SAAM HLABU 10
10
Dingnak Hrang Thlacamnak
1Maw Bawipa, ziangah so hlapi
ih na um ringring?
Ziangah so kan harsat caan ah
in relhsan ṭheu?
2Mi ṭha lo pawl an puarthau ih
Mi farah pawl an neh-nen, an hrem.
Anmah ih kam ciami thang ah
awk-aw hram hai seh.
3Mi ṭha lo in a ruahnak ṭha lo
kha a uanpi zet ih,
Mi duhham in Bawipa cu
a cam ih a hnong.
4Mi ṭha lo in Bawipa cu
zianghman ah a siar lo,
“Pathian cun i hmu zik lo,” tiah
puarthau in a ti.
A ruahnak hmuahhmuah ah,
“Pathian a um lo,” tihi a si.
5Mi ṭha lo cu a thil tuahmi
hmuahhmuah ah a hlawhtling;
Pathian ih thuṭhennak cu
a theih banmi a si lo.
A ral pawl tla a hnihsan meen.
6A thinlung te cun, “Ka tlasam
dah lo ding;
Ziangtik hmanah vansaannak ka tong
lo ding,” a ti.
7A kaa cu camnak, thuphan pernak
le midang hronak lawngin a khat;
Midang huat zawng le ṭongsia
ṭong dingah a lei cu a zamrang
zet.
8Khawkip ah a relhthup aw;
Cutawk mi a bawhnak ihsin misual
lo tla a that.
Bawmtu nei lo mi vanduai pawl kha
a thupte in a thlingthla ziar a si.
9Kiosa bangin a thuh awknak hmun
ihsin mi a bawh;
A thah dingmi pawl a bawh a si.
A thang in a awk ih a thiarhlo.
10Zianghman tithei lo pawl thah
an tuar;
Thacak pawl in an bawh, an peel,
an hrual neknek hai a si.
11Mi ṭha lo cun, “Pathian in
minung cu zianghman ah a siar lo.
A mit a siing zo ih i hmu dah lo
ding,” a ti.
12Maw Bawipa, tho awla
mi ṭha lo pawl hi nor hai aw;
Maw Pathian, harsatnak a tuartu
pawl tla hngilh hlah aw.
13Ziangtin so mi ṭha lo in
Pathian a hmuhsuam ih,
“Pathian cun i hrem lo ding,”
a ti thei?
14Sikhalsehla nang cun na hmu a si;
An tuarnak le an riahsiatnak cu
na hmu ih,
Anmah bawm dingah na khul a fung
dah lo.
Zianghman tithei lotu in na hnen
ah a nunnak a pek;
Ngakṭah pawl bawmtu cu nangmah
na si ṭheu.
15Misual le mi ṭha lo pawl ih
cahnak thazaang khiak thluh aw;
An sualnak ruangah hrem hai awla,
ṭhat lonak a reh tiangin hawl
suak hai aw.
16 Bawipa cu kumkhua in
siangpahrang a si.
Curuangah Pathian thei lo pawl cu
A ram sungih sin an hloral ding.
17Maw Bawipa, thinlung nemmi
ih saduhthah cu na thei;
Cule an thinlung na cakter ih
an thlacamnak na thei.
18Milai in ṭihphannak an suahter
nawn lonak dingah,
Ngakṭah farah pawl le neh-nenmi
pawl ih aunak cu theihsak awla,
anmah ṭan in thu ṭhen hram aw.
Currently Selected:
SAAM HLABU 10: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
