2 SAMUELA 23
23
David da" Thang: Thang Mungdang:
1Yese da" nya: zoo: David gi Mangso wigi gyi: sheung: nhang: su: nghoid. Nyang: gi Yaku da" Mangsoo wigi khokham koid wa khyen: too" shoug" su: nghoid. Israela byumyu" yi shid re" pyo: da" jikhoin" joem ri lhid" su: nghoid da:. He: zigi David da" thang: thang mungdang: nghoid. 2Aseing Venyi gi nga" gung khyo" wigi dang: tid nyid. Nya: mungdang: nga" nhoid moo bo nyid da:.
3Israela Mangsoo dang: tid bye:.
Israela ri lhoug zung" su: gi ngoo ri
«Deingmain" ziyo' vhoeb khang" wigi
Mangsoo ri gyoug phoug" wigi tarha" nyeung veung" khyo" vhoeb khang" da" khokham gi
4Jhoemmoug" adab da" nab soin: ri zho: da" bid yo' moug: phang" thang: ri myo, gam joem ri kyi: nhang: da" bid yo' du nyid da» ga: tid.
5Athid wa da" dangsoo" yo' abyo, wa da" myid veing" khyoo: gi nyang: yo' ngoo apyaid atoo: dang: theing too" bye: yoomo Mangsoo gi nga" akung: ako'' yiri mainkaid byid: wa zi nghoid.
Hau: zi dangain" gi nga" myid vho: khyoo: nghoid.
Hau: zigi nga" oung: doid khyoo: nghoid wa ziyo'
Mangsoo gi gyeing" nyang: hau: ziri bui" nhang: wa zi nghoid.
6Nghoid loug we' Mangsoo ri anoku bang: gi
vi: khyoo: she: lhei" pyam da" zu: gam yo' du nyid da:.
Hau: joem ri dayug we' lo, cen: yo' zang" tain" wa zi anghoid.
7Hau: ziri tain" wa shid re" joto' jonu" anghoid lang" lham: dakhaid ci: ca"-
Hau: zu: gam joem gi bain sho' nghe' pyam wa zi nghoid.
David da" Myeing gyi: Gyizoo: yi
(1 Km 11:10-41)
8He: zigi David da" myeing gyi: gyizoo: yi da" myeing joem nghoid. Takhamoni akung: mo Yosheb Beshebed gi vhujhung: «Soem" yug» #23:8 goolheing mo dang: phug moo gi «Soem" yug» nghab youg soem" yug ein: yug. mo xang: shi" yug nghoid. Nyang: gi meing: zain: jang: daloem: moo za: nya: lham: yo' byu shid shoo: ri khaid zain: wigi nyangnu" dangain" ri said pyam bye: su: nghoid.
9Aho akung: mo Dodo da" nya: zoo: Eleaza gi myeing gyi: da" byu soem" yug mo eig yug ein: yug nghoid. Danyid" gi nyang: yo' meing: zain: wa shid re" zeing: foem: nyid da" Philisti byumyu" yiri pyi: yhe: shoo: bye:. Israela byumyu" yi nung zoid zoid phang: loo" nghoid loug we' 10Nyang: gi nya: joyoo moo yab jo, wigi nya: sham: ri ayo" zain: loo sho' lo, byeing byeing da" ayo, ju" sho' Philisti byumyu" yiri khaid zain: nyid da:. Hau: nyid" ri Aseing gi oung: pui" zeing byid: bye:. Hau: meing: bain zain: go" thang: ri Israela byumyu" yigi Eleaza nyid jang" khyoo: doem tau" yhe: wigi shid: mang mo gyimi gyibyi: joem ri khyoid yu boem bye:.
11Harari akung: mo Agee da" nya: zoo: Shamma gi myeing gyi: bang: soem" yug mo soem" yug ein: yug nghoid da:. Nug yoo jo, da" Lehi joyoo moo Philisti byumyu" yi zeing: foem: nyid boem ago". Philisti bang: jang" mo Israela byumyu" yi phang: byug nghoid loug we 12Shamma gi hau: yoo moo yab jo, wigi lhoem: khaid zain: ziyo' Philisti byumyu" yiri said pyam bye:. Hau: nyid" ri Aseing gi oung: pui" zeing byid: bye:.
13Byu soem" xi: mo soem" yug gi byang gain ju" lo nyid da" ayo, ri #23:13 ge nghoid wa da" ayo, gi gug yhoem" shid" lo" da" ayo, - David nyid da" Adulam lug-ug khyoo: gyoo" yhe: boem bye:. Hau: uri Philisti byu daphung: we' Rephim langkhoug: moo dab koid wigi nyid boem ago". 14Hau: uri David bouggung mo dab moo nyid wigi Philisti phung: bang: gi Bedlehem voogung ri yhe: zain: oung: yu pyam bye: ago". 15David gi nheig nge ziyo' «Byu dayug yug Bedlehem vang khyam: khoem" yam gyid thung" mo shug gyid ngoo ri lo kham: byid: wa ziri vho: ngei nyid» ga: tid. 16Myeing gyi: da" gyizoo: soem" yug gi Philisti dab khyoo: zain: vang yhe: wigi gyid thung" mo gyid dajhi' kham: ci: wigi David jang" khyoo: ci: loo" byid: bye:. Nghoid loug we' nyang: hau: ziri ashug loo: za: Aseing ri ngei" byid: wigi foid khyo' pyam lho: 17tid zigi «Aseing we" he: ziri ngoo khanham we' ashug loo wa. He: zigi nyangnu" kangso' ri ab byid: da" suid" ri shug ziyo' du» ga: tid.
Houg: yoomo nyang: gi shug wa shid re" he: pyam bye:.
Hau: zigi myeing gyi: da" gyizoo: soem" yug da" voem" koid da" moo" zoo" nghoid da:.
18Yoab da" nya: nhung" Abishai (Nya: tang: da" nya: yhid' gi Zeruia nghoid) gi «Myeing gyi: byu soem" xe:» da" vhujhung: nghoid. Nyang: gi byu soem" shoo: ri nya: lham: yo' khaid said wigi nyangnu" ri said pyam ziyo' hau: «Soem" xi:» #23:18 goolheing: mo dang: phug moo gi «Soem" xi: Hebre moo «Soem" yug» moo myeing gyi: su: bue" loo bye:. 19Nyang: gi hau: «Soem" xi:» #23:19 ge bue" zigi «Soem" xi:» Hebre moo gi «Soem" yug» moo myeing gyi: thang su: nghoid wigi nyangnu" vhujhung: bue" loo nghoid loug we' myeing gyi: da" «Soem" yug» yhi' gi abui" shi" nghoid da:.
20Kabzela voogung mo gootu: myeing gyi: da" gyizoo: dayug gi Yehoiada da" nya: zoo: Benania ga: su: nghoid. Nyang: koid lid lo da" seing" yang" moo" zoo" myoo" sho' nghoid jang" mo Moba gyizoo: lu: gi eig yug ri we' said pyam bye:. Dalheing: ri we' gyu: khyo' byeung" to" da" bidnyid moo duang: khuang" khyoo: vang yhe: lho: khangkhyi dadu: ri said pyam bye:. 21Nyang: gi lham: ci: da" Egutu byu yoem: moo" boo su: dayug ri we' said pyam bye:. Benania gi seig khyam" ci: lho: hau: Egutu byu da" lo, mo lham: ri lhoid yu wigi hau: lham: yo' nyang: ri said pyam bye:. 22He: zigi seing" yang" da" soem" xi: yug mo Benania ga: da" seing" yang" su: da" avoid asam" nghoid. 23Nyang: gi nyangnu" da" akhoug: moo je bui" nghoid loug we' seing" yang" soem" yug yhi' gi myeing agyi: nghoid da:. David gi nyang: ri nya: da" kangso' zung" moo" zoo" moo yoovoin yu nhang: bye:.
24-39Soem" xi: yug mo dayham" gi
Yoab da" nya: nhung" Asahela-
Bedlehem mo Dodo da" nya: zoo: Elhana-
Herod akung: mo Shamma yo' Elika-
Peled akung: mo Heleza-
Tekoa voomoo" mo Ikesha da" nya: zoo: Ira-
Anathod voomoo" mo Abieza-
Husha akung: mo Mebunai-
Ahohi akung: mo Zalmon-
Netopha akung: mo Maharai-
Gibea voogung mo Benyamin akung: mo Ribai da" nya: zoo: Itai-
Pirathon akung: mo Benaia-
Gasha nam moo jo, da" lang: khoug: mo Hidai-
Araba akung: mo Abialabon-
Bahurim akung: mo Azamave-
Shalabona akung: mo Eliaba-
Yashen da" yug gi zoo: yi-
Yonathan-
Hara akung: mo Shamma-
Hara akung: mo Shara nya: zoo: Ahiam-
Makha akung: mo Ahabai nya: zoo: Elipheled-
Hilo akung: mo Ahithophela da" nya: zoo: Eliam-
Kharmela akung: mo Hezro-
Arab akung: mo Parai-
Zoba voomoo" mo Nathan nya: zoo: Igala-
Gad akung: mo Bani-
Amon akung: mo Zeleg-
Yoab da" gyibyi: gyimi ci: byid: su:-
Bero akung: mo Naharai-
Yatira akung: mo Ira yo' Gareb-
Hiti byu Uria bang: nghoid.
Seing" yang" da" gyizoo: yi dangain" ri soem" xe: nyhed yug nghoid.
Lacid Bible © Bible Society of Myanmar, 2009.