THU' LO" MOUGSOUG" 39
39
Khainjung yi Shid re" Byimi Koid da" Khyoo:
(Thu 28:1-14)
1Gyeung" shang: joyoo khyoo: vang lo" uri void wa shid re" khainjung byimi ri nyangnu" gi mougnyoug void- khalham" void- ani void bo da" pain" yo' khyoeb ago". Aseing wigi Moshe ri amyeing" byid: to" ziyo' dakhyoo" ti" Arun shid re" nyangnu" gi khainjung byimi joem ri khyoeb bye: ago".
2Nyangnu" xoin" ngei" byizuang ri zin: yung" pain"- mougnyoug void- khalham" void- ani void bo da" khyeing: gi yo' sheing: ri kaid wigi yo, bye: da:. 3Nyangnu" gi mougnyoug void- khalham" void- ani void bo da" zin: yung" pain" gi moo yo" kaid wa shid re" sheing: ri baid pye" wigi poo" poo" shid yu lho: adu du phyed da:. 4Nyangnu" gi xoin" ngei" byizuang ri yo" tei" tab wa shid re" katho' mo tei" eig khaid ri koid wigi eig shoid goin" tei" tab to" da:. 5Aseing wigi Moshe ri amyeing" byid: to" ziyo' dakhyoo" ti" phyid" cu" ri we' du go" da" jonu" yo' koid wigi xoin" ngei" byizuang shoin" lho: daloem: kyeing" bui" sho' tab to" ago". 6Nyangnu" gi Unug lug adang moo Yaku da" nya: zoo: daxe: eig yug da" myeing ri thuang" lhid" wigi sheing: khu zoo: joem moo kaid to" da:. 7Nyangnu" gi Aseing wigi Moshe ri amyeing" byid: too" bye: ziyo' dakhyoo" ti" Israela byumyu" daxe: eig kung: da" asoo" khyo" wigi hau: lugboem joem ri xoin" ngei" byizuang ri tei" da" lo, sain: tei" moo tab to" da:.
Yanggang Nghoeb Koid da" Khyoo:
(Thu 28:15-30)
8Nyangnu" gi Yanggang nghoeb ri xoin" ngei" byizuang koid da" ziyo' dakhyoo" ti" khyeing: zi daja: yo' za: koid wigi za: yo' hau: ziri dakhyoo" ti" thoug" lho: koid ago". 9Hau: ziri sheing: khyoo: 9 lo, shi"- pyi: khyoo: 9 lo, shi" khyo" wigi dago" yi" koid lho: eig pug koid ago". 10Nyangnu" gi hau: adang moo phau" dab da" lug myid: khyoo" ri tab ago". Xang: shi" khyoo" moo patemya"- utaphaya- mya joem nghoid. 11Eig khyoo" ein: da" khyoo" moo gi lug ni- nila- sin joem nghoid. 12Soem" khyoo" ein: da" jang" moo gi vakintu- mahuya- thitun nila joem yo' 13Myid: khyoo" ein: da" jang" moo gi myed yue"- unug yo' nagathue joem nghoid. Hau: joem ri sheing: khu zoo: joem moo tab to" zi nghoid. 14Israela akung: daxe: eig kung: da" gungthid nghoid wa shid re" lug dacab moo myeing da cab khyo" Yaku da" nya: zoo: yi da" myeing ri lug daxe: eig cab' moo lhid" to" ago". 15Yanggang nghoeb shid re" nheug to" da" sheing: jangcoo" ri koid ago". 16Nyangnu" gi yanggang nghoeb tho' khyoo: azoin" eig loem: moo tab wa shid re" sheing: khoem azuang eig loem: yo' sheing: theing" eig loem: koid ago". 17Nyangnu" gi sheing: theing" eig loem: moo sheing: jangcoo" eig khaid yo' tei" to" ago". 18Houg: lho: gootu: athang: eig thang: rigi sheing: khoem azuang eig loem: tei" tab ago". Hougsu" wigi hau: ziri katho' shidkhoin" mo xoin" ngei" byizuang yo' xo' go" to" bye: zi nghoid. 19Nyangnu" gi sheing: theing" eig loem: koid wigi yanggang nghoeb da" vhoo: mo azoin" thang: eig thang: ri akhoug khyo" lho: xoin" ngei" byizuang yo' xo' too" bye:. 20Nyangnu" gi sheing: theing" eig loem: doem koid wigi hau: ziri xoin" ngei" byizuang shidkhoin" katho' tei" vho: du yo' ge da" phyid" cu" atho' khyoeb khyoo" nam moo xo' tab too" bye:. 21Aseing wigi Moshe ri amyeing" byid: to" ziyo' dayhang: ti" nyangnu" gi phyid" cu" atho' mo yanggang nghoeb gi ashu: loo" wa shid re" yanggang nghoeb moo dab da" theing" yo' xoin" ngei" byizuang moo dab da" theing" ri mougnyoug khyeing: wigi tei" to" ago".
Gootu: da" Khainjung Byimi Joem Koid da" Khyoo:
(Thu 28:31-43)
22Xoin" ngei" byizuang akhoug: mo byisheing: ri mougnyoug void khyeing: yo' koid ago". 23Vhuloem jhu: kaid wa shid re" aduang: phang wigi ajeig loo" wa shid re" gyibyi: yhang: ti" hau: aduang: azoin" cang wigi pain" yo' dung" to" ago". 24-26Aseing wigi Moshe ri amyeing" byid: to" ziyo' dayhang: ti" hau: athang: lheungkhab moo lamei shi" shicab yhang: te" mougnyoug void- khalham" void- ani void bo da" khyeing: yo' zin: yung" pain" gi yo' sheing: jhu: ri dacab kyoo: gi gi tab to" ago".
27Nyangnu" gi Arun yo' nya: zoo: yi da" byi: joem ri we' 28Vhuthoeb- mug- zin: yung" pain" loo" khya joem we' 29houg: lho: zin: yung" pain" gi mougnyoug void khyeing:- khalham" void khyeing: wigi za: yo' tuang to" da" phyid" cu" ri we' Aseing wigi Moshe ri amyeing" byid: to" ziyo' dayhang: ti" koid ago". 30Nyangnu" gi shugbyid: to" ziri gyeung" shang: da" asoo" khyo" sheing: gyeing" wigi sheing: zi daloem: koid lho: hau: atho' moo «Aseing ri shugbyid: to" da» ga: lhid" tab to". 31Aseing wigi Moshe ri amyeing" byid: to" ziyo' dayhang: ti" nyangnu" gi hau: ziri mougnyoug tei" yo' vhuthoeb shidkhoin" moo tei" to" ago".
Moo" zoo" Bain Koid Bye: Khyoo:
(Thu 35:10-19)
32 Aseing shidkhoin" zoem" koid da" moo" zoo" dangain" ri bain koid bye: ago". Aseing wigi Moshe ri amyeing" byid: to" ziyo' dayhang: ti" Israela byumyu" yi moo" zoo" dangain" ziri koid boem bye:. 33Nyangnu" gi zoem" yo' houg mo da" langhui" joem khyam: joem keungpyi: joem zeing joem akhyid: lugpyi" joem 34Ani xoug" to" da" yang yid mhang" moug:- ge da" shooyid mhang" moug:- yabkyo' pain" ruang: 35Lugpyi" joem kaid to" da" Dang: Theing Kuid:- houg: mo da" keung: youg: joem amyhed"- 36Zoobui" yo' houg: mo da" jonu" dangain" yo' Mangsoo ri xoin" ngei" wa shid re" zooyho' 37Sheing: myizeing- myikug joem houg: mo da" jonu" dangain" yo' myikug shid re" xu:- 38Sheing: phoin:- mainkaid xu:- nam pyo: ja: xoin"- zoem" da" khoem" duang: shid re" yabkyo' pain" ruang:. 39Gyid: mid" phoin: yo' houg: moo da" gyid: mid" kyang dain: joem keung: youg: joem houg mo da" jonu" dangain"- cid" shang: wa da" gyid jarung: yo' houg: mo da" azuang. 40Vang" khyam: shid re" yabkyo' pain" ruang: joem houg: mo da" zeing yo' akhyid: joem vang" khyam: khoem" shid re" yabkyo' pain" ruang: yo' houg: mo da" tei" joem zoem" sang" jham" yo' zoem" moo ci: ca" da" jonu" dangain". 41Khainjung yi gyeung" shang: joyoo moo moo" zei: wa uri void wa shid re" byimi joem khainjung Arun yo' nya: yuggi zoo: yi void wa shid re" gyeung" shang: byimi joem ri ci: yhi: bye:. 42Israela byumyu" yigi Aseing wigi Moshe ri amyeing" byid: to" da" ziyo' dakhyoo" ti" moo" zoo" dangain" ri bain koid bye:. 43Moshe gi Aseing amyeing" byid: to" ziyo' dakhyoo" ti" nyangnu" koid to" da" jonu" dangain" ziri cang yu" da:. Houg: yoomo nyangnu" ri Moshe mainkaid byid: bye:.
Currently Selected:
THU' LO" MOUGSOUG" 39: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.