2 SAMUELA 22
22
David da" Oung: Doid Jihkoin"
(Cng 18)
1 Aseing gi David ri Sholu yo' nya: da" gootu: gyivoo joem lo, mo khyoid uri David gi he: jikhoin" yo' Aseing ri coung" bye:.
2 Aseing gi ngoo ri lhoug zung" su nghoid.
Nyang: gi yoem: gyi: da" nga" gyidab nghoid.
3Nga" Mangsoo gi ngoo khoug: nghi: jang: nghoid.
Nyang: yo' dage" ngoo goem loem nyid.
Nyang: gi ngoo ri goo yhang: ti" goo byid:
Nyang: gi ngoo ri lhoug zung" ziyo' goem loem nyid nhang: da:.
Nyang: gi ngoo ri khyoid yu su: nghoid.
Nyang: gi ngoo ri pyi: joem: sho: khaid said jang" mo
lhoug zung" ziyo' goem loem byid: su: nghoid.
4Ngoo gi Aseing ri mho' yoid- nyang: gi
ngoo ri gyivoo joem da" lo, mo khyoid yu
nyang: gi coung" nghei byid: zi shoug" moin: nyid.
5Gyug pho" shid: gyoin gi ngoo ri: dangain" lheung khoem to"-
lhu: phyo' pyam wa da" beung: mhoid joem gi
nga" atho' moo: doin: lhoem" too" bye:.
6Gyug pho" shid: gyoin gi ngoo ri lheung khoem too" bye:.
Loeb duang: gi nga" shid re" gyoin: kham: to" abye:.
7Ngoo gi nga" kyi" khyeug khoug: mo Aseing ri yoid bye:.
Ngoo ri pang" yu wa shid re" nga" Mangsoo ri ngoo yoid bye:.
Mangsoo gi Noku Yhoem: Moo" khoug: mo nga" thui: ri shoug" gyoo: bye:.
Pang" thug wa shid re" ngoo ngau yoid thui: ri nyang: tam" gyoo: byid: bye:.
8Houg: lang" Mangsoo nheug yo: wigi mougmyid gi nain" lho: lei" loo bye:.
Boem joem we' apoem: mo nyang: yoid yoid ga: wim lho: lei" nyid.
9Nya: nhoo: duang: mo myi: khoug" nghoid loug we'
nya: nhoid mo nge" dab, nyid da" myiyham: yo' myigyu: joem ri: moid thu' kaid nyid.
10Nyang: gi mougkhung: ri lang: khyo' kaid lho:
ceug yo' no, da" jhoemmoug" thei" ri nya: khoovoo: khau: moo: kaid ci: lho: nyang: gyoo" lo.
11Nyang: gi dung dab gougnyhoug tho' moo: zhung: lho: gye" myab, sho' dang: lo.
Nyang: gi lid zoo" dung soo" yo' gyung: so" lo.
12Nyang: gi nya: gung ri moug: coid yo' nghoeb too" nhang:-
gyid byeung" sho' bo da" joem" moug" yo' nyang: ri lheung khoem to" nhang: nyid.
13Nya: da" shidkhoin" mo leug voo yo' myiyham: joem gi
lhab' myeug nyid jang" mo thu lo lho:
teung: no, da" jhoemmoug: khoug: mo kyang thu lo.
14Houg: lang" Aseing gi mougkhung: khyo" moug: goem: myeung thui: yo'
myeung thu lo lho: myhang: thang su: da" thui: ri shoug" gyo.
15Nyang: gi myoo: ri beug tang" kaid nyid wigi gyivoo joem ri byo sain" loo" nhang:.
Lhab' ri myeug nhang: lho: wigi nyangnu" ri phang: thu loo" nhang:.
16 Aseing we" nang gi gyivoo joem ri gyi koid lho: nyangnu" ri nheug khoo" yo: nhain' nyid da" uri
panglai: gyid thoem" thi" gi akoem: bue" lo" byug bye:.
Mougmyid da" apoem: ayang: gi yhoin" thu' lo nyid bye:.
17 Aseing gi tho mo lo, yhoin" kaid lho ngoo ri zei: ci: wigi
gyid no, thoem" thi" mo ngoo ri she: thu' yu bye:.
18Nyang: gi yoem: bo da" gyivoo joem lo, mo nghoid loug we'-
yoem: moo" bo lho: ngoo ri ngheing" bang: dangain" mo, da" lo, mo we' khyoid yu bye:.
19Ngoo kyi" khyeug shoug" nyid da" bidnyid moo nyangnu" gi ngoo ri khaid zain: lo nyid boem.
Nghoid loug we' Aseing gi: ngoo ri lhoug zung" goem coung: byid: nyid.
20Nyang: gi ngoo ri gyoug dain khoug: mo pyoin yu bye:.
Nyang: gi ngoo ri jheddab vho: ngei nyid yoomo khyoid yu bye:.
21Ngoo gi deung byeing su: nghoid yoomo Aseing gi ngoo ri ngi: shab jhungshug byid: bye:.
Ngoo gi ce: yooboo adab su: nghoid yoomo nyang: gi ngoo ri mainkaid byid: bye:.
22Ngoo gi Aseing da" tarha" ri cang loo bye:-
nga" Mangso jang" mo aphang: loo" yu".
23Ngoo gi nya: da" tarha" bain sho' ri zoem: ci:-
nya: da" dangsoo" khoin" ri we' angeug pyam.
24Ngoo ce: yooboo ayoo" su: nghoid ziri we' yooboo joem ri
jang" pyam' nyid su: nghoid ziri we' nyang: se' nyid.
25Ngoo gi deing byeung" su: nghoid yoomo we'
ngoo gi ce: yooboo ayoo" su: nghoid ziri si' yoomo we'
nyang: gi ngoo ri ngi: shab jhungshug byid.
26Nang gi nheigloem: zung" mo, tho' moo nheigloem: zung" nyid.
Ce" yooboo foin: cang aboo mo, da" atho' moo lo" thang sho' ge nyid.
27Nang gi nheigloem: phyu: mo, ri nheigloem: phyu: khyo" koid.
Nghoid loug we' akhyeing" mo, rigi gyi koid nyid.
28Nang gi nheigloem: nyhoem: khyoo' mo, ri khyoid yu nyid.
Nghoid loug we' nghoid boin: nyid mo, ri koem gi doin: khyo' pyam nyid.
29O" Aseing we" nang gi ngoo ri bid bang byid: nyid.
Nga" da" moug: coid ri bei: loo" nhang: nyid.
30Nang gi gyivoo joem yo' zain: goo" wa da" yoem: so' we'
Nyangnu" da" dab zeing ri phyo' pyam wa da" yoem: vhoo" ri we' ngoo ri byid: nyid.
31He: Mangsoo koid da" moo" zoo" joem gi gye" joeb byeung" nyid.
Nya: dangsoo" khoin" joem we' loem ge" nyid.
Nyang: gi nyang: ri loem khau: loo mo, dangain" shid re" goo yhang: ti" nghoid.
32 Aseing kyeing" za: Mangsoo nghoid- Mangsoo kyeing" za:
ngoonu" da" gyidab nghoid.
33Nyang: gi ngoo ri yoem: boo nhang: da" Mangsoo nghoid.
Nyang: gi gau: da" khyoo: ngoo ri soin' byid: nyid.
34Nyang: gi nga" da" khyid: ri xaid khyid: yhang: ti" geung: teung nhang: nyid.
Nyang: gi ngoo ri boem tho' moo gau: nyu: nhang: nyid.
35Gye" kyung: da" lid: gi gyipui" moo: yo" yhung: wa shid re"
nang gi ngoo ri jhau" byid.
36Nang gi ngoo ri lhoug zung" goem coung: khyoid yu nyid.
Re" da" yu" goem khyoo: gi ngoo ri gyi: myhang: loo nhang: bye:.
Re" da" yoem: so' gi ngoo ri gau: nyu: nhang: nyid.
37Nang gi ngoo ri subi" hang" we' ayo" re" myheug: loo" sho' lhoug zung" byid: yoomo
ngoo gi khanham we' gyoeb gyo" loo" wa khyoo: ajo.
38Ngoo gi nga" gyivoo joem ri cang khaid lho: zain: oung: yu bye:.
Nyangnu" ri yo" mhoin' pyam jang" moo: ju" sho' ayab atheing: loo.
39Ngoo gi nyangnu" ri yo" mhoin pyam yoomo nyangnu" gi ayo" to' yab boem loo.
Nyangnu" gi nga" shidkhoin" moo: soem" leung jo, boem abye: go".
40Nga" gyivoo joem ri oung: pyam lho: meing: yo" zain: wa shid re"
nang ngoo ri yoem: vhoo" byid: nyid.
41nang gi nga" shidkhoin" mo gyivoo joem ri phang: thu loo" nhang: bye:.
Ngoo we' ngoo ri ngheing" bang: ri mhoin' pyam bye:.
42Nyangnu" gi pang" thoug yu wa shid re yoid nyho: nyid boem nghoid loug we
nyangnu" ri hang" we' akhyoid yu boem.
Nyangnu" gi Aseing ri yoid nghoid loug we nyang: gi nyangnu" ri atu" byid.
43Lid hau' tang" lo da" pheipyang" yhang: ti" bue" loo" wa shid re"
nyangnu" ri ngoo mhoin' pyam bye:.
Khyoogung mo thoem" boeb, ri yhang: ti" nyangnu" tho' moo: ngoo nang: pye" pyam bye:.
44Nang gi ngoo ri thougtheung lo da" mung" byu lo, mo khyoid yu lho:
byumyu" bain sho' tho' moo ngoo ri vhoebkhang" nhang: bye:.
Ngoo gi ngoonyang: ase' da" byumyu" yiri akhid" vhoebkhang" wa da" amyeing" yo" jo, bye:.
45Tungbau byumyu" yigi nga" shidkhoin" moo: vhu' pid goeb pid to" ago".
Nyangnu" gi nga" amyeing" shoug" gyoo: lang" cang lo ago".
46Nyangnu" gi sarhi' anghoid byug loo: yoomo nyangnu" da" gyidab khoug: mo
gyoug nain" thu' lo" byug boem abye:.
47 Aseing gi dei nyid su: nghoid- nyang: ri lhoug zung" nyid su: ri coung" nghei ge'.
Ngoo ri: khyoid yu da" Mangso gyi: thang khyoo: ri nyho: fu" nyid ge'.
48Nyang: gi ngoo ri nga" gyivoo joem da" tho' moo oung: loo" nhang: bye:.
Byumyu" yiri nga" da" lo, zhoeb khoug: moo: vang loo nhang: lho: wigi
49Gyivoo joem da" lo, mo ngoo ri khyoid yu.
O" Aseing we" nang gi ngoo ri nga" gyivoo joem ri
oung: loo" nhang: lho: wigi akhyeung" byu yi da" gyi mo ngoo ri goem coung: yu bye:.
50Hougsu" nghoid yoomo ngoo gi byumyu" bain sho' mo, da" shidkhoin" mo nang ri coung" nghei nyid.
Ngoo gi nang ri jikhoin" myeing" khyo" coung" nghei nyid.
51Mangsoo gi nya: khokham ri gyi" sho' da" oung: doid lo" khyoo: byid: bye:.
Nyang: gi nyang: khyen: yu to" da" David yo' nyang: byukung: byuko' yiri
pyaid moo: too: moo: jheddab nheigloem: toin" shed nyid.
Lacid Bible © Bible Society of Myanmar, 2009.