MIPUM SIARNAK 6
6
Nazir Thukamnak Tuahtu Pawl Hrangih Daan
1 Bawipa in Moses hnenah, 2a tanglam daan pawl cu Israel mi pawl hrangah a pek. Mipa siseh, nunau siseh, a hlei ih pumpe-awmi Nazir si dingah thukamnak a tuah ih Bawipa hnenah pe-aw in a hrante ih a um sungah cun, 3Sabit le zu a dai lo pei. Sabit rah ih tuahmi sabitti siseh, sabit zu siseh, ziang hman a in lo pei; sabit rah cu a hring in siseh, a car in siseh, a ei lo pei. 4Nazir a si sung hmuahhmuah ah sabit kung ihsin ngahmi pohpoh, a mu le a rah le a hawng tiangin, a ei lo pei.
5Nazir thukamnak thuaiih a um sung hmuahhmuah a sam a met lo pei ih a hmurhmul siseh, a khahmul siseh, a met lo pei. Bawipa hnenih a pumpek thukamnak in a kaihrem sung hmuahhmuah a sam le a khahmul a zuah pei. 6Miruak kiangah a feh lo pei. 7A nu a pa, a u a nau ih ruak a si hmanah a naih lo pei. Miruak kiangah feh tahrat in a borhhlawh-awter lo pei; Bawipa hnenih a pumpeknak hminsinnak cu a sam le a hmul a si. 8Nazir a si sung hmuahhmuah Bawipa ih hnenah a thianghlim a si.
9Mi pakhat rin lopi in Nazir kiangte-ah a thi ih Nazir ih sam a borhhlawhter a si ahcun ni sarih sung a hngak hnuah a sam le a khahmul pawl cu a met pei; cuticun a borhhlawhnak in a thiang ding. 10Ni riat ni ah thuro pahnih, a si lole laileng pahnih, puithiam hnenah Bawipa umnak Puanthlam sangka ah a rak keng pei. 11Puithiam in thuro pakhat cu sualthlah thawinakah a pek pei ih a dang pakhat cu mei-ur thawinakah a pek pei. Cuticun miruak a dai pang ruangih sualthlahnak cu puithiam in a tuah pei. Cuih ni ah a lu cu a thianghlimter sal ding ih, 12Nazir si dingah a pum cu Bawipa ih hnenah a pek sal pei. A rak thianhlimter ciami a sam cu a borhhlawhter ruangah a cuih hlanih a tikcu hmuahhmuah cu a lak a si thluh. Cule mawhnak thawinakah kum khat ti tuucangte pakhat a keng pei.
13Nazir sinak thukammi tikcu a cem tikah a tanglam thawinak a tuah pei. Puanthlam sangka ah a feh pei ih, 14raitluan ṭilva pathum Bawipa ih hnenah a pek pei: mei-ur thawinak hrangah kum khat ti tuucangte pakhat, sualthlah thawinak hrangah kum khat ti tuula pakhat le, remnak thawinak hrangah tuucang pakhat a pek pei. 15Cuih tlunah thilnu tel lo sang bawm khat: olif siti thawn rawi tahratih tuahmi sang sah zet pawl, a paa zetih olif siti hnihmi sang pawl le a ṭulmi thlairawl thawinak le inmi thawinak pawl a pek pei.
16Cupawl cu puithiam in Bawipa ih hnenah a keng pei ih sualthlah thawinak le mei-ur thawinak pawl cu a pek pei. 17Bawipa hnenih remnak thawinak hrangah tuucang pakhat le sang bawm khat khal a pek pei ih thlairawl thawinak le inmi thawinak khal a pek pei. 18Nazir cun Puanthlam sangka ah a sam cu a met pei ih remnak thawinak an urnak meisa-ah a sam cu a va paih pei.
19Cun puithiam in an suanmi tuucang ih a liangsa a lak pei ih thilnu tel lo a sahzetmi sang le bawm sungih sang paazet thawn Nazir ih kut sung ahcun a ret pei. 20Cuih hnuah puithiam in Bawipa ih hnenah a pek pei; hi pekmi pawl cu puithiam hrangah laksawng thianghlim an si ih, tuucang ih cawn le ir thawn puithiam ih co ding hrimhrim an si. Cuih hnuah Nazir cun sabitti a in thei ding.
21A tlunih daan pawl cu Nazir pawl hrangah an si; asinain Nazir pakhatkhat in a ṭulmi hnakih tam sawn pek dingin thu a kam a si ahcun a thukammi vekin a thlun fekfek thluh pei.
Puithiam Thlawsuahnak
22 Bawipa in Moses hnenah thu a pek ih, 23“Aaron le a fapa pawl in Israel mi pawl thlawsuahnak an pek tikah a thuailam bangtuk in:
24‘Bawipa in lo thlawsuah in lo kilveng hram seh,
25 Bawipa cu nan parah zaangfahnak le lainatnak nei hram seh,
26 Bawipa in a mithmai ṭha lo pe in daihnak lo pe hram seh,’ an ti pei.
27 Bawipa ih hnenah Israel mi hrangih thla an cam tikah hi thlawsuah peknak hi an hman a si ahcun Bawipa in a thlawsuah hai ding a si,” tiah a ti.
Currently Selected:
MIPUM SIARNAK 6: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
