EZEKIEL 4
4
Yerusalem ri Vang: Lheing Too" wa da" Khyoo: ri Ezekela Lho: Shug Khyoo:
1Mangsoo tid zigi «Shid: se' da" byu we"- zhoothung" da thung" yu wigi re" shidkhoin" moo too" we'. Houg: lho: hau: adang moo thau" khyeing" wigi Yerusalem voomoo" lhid" tuang we'. 2Hau: thang: hau: ziri vang: lheing to" asoo" khyo" hau: lheing khoem dangain" ri gadug joem myid boem" joem dab joem seig thung" moo" zeing joem ri we' lhid" tuang to" we'. 3Jo, to' pyi" dapyi" ri yu wigi nang yo' voomoo" agyoo: moo vang yhang: ti" zhug too" we'. Voomoo" shoid khyoo: myonhoo: shu: we'. Hau: ziri vang: to" wigi nang gi hau: ziri vang: lheing too" su: nghoid. He: zigi Israela byumyu" yi shid re" alhoo: nghoid.
4-5«Hau: thang: re" lo, kung" shoid khyo" leung jo, we'. Houg: lho: ngoo gi re" adang moo Israela byumyu" yi da" yooboo ri foin: too" wa. Nang gi houg moo 390 nyid" nyid nyid wa wigi kyi" khyeug kham zoo: wa. Ciwim gari nyangnu" yooboo gang mo nghoid. Ngoo nang ri dang: phyed too" bye: da" nyangnu" yooboo gi neing: thang danyid" gi dazain nghoid wa. 6Nang hau: ziri bain lang" re" lo, yo shoid khyo" doem jhang" to" wigi kyi" khyeug kham zoo: we'. Ciwim gari myid: xi: nyid" shid re" Yuda da" yooboo dam nghoid. Danyid" shid re" nyangnu" yooboo dazain nghoid.
7«Yerusalem vang: lheing to" ziri zhug yu" nyid we'. Voomoo" moo re" lo, zhoeb lhei" shug wigi hau: ziri thougtheung lapi: pi: we'. 8Ngoo nang ri tei" to" wigi vang: lheing to" zi abei: atho' dashoid mo zi dashoid khyoo: ayo" lheing: phug wa.
9Akhid" sungsoo:- Yoono,- shi" gyang:- nug- nhoo" yo' vhoo" dajhi ri yu we'. Hau: joem dangain" ziri dage" lheig lho: zooyho' koid we'. Hau: zigi nang lo, kung" shoid khyo" yhoeb jo, da" 390 nyid" gu: moo zoo: wa zi nghoid. 10Nang gi danyid" ri zooyho' 5 rung yo" zoo: wa. Hau: zigi thang: nyid" ju" sho' shid re" nghoid. 11Nang gi gyid ri we' danyid" ri eig koem: tu' lho: shug ca" wa zi nghoid. 12Nang gi yugkhang" moo" yo" myang da" joyoo moo byu xangsu: khyid" kyug yo' myi: moid wigi hau: myi: moo zooyho' ri kang: lho: zoo: we'.
13 Aseing gi «He: alhoo: gi ngoo Israela byumyu" yiri tungbau mung" khyoo: khaid sain" kaid uri tarha" yo' toem' to" da" zoo: noem ri Israela byumyu" yi zoo: ca" da alhoo: nghoid.
14Nghoid loug we' ngoo doem phug tid zigi «Anghoid wa yoem: moo" bo Aseing we"- ngoo gi ngoonya: gung ri aco' ajhoid akoid yu". Ngoo zooshang: yo, mo nyang: za: shid: lo" da" gougnyhoug shoo"- gougnyhoug lam" wigi ngaid said da" gougnyhoug shoo" ri azo: lo yu". Ngoo gi ayung" alho' ein: myid jho: da" zoo: noem ci: ri we' khanham we' azo: yu"» ein: tid bye:.
15Houg: yoomo Mangsoo gi «Gi bye: ngoo gi hau: gungthid nukhyid" ri ci: nhang: wa. Hau: adang moo nang zooyho' kang: zoo: wa zi nghoid» ga: tid.
16Nyang: gi xo' lho: «Shid: se' da" byu we"- ngoo gi Yerusalem shid re" zoo: yho' pang" thoug ziri phyed pyam byid: loo: wa. Houg: moo nyid da" byumyu" yigi nyangnu" zo: da" zoo: noem yo' nyangnu" shug da" gyid ri leug uri nheigloem: thang wigi seing" kho" loo goo" wa. 17Nyangnu" zooyho' yo' gyid thang lo" byug goo" wa. Nyangnu" nheigloem: thang loo goo" wa. Houg: lho: nyangnu" yooboo gang mo nyangnu" she: pyam pyam zi shoug" wa.
Currently Selected:
EZEKIEL 4: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.