EZEKIEL 3
3
1Mangsoo gi «Shid: se' da" byu we"- he: mougsoug" deing: ri zoo: we'. Hau: thang: yhe: wigi Israela byu yiri dang: tid we'» ga: tid.
2Houg: yoomo ngoo gi nga" nhoid ri fo' kham: bye:. Nyang: gi ngoo ri zoo: wa shid re" mougsoug" deing: ri byid: bye:. 3Nyang: gi «Shid: se' da" byu we"- ngoo nang ri byid: da" he: mougsoug" deing ri zoo: we'. Re" voem: doug: hau: ziyo' zo: gyi: ci: we'» ga: tid. Ngoo hau: ziri zoo: bye:. Hau: zigi byoo: yhid: yhang: ti" cau: da" main bo da:.
4Hau: thang: Mangsoo tid zigi «Shid: se' da" byu we"- Israela byumyu" yi jhang khyoo: yhe: wigi nang ri ngoo tid nhang: ziri hau: byumyu" yiri yhe: tid kyoo" we'. 5Ngoo gi nang ri yau: da" tungbau myeing" ji da" byumyu" yi jhang khyoo: anhang: kaid. Israela byumyu" yi jhang khyoo: nhang: kaid zi danghoid. 6Ngoo nang ri nang ase' gyo: da" yau: da" myeing" ji da" byumyu" zeing yi khyoo: nhang: kaid nghoid ri nyangnu" nang ri tam" gyoo: wam bye:. 7Nghoid loug we' Israela byumyu" yi mo dayug we' anau tam" gyoo: wa. Nyangnu" gi nang rilang" anau tam" gyoo: wa. Nyangnu" dangain" bang: gi nheigloem: thain: wigi pyi: sho: boem ago". 8Akhid" ngoo nang ri nyangnu" yhang: ti" nheigloem: thain: wigi seing" yang" nhang: wa. 9Ngoo gi nang ri lug boem yhang: ti" geing: teing nhang: wigi sen: lug yhang: ti" thain: nhang: wa. Hau: thougtheung da" byumyu" yiri agyug noo".
10Mangsoo xo' tid zigi «Shid: se' da" byu we". Nang ri ngoo tid gu: ja: khang" moo" ri jhug za: tam" gyo: lho: xoem" ci: we'. 11Houg: lho: pyoung" she: nyhid: too" shau" da" re" byumyu" yi jhang yhe: wigi ngoo yoem: moo" bo Aseing nyangnu" ri tid ziri nyangnu" tam" gyo: nghoid nghoid- atam" gyo: nghoid nghoid nyangnu" ri tid kyoo" we» ga: tid.
12Hau: thang: Mangso da" Venyi: gi ngoo ri tu: to' yu wigi nga" nungthang mo thui: zeing da thui: ri shau" gyo:. Hau: zigi «Mougkhung: tho' mo Aseing da" phung" yoeb ri coung" ge» ga: zi nghoid. 13Ngoo gi hau: gougnyhoug joem da" dung joem moug: laid moo phab myheing thui: yo' rheing" cab joem da" myeing thui: gi myid loeb loeb da" yhi' myeing thui: shau" gyo:. 14Aseing da" yoem: so' gi nga" atho' moo yoem: moo" yo' ju" re" wigi nya: Venyi: ngoo ri shu" thu loo" lang" nheig kho" ziyo' nheig yoo: nau re" da:. 15Houg: yoomo ngoo gi pyoung" nyhid: too" shoug" bang: nyid da" Kheba gyid lang yam mo Tela Abib moo ju" nyid bye:. Ngoo shau" myang bye: khyoo: yo' shoug" gyoo: bye: khyoo: joem wigi zei: zeing yoomo houg: moo nyhed nyid" nyid bye:.
Aseing gi Ezekela ri Zung" Lhoug Yug Khyo" Moo" Foin: To" da:.
(Eze 33:1-9)
16Hau: nyhed nyid" lid: lo" thang: ri Aseing ngoo ri dang: ji da:. 17Nyang: tid zigi «Shid: se' da" byu we"- Ngoo gi nang ri Israela byumyu" yi da" lhoug zung" su: bui" nhang: wa. Ngoo nang ri byid: to" da" tid poin" dang: ri nang nyangnu" ri tid kyoo" ca". 18Ngoo gi akhyeing" da" byu dayug yug shid: wa zi tid fu" nghoid loug we' nya: kangso' yo" khyoid yu wa shid re" nya: khyoo: joem ri thid pyam wa nyang: ri nang atid poin" loo: za: yooboo gung dayug khyo" nyang: shid: lo" nghoid rigi nyang: shid: da" moo" ngoo nang ri yoovoin yu nhang: wa. 19Nang gi hau: akhyeing" su: ri tid poin" loug nyang: yooboo koid nyid zi atheing: pyam loo: za: yooboo gung dayug khyo" nyang: shid: lo" nghoid rigi re" kangso' loid wa.
20«Gyeing" nyang:- gi su: dayug akhyeing" moo" ri koid shoid wigi ngoo gi nyang: ri gyoug ci' ca" joyoo moo nyhid: too" wa. Nang nyang: ri atid poin" nghoid rigi nyang: shid: loo" wa. Ngoo gi nyang: koid da" ge moo" ri amyid boin: byid: wa. Nyang: shid: da" moo" ngoo nang ri yoovoin yu nhang: wa. 21Nang gi byugi dayug ri yooboo akoid wa shid re" tid poin" wigi nyang: re" dang: ri tam" gyo: lho: yooboo akoid rigi yo" nyid shi" wa. Houg: lho: re" kangso' ri we' loid byoin nhang: wa» ga: tid.
Ezekela Dang: Ayo" tid wa.
22Ngoo gi yoem: so' gyi: da" Aseing shidkhoin" mo ju" nyid zi se' gyo: lho: nyang: ngoo ri tid ziri shau" gyo:. Hau: zigi «To' wigi janggyoin: khyoo: yhe: loo" we' ngoo hougmoo: nang ri dang: ji wa» ga: tid.
23Houg: yoomo ngoo gi janggyoin: khyoo: yhe: loo" bye:. Houg: moo Kheba gyid yam moo ngoo myang khoo' bye: te" da" Aseing phung" yoeb ri ngoo myang. Ngoo gi myidgung khyoo: goeb pid loo" bye:. 24Nghoid loug we' Mangso da" Venyi nga" jhang vang lo wigi ngoo ri tu: to' kaid da:. Aseing ngoo ri «Yhoem: khyoo: lo" wigi nanya: gung ri yhoem: khoug: moo lo" myhid" lhung too" we'. 25Shid: se' da" byu we"- nanya: gung ri tei" yo' tei" wigi shava phung: khyoo: ayo" thu yhi: wa. 26He: thougtheung da" byumyu" yiri nang ayo" tid poin" wa shid re" ngoo gi re" yhoo: ri ajoem: shid: nhang: wa. 27Hau: thang: ngoo nang ri dang: doem ji wigi dang: yo" ji wa yoem: so' nang ri doem byid: lang" nang gi ngoo yoem: moo" bo Aseing tid nyid ziri nyangnu" ri tid kyoo" wa zi nghoid. Nyangnu" dayham" gi tam" gyoo: nghoid loug we' dayham" gi nang ri cishu: anhang: wa. Ciwim ga: ri nyangnu" gi thougtheung da" byumyu" yi nghoid.
Currently Selected:
EZEKIEL 3: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.