PUITHIAM HNAṬUANNAK 9

Aaron In Thawinak A Pek

1A ni riat ni ah Moses in Aaron le a fapa pawl le Israel hotu pawl a ko khawm. 2Aaron hnenah, “Cawcangte pakhat le tuucang pakhat, raitluan veve la awla Bawipa hnenah pe aw; cawcang cu sualthlah thawinakah a si pei ih tuucang cu mei-ur thawinakah a si pei. 3Cule Israel mi pawl sim awla sualthlah thawinak hrangah mecang pakhat, mei-ur thawinak hrangah raitluanmi caw note le tuu note kum khat ti veve, rak keng hai seh; 4remnak thawinak hrangah cawcang pakhat le tuucang pakhat khal rak keng hai seh. Siti rawimi thlairawl thawinak thawn Bawipa hnenah an pek pei. Ziangahtile tuihsun ah Bawipa cu an hnenah a lang ding a si,” tiah Moses in a ti.

5Moses ih thupekmi bangtuk in a zatein Puanthlam hmaiah cun an rak keng thluh ih Israel mi an zatein cutawkah Bawipa biak dingah an ding. 6Cutikah Moses in, “Bawipa ih sunlawinak tleu cu nan hnenih a langnak dingah hi hmuahhmuah hi tuah dingah Bawipa in thu a lo pek zo a si,” a ti. 7Cule Aaron hnenah, “Biakṭheng ah feh awla na sualnak le mi zapi ih sualnak cu thlahsak an sinak dingah hi sualthlah thawinak le mei-ur thawinak cu tuah aw. Hi thawinak cu mipi sual thlahnak dingah Bawipa ih thupeknak bangin tuah aw,” tiah a ti.

8Curuangah Aaron cu biakṭheng ah a feh ih amah ih sualthlahnak hrangih cawcangte cu a that. 9A fapa pawl in cawcang thisen cu a hnenah an pek ih acuih thisen sungah a kutzung a hnim hnuah thisen cu biakṭheng ih kil li ki pawl ah a hnih; a taangmi thisen cu biakṭheng hramah a thlet. 10Cun biakṭheng parah a thau, a kaileng pawl le a thinhnun thau pawl cu Moses hnenih Bawipa ih thupekmi bangtuk in a ur. 11Asinain a sa le a vun cu an riahnak lengah a ur.

12Amah hrangih mei-ur thawinak ṭilva cu a that. A fapa pawl in sathi cu an dong ih amah an pek ih biakṭheng ih kap li ah Aaron cun a theh. 13A lu le a sa dang pawl an pek ih anih in biakṭheng parah a ur. 14A sungril le a dunglam ke pawl a kholhfai hnuah mei-ur thawinak tlunih biakṭheng parah a ur.

15Cuih hnuah mipi hrangah thawinak a pek. Misenpi sualthlahnak hrangih pek dingmi mecang cu a lak ih amah ih sualthlahnak hrangih a tuah vekin a that ih a pek. 16Mei-ur thawinak hrangih ṭilva khal a lak ih a daan bangtuk in thawinak a pek. 17Thlairawl thawinak khal a pek ih sangphut zate-khat a lak ih biakṭheng parah a ur. Himi cu zingtin tuahmi mei-ur thawinakih hlei ah a si. 18Misenpi hrang remnak thawinak cawcang le tuucang khal a that. Cuih thisen cu a fapa pawl in an rak dong ih amah an pek ih anih in biakṭheng ih kap li ah a theh. 19Aaron in a thau - a meifi thau, a sungril thau, a kaileng le a kaileng tuamtu thau, a thinhnun thau pawl tla a lak ih, 20a ir sa parih a ret hnuah biakṭheng parah a ur. 21Cule Moses ih fial bangtuk in a ir le a vorhlam kawng pawl cu a hleice pekmi-ah Aaron in puithiam pawl hrangah Bawipa hnenah a pek.

22Aaron in thawinak hmuahhmuah a ṭheh tikah misenpi tlunah a baan pahnih in a phar ih thluasuah a pek. A pek ṭheh in a ṭum. 23Cule Moses le Aaron cu Bawipa ih umnak Puanthlam sungah an lut ih an ra suah tikah misenpi pawl cu thluasuah an pek ih an zate tlunah a tleumi Bawipa ih sunlawinak cu a lang. 24Hmakhatte-ah Bawipa in meisa a run thlak ih biakṭheng parih thawinak sa hmuahhmuah le a thau pawl tla cu a kaang ṭheh. Cumi cu misenpi in an hmuh tikah an au hluarhlo ih an hmai leilung dai in an bok.

Currently Selected:

PUITHIAM HNAṬUANNAK 9: FCL

Highlight

Copy

Compare