MIPUM SIARNAK 5
5
Mithiangfai Lo Pawl
1 Bawipa in Moses hnenah, 2“Israel mi pawl in anmah lakih phaarnat a tuarmi le a thihnai a dokmi le miruak a dai ruangih a thiangfai lomi hmuahhmuah cu an riahnak hmun ihsin an dawi thluh pei. 3An hnenih ka umnak an riahnak hmun cu an balhter lonak dingah a thiangfai lomi hmuahhmuah cu nunau siseh, mipa siseh, dawi thluh hai seh,” tiah thu a pek. 4Bawipa ih thupek bangtuk in Israel mi pawl cun an thlun ih mi thiangfai lo pawl cu an riahnak ihsin an dawi thluh.
Sual Ruangih Kuansalnak
5 Bawipa in Moses hnenah 6a tanglamih daan pawl cu Israel mi pawl hrangah a pek. Mipa siseh, nunau siseh, midang parah sualnak tuah tahrat in Bawipa hmaiah rintlak lo a si ahcun, 7a sualnak cu a phuang pei ih a tisual man cu cupa hnenah kimte in a kuan hlei ah zateek kul a beet pei. 8Sikhalsehla a tuahmawhmi cu a thi ih a kuanmi saangtu dingah sungkhat suahpi zohman a neih lo a si ahcun puithiam ih hman dingah Bawipa ih hnenah a pek pei. Hi pekmi cu sualthlah thawinak hrangih tuucang a pekmi hlei ah beetmi a si pei. 9Cun Israel mi pawl in Bawipa ih hnenah a hleice ih thawinak an pekmi pohpoh cu a rak saangtu puithiam ih ta a si pei. 10Puithiam poh in a hnenih an pekmi laksawng cu a co pei.
Nupi Parih Lunghrinnak
11 Bawipa in Moses hnenah, 12a tanglam daan pawl cu Israel mi hrangah a pek. Pasal neimi nunau in mipa dang thawn a sual ih miborhhlawh ah a cang; 13asinain a sual cu phuang loin a thup ringring; a sual lai an kai lo ih a hmutu le an um fawn lo naón a pasal cun zum lonak a nei ih a nupi parah a lung a hring ringring. 14Culole a nupi cun sualnak zianghman a tuah lo naón a pasal in a zum lo. A nupi a thiik ruangih zum lo meen a rak si. 15Ziangziang a si khalle hi bangtuk ih thu a um ahcun a pasal in a nupi cu puithiam hnenah a fehpi pei. Thlairawl thawinak hrangih a ṭulmi barli sangvut cuai hrek a keng pei ih thawinak a pek pei. Asinain olif siti le frankincense rimhmui cu a toih lo pei. Ziangahtile himi cu lunghringtu a pasal in thudik theih duh ruangih a pekmi thawinak a si.
16Puithiam in cuih nunau nu cu biakṭheng hmaiah a suahpi pei ih Bawipa ih hmai ahcun a dingter pei. 17Cun puithiam in tlak beel pakhat a lak pei ih a sungah tidai thiangfai tawkfang a ret pei; cule Bawipa umnak Puanthlam sungih leivut a lak pei ih, tidai cu khaa dingin, tidai ah a phulh pei. 18Cuih hnuah puithiam in nunau nuih samtom a phoih pei ih nunau nuih kut sungah thawinak sangvut a ret pei. Amah puithiam in siatserhnak thlentertu tidai cu a beel in a keng pei. 19Cule puithiam in nunau nu cu, “Mipa dang thawn na sual lo a si ahcun siatserhnak a thlentu hi tidai in lo siatsuah hlah seh. 20Asinain pasal nei cingin mipa dang thawn nan sual ngaingai a si ahcun, 21Bawipa in na hmin cu na miphun lakih midang camsiatnak ah hmang seh. Bawipa in na pumpi thlingter sehla na zahmawh caarter seh. 22Hi tidai cu na pum sungah lut in na pumpi cu thlingter ciamco sehla na zahmawh khal caarter thluh seh,” tiah siatserhnak a tuahter pei.
Cutikah nunau nu cun, “Si hram seh, Amen,” tiah a sawn pei.
23Cun cuih siatserhnak cu puithiam in a ngan pei ih a nganmi cu beel sungih thlalet cammi siatti sung ahcun a tleuh pei. 24Tidai cu nunau nuih pum sungih natnak besia suakter dingin a inter hlan ah, 25puithiam in nunau nu kut sungih a ummi thlairawl thawinak sangvut cu a lak pei ih Bawipa ih hnenah a hun thlir hnuah biakṭheng parah a ret pei. 26Cun thawinakih pekmi a si ti langternak ah sangvut cu zatekhat a lak pei ih biakṭheng parah a ur pei. Cule neta bikah tidai cu nunau nu a inter pei. 27Mipa dang thawn an sual ngaingai asile tidai cun a pum a natter ding ih a pumpi a ṭhang vivo ding ih a zahmawh khal a caar vivo ding. A hmin cu a miphun lakah siatserhmi a si pei. 28Sikhalsehla a sual lo a si ahcun siatsuahnak a tong lo pei ih fa khal a nei thei ding.
29Hi daan cu mipa pakhat in a thuneihnak thuaiih a ummi a nupi a thiik ih mipa dang thawn an sual ruangah zum lonak a neih tikah thlun ding mi daan a si. 30Culole a nupi a thiik meen ruangih zum lonak a neih ruangah a si khalle thlun dingmi daan a si. Cutiin biakṭheng hmaiah nunau nu cu a dinter pei ih puithiam in hi thawinak cu a tuah pei. 31A pasal cu mawh a phur lo pei; asinain a nupi cu a sual a si ahcun sualman a tuar pei.
Currently Selected:
MIPUM SIARNAK 5: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
