo" yo' dakhyoo" ti"
nyangnu" ri yooboo dam byid: we'.
65Nyangnu" ri nheing" lho: nheigloem: thid loo nhang: we'.
66Nyangnu" ri shoo" su" kuang pyam wigi
mougmyid tho' mo jhoid said toem" pyam byid: we».
Currently Selected:
NGOUG JI: 3: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.