SAAM HLABU 9
9
A Dingnak Ruangah Pathian Thangṭhatnak #David Ih Phuahmi Hla
1Maw Bawipa, ka thinlung
zatein nangmah cu ka lo cawimawi
ding,
Mangbangza na tuahmi ka sim ding.
2Nangmah ih ruangah lungawi zetin
hla ka sak ding,
Maw Cungnungbik, na hnenah thang
ṭhatnak hla ka sak ding.
3Nangmah na lang tikah ka ral
pawl cu an kir sal,
An ril ih an thi.
4A dingmi thuṭhentu na si ih
na tokham parah na to;
Keimah ṭan in thu na ṭhen a si.
5Pathian thei lo miphun pawl na
hnong ih,
Mi ṭha lo pawl cu na siatsuah
hai a si.
Annih cu kumkhua in an hloralta
ding.
6In dotu kan ral pawl an cem
thlata ih theih an si nawn lo,
An khawpi pawl cu
na ṭhio ṭheh ih,
Theih sal ding an si nawn lo.
7Sikhalsehla Bawipa cu
kumkhua in siangpahrang a si.
Thuṭhen dingah a siangpahrang
tokham parah a to.
8Leilung pumpi cu dingnak thawn
a uk ih,
ṭan bulmi nei loin mi hmuahhmuah
ih thu a ṭhen.
9Neh-nen hremnak a tuartu hrangah
Bawipa cu relhnak ralhruang
a si.
Harsatnak caanah himnak ralhruang
a si.
10Maw Bawipa, na hmin a lo
theitu cun an lo rinsan ding,
Ziangahtile na hnenih a rami cu
Na dungtun dah lo.
11Zion ihsin uktu Bawipa ih
hnenah thangṭhatnak hla sak uh.
A thil tuahmi cu mi hmuahhmuah
hnenah sim uh.
12Mi zonzai pawl ih tuarnak cu
Pathian in a thei,
An ai-hramnak cu a hngilh dah lo;
Curuangah thisen a luantertu pawl
parah phu a lak.
13 Bawipa, i zaangfah hram aw.
I huatu pawl ih in tisiatnak hi
hmu hram aw.
Maw Bawipa, thihnak ihsin
i runsuak hram awla.
14Jerusalem khawsungmi pawl
hmaiah ding tahratin,
Nangmah ka lo cawimawinak thuhla
pawl hi ka sim ding.
I runsuak ruangah lungawi thu
ka sim ding.
15Pathian thei lo miphun pawl cu
anmah ih laihmi khurah an tla;
Thang an kam ih anmah an awk aw.
16 Bawipa cu a dingmi
a thuṭhennak in a lang awter;
Asinain mi ṭha lo pawl cu anmah
ih tuahmi lala ah an awk-aw a si.
17Mi ṭha lo pawl le Pathian
a dungtuntu miphun pawl ih lamzin
netnak cu thihnak Sheol a si.
18Asinain mi farah pawl thlauthlak
ringring an si lo ding ih,
Mi rethei pawl ih beiseinak cu
kumkhua in namthlak a si lo ding.
19Maw Bawipa tho thlang aw;
Minung in nangmah dodal in
tluangkhawng nawn hlah hai seh.
Miphun hmuahhmuah cu na hmai ah
kokhawm awla, an thu cu ṭhen aw.
20Maw Bawipa, an thin
phangter aw;
Mihring meen an si kha theiter
hai aw.
Currently Selected:
SAAM HLABU 9: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
