2~KORINTHU 13

Lo" Thang Moo Lhid" Nhang: Ziyo' Vhu" Kaid Dang:

1Akhid" ngoo gi nanu" jang" moo soem" lheung: eing: doem ju" ri wa zi nghoid. Jhoem: mungdang: moo we' Yooboo foin: ti" khyoo: daja: ja: bo ri bose' da" sagse eig yug - hougsu" anghoid lang" eig yug mo jan" mo, da" dang: yo' geung: teung jo, nhang: wa nghoid, ga: wigi tid to. 2shid phyang" yoobo koid lid lo yu" bye: mo, yo' katu: dangain" ri ngoo tid nau nyid. Hau: khyoo: ri shid phyang: ngoo eig.lheung: lheung: ju" re" uri tid bye: ziyo' dakyoo" ti"- Akhid" nanu" yo' we: gang: nyid uri we' ngo dalheung: doem tid shi" wa. hau: khyoo: gi thang: lheung: ri ngoo doem ju" re" uri nanu" dayug we' dang: phyed shen" yhen: jang" mo yo" loid goo" wa zi anghoid. 3Khristu gi ngoo moo dang: tid to" khyoo:- sagsi: joem ri nanu' vho" myhoo, shau" myang boem wa nghoid.Khristu gi nanu" yo' xo' tei" moozoo" zei: lo" uri nyang: gi yoem: nu: nyid su: anghoid. nya: da" yoem: vhoo" so' moo" gi-nanu" moo toin' shed, loo wa nghoid. 4Khasu" wim gari Aseing: gi pyang" zeung moo baid jen" said to" uri yoem: neung: jang" moo ju" nghoid loug we' akhid" gi Mangso yoem: moo" phung" yoeb khoug: moo dei nyid bye Nyang: we" Khristu yo' dayug za: nghoid nyid boem yoomo yoem: neung: nyid boem- nghoid sho. loug we' nanu" moo bo da" yoem: moo" so' zeing yoomo ngoonu" nyang: yo' dage" dei nyid boem wa nghoid.

5Nanu" gi hau: loem" jeung" khyoo: moo kangso' dei nyid mo, nghoid la". anghoid la". yo" myang si' wa shid re" nyang: nya: gungdu: ri myid: phoid sho: yu" nyid ge'. Nanu" bain sho" soem" joem: loo" mo, anghoid rigi Khristu Yesu nanu" yo' nyid nyid da" khyoo: ri nanu" gyeng" nyang: yo" se' loo wa zi nghoid. 6Nanu" gi gyo" soem: pyam mo, anghoid ziri" nanu" nyang: si' mo, nghoid go" wa ein: ngoo =myid loem nyid. 7Nanu" gi yooboo adoem koid wa shid re" ngoonu" gi Mangso jang" moo akyu" mho' nyid boem. hau: zigi ngoonu" jham" ca: yu" khyoo: ri oung: loo" wa shid re" toin" shid khyoo: anghoid. ngoonu" koem gi gyo" soem" pyam mo yhang: ti" nghoid loug we' nanu" deungmain" khyo" koid nyid wa shid re" damho, byid: nyid. 8Khasu" wim gari ngoonu" gi deungmain" khyoo: yo' shai" khyoo: gi ci" we' akoid mo, nghoid. Deungmain" shoid khyoo: za: dayab boem. 9Hougsu" ngoonu yoem: neung: nyid wigi nanu" gi yoem: bo nyid rigi ngoonu" gye" ngeibu gau yi boem. Houg: yhang: ti" nanu" joeb byeung" bang: bue" loo wa shid re" we' ngoonu" akyu" damho, nyid. 10Nanu" yo' ve: lain nyid uri ngoo he: da" mougsoug" ri lhid" da" khyoo: gi ngoo nanu" jang" moo ju" re" uri Aseing: ngoori byid: to" da" myeung" akhang" gi nanu" ri lhu: phyo' pyam wa shid mo anghoid. Nanu" ri so' koid so' nyheung wa shid re" nghoid.

11Nga mang nhung" yi we"- akhid" ngoonu" vhu" kaid boem. Nanu" dangain" bang: ngei pyo: nyid goo" baja" o". Joeb joeb byeung" byeng" yo" bue" nyid sho' xo' lho: yoem: kaid thoug shang nyid ge". Nga" mho' nyhoem: dang: ri tam" gyo: wigi nanu" nyang: cang" ving" go" lho: ngei pyo: myen jham nyid ge'. Jheddab e" myed bo ziyo' ngei pyoo: nhang: da" Mangsoo gi nanu" yo' dage" danyid nyid baja" o".

12Nanu" nyang: cang"- nya: bi: nya: no, su" san sen" ziyo'

boobug bug go" nyid ge". Mangso da" byu yi dangain" bang: gi nanu" ri vhu" kaid ago".

13 Aseing Yesu Khristu da" akyu" jeju"- Phoo, Mangso da" athang agoin jheddab we" myed yo' gyeungshang: Venyi da" zoem" khau: khyoo: gi nanu" dangain" bang: yo' dage" dajo, jo, baja" o".

Currently Selected:

2~KORINTHU 13: LCL

Highlight

Copy

Compare