THU' LO" MOUGSOUG" 40
40
Aseing Shidkhoin" Zoem" ri Koid wigi shugbyid: da" Khyoo:
1 Aseing gi Moshe ri 2«Aseing shidkhoin" zoem" ri lhammoo" dakhyab da" xang: shi" nyid" ri koid wa zi nghoid. 3Hau: akhoug: moo Dang: theing khoin" bo da" Dang: Theing Kuid: ri kaid too" wa nghoid wigi hau: shidkhoin" moo yabkyo' pain" ruang: too" wa zi nghoid. 4Zoobui" ri we' yu vang lo" wigi jonu" joem ri houg: moo to" too" wa zi nghoid. Myizeing ri we' yu vang lo" wigi houg: moo: myikug ke" too" wa zi nghoid. 5Nam pyo: xoin" nghe' wa shid re" Dang: Theing Kuid: shidkhoin" moo sheing: phoin: ri to" wigi zoem" khoem" duang: moo yabkyo' pain" ruang: ri lhang" too" wa zi nghoid. 6Zoem" da" shidkhoin" moo myi: nghe' xoin" ngei" wa shid re" phoin: to" too" wa zi nghoid. 7Zoem" yo' phoin: agyoo: moo cid" yung" cid" lho' jarung: ri to" to" wigi houg moo gyid kaid too" wa zi nghoid. 8Lheing khab' vang" khoem" kyam' wigi hau: vang" khoem" moo yabkyo' pain" ruang: lhang" too" wa zi nghoid.
9«Zoem" yo' jonu" dangain" jang" moo mainkaid xu: joid wigi shugbyid: lho: hau: zigi gyeung" shang: loo wa. 10Hau: thang: phoin: yo' houg: moo jonu" dangain" ziri mainkaid xu: joid wigi shugbyid: ge'. hau: zigi bain sho' gyeung" shang: wa zi nghoid. 11Cid" yung" cid" lho' jarung: yo' houg mo da" tang ri we' dakhyoo" ti" koid lho: shugbyid: we'
12«Arun yo' nya: zoo: yuggi zoo: yiri zoem" khoem" duang: khyoo: shu" lo wigi nyangnu" thung" ri: khyo" gung cid" byid: wa tid we'. 13Arun ri khainjung byimi foid- xu: joid byid: we' nyang: gi ngoo ri khainjung khyo" wigi yo" dei byid: wa shid re" nyang: ri hid: su" koid lho: shugbyid: we'. 14Nya: zoo: yiri shu" lo wigi nyangnu" ri byimi foid we'. 15Hau: thang: nyangnu" khainjung yi khyo" ngoo ri yo" dei byid: wa shid re" nang nya: ba" ri koid yhang: ti" nyangnu" ri mainkaid xu: joid byid: we'. He: mainkaid xu: joid byid: ziri ju" loo wa ayo, nyangnu" ri khainjung yi bui" nhang: loo wa» ga: tid.
16Moshe gi Aseing amyeing" byid: gu: dangain" ri koid bye: zi nghoid. 17Hougsu" yoomo Aseing da" zoem" ri nyangnu" Egutu mo thu lo thang: eig zain ein: zain lhammoo" dakhyab- xang: shi" nyid" ri koid too" bye: zi nghoid. 18Moshe gi akhyid: lugpyi" joem ri to"- seig khyam" zuang- keung: pyi: tab wigi zeing joem zhug bye:. 19Nyang: gi Aseing amyeing" dang: yo' dakhyoo" ti" zoem" mhang" moug: ri pei: wigi hau: atho' moo moug: too" bye: zi nghoid. 20Hau: thang: nyang: gi lugpyi" eig pyi" ri yu wigi hau: joem ri Dang: Theing Kuid: moo kaid bye:. Nyang: gi keung youg: joem ri koid: mo lo, zei: theing" khuang moo jhu: zei wigi hau: atho' moo amyhed" myhid" too" bye:. 21Hau: thang: nyang: gi koid: ri zoem" akhoug: moo to" wigi yabkyo' pain" ruang: ri khyo' lhang" too" bye:. Hougsu" khyo" wigi nyang: gi Dang: Theing Kuid: ri Aseing amyeing" dang: yo' dakhyoo" ti" go too" bye:.
22Nyang: gi zoobui" ri zoem" da" akhoug:- mougzhung: shoid- yabkyo' pain" ruang: da" nghi: moo to" wigi 23Aseing amyeing" dang: yo' dakhyoo" ti" hau: atho' moo Aseing ri xoin" to' wa da" zooyho' ri ke" too" bye:. 24Nyang: gi myizeing ri zoem" da" akhoug: zoobui" jo, ziyo' tu' tab nghoid da" mougpyi: shoid moo to" too" bye:. 25Aseing da" amyeing" dang: yo' dakhyoo" ti" nyang: gi Aseing shidkhoin" moo myikug joem ri tug too" bye:. 26Nyang: gi sheing: phoin: ri zoem" da" akhoug: yabkyo' pain" ruang: shidkhoin" moo to" wigi 27Aseing da" amyeing" dang: yo' dakhyoo" ti" nam pyo: ja: xoin" ri nghe' bye: zi nghoid. 28Nyang: gi zoem" khoem" duang: mo yabkyo' pain" ruang: ri lhang" wigi 29Hau: yabkyo' pain" ruang: shidkhoin" moo myi: nghe' xoin" ngei" wa shid re" nyang: gi phoin: ri too" bye:. Aseing da" amyeing" dang: yo' dakhyoo" ti" hau: atho' moo nyang: gi myi: nghe' xoin" yo' shivoo: xoin" ri ngei" byid: bye: zi nghoid. 30Nyang: gi cid" yung" cid" lho' jarung: ri zoem" yo' phoin: agyoo: moo to" wigi gyid kaid to" da:. 31-32Aseing da" amyeing" dang: yo' dakhyoo" ti" khanham nghoid nghoid- Moshe- Arun yo' nya: zoo: yi zoem" khoug: khyoo: nghoid nghoid- phoin: khyoo: nghoid nghoid vang lo" uri nyangnu" gi hougmoo: nyangnu" khyid: lo, cid" ago". 33Moshe gi zoem" yo' phoin: ri lheing khab' mo khyam: kyam' wigi vang" khyam: khoem" moo yabkyo' pain" ruang: lhang" da:. Hougsu" wigi nyang: gi moo" zoo" dangain" bain koid abye:.
Aseing Shidkhoin" Zoem" Atho' mo Jhoemmoug" Thei"
(Gys 9:15-23)
34Hau: thang: jhoemmoug" thei" gi zoem" ri nghoeb pyam lho: Aseing phung" yoeb gi hau: jang" moo byeung" sho' bang jo, da:. 35Houg: yoomo zoem" khoug: khyoo: Moshe gi ayo" vang loo" nghoid da:. 36Israela byumyu" yigi jhoemmoug" zoem" mo dang: do, loo" lang" nyangnu" dab mo gootu: joyoo khyoo: yhe: lo" boem ago". 37Jhoemmoug" hougmoo: dajo, jo, gi nyangnu" gi nyangnu" dab mo athu goo" nghoid da:. 38Nyangnu" da" gyung: khyoo: dangain" moo Aseing phung" yoeb jhoemmoug" pung ri nyid" gung lang" zoem" yhoemkhung: tho' moo jo, wigi myen" lang" hau: da" jang" moo myi: bang nyid zi yo" myang boem ago".
Currently Selected:
THU' LO" MOUGSOUG" 40: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.