PUITHIAM HNAṬUANNAK 8

Aaron Le A Fapa Pawl Hriakculhnak

(Suah 29.1-37)

1 Bawipa in Moses hnenah, 2“Aaron le a fapa pawl cu Thukham retnak Puanthlam ih sangka ah fehpi hai awla puithiam thilthuam pawl, hriak culhnak ding siti, sualthlah thawinak hrangih cawcangte pakhat, tuucang pahnih le thilnu tel lo sang bawm khat pawl tla keng aw. 3Cule Israel miphun zatein cutawkah cun ko thluh hai aw,” tiah a ti.

4 Bawipa ih thupek bangtuk in Moses cun a tuah ih an zate ih an pumkhawm tikah, 5Moses in, “Ka tuahmi pawl hi Bawipa ih thupeknak bangtuk in a si,” tiah a ti.

6Moses in Aaron le a fapa pawl cu hmaiah a suahpi ih thiannak ah ti a kholh awkter hai. 7Aaron cu kor le korfualpi a hrukter ih taiṭemnak in a taai a ṭem. Cule ṭaangthlaih thianghlim a hrukter ih mawi zetih tahmi taikhap in a tai a khap. 8Cuih hnuah ṭaangben a benter ih a sungah Urim le Thummim#8.8 Urim le Thummim: timi cu Pathian duhnak hawlnak ah an hmanmi thilri pahnih a si. Lungto in tuahmi a si. Ziangti vekin an hmang ticu theih fiang a si lo. a ret. 9Bawipa ih thupek vekin lupawng a pawnter ih a lupawng ih hmailamah cun “Bawipa hnenih pekmi,” tiih cakhenmi sui pheng a ben.

10Cun Moses in hriakculhnak siti cu a lak ih Bawipa umnak Puanthlam le a sungih a ummi thil hmuahhmuah cu a hnih thluh ih an zatein Bawipa hnenih thiantermi-ah an cang. 11Bawipa hrangih thianter dingah Moses in hriak hrekkhat cu a lak ih biakṭheng le a thuamhnaw pawl, maihum le a tohkaal pawl le a hram pawl cu voi sarih tiang a theh. 12Cule Moses in Aaron cu a lu ah hriak toih tahrat in pumpeknak le hriakculhnak a tuahsak. 13Cuih hnuah Moses in Aaron ih fapa pawl cu hmaiah a suahpi ih korfual a hrukter hai ih an tai ah taiṭemnak in a ṭem ih Bawipa ih thupeknak bangtuk in lukhuh a khumter.

14Cule sualthlah thawinak hrangih cawcang cu Moses in a rak hruai ih Aaron le a fapa pawl in cawcang ih lu parah an kut an suang. 15Moses in cawcang cu a that ih a thisen hrekkhat a lak hnuah Bawipa hnenih thiantermi a si ti-nakah biakṭheng ki parah thisen cu a kutzung in a hnih. Cule a taangmi thisen cu biakṭheng hramah a thlet. Cuticun Moses in Bawipa hnenah a pek ih biakṭheng cu a thianter. 16Moses in a sungril parih thau hmuahhmuah, a kaileng pawl, a kaileng parih thau pawl le a thinhnun parih thau pawl a lak ih a zate in biakṭheng parah a ur ṭheh. 17Cun Bawipa ih thupeknak bangtuk in a sa dang hmuahhmuah - a sa, a vun, a sungril - hmuahhmuah cu an riahnak lengah a ur ṭheh.

18Cun Moses in mei-ur thawinak hrang tuucang cu a rak keng ih Aaron le a fapa pawl in tuucang ih lu parah an kut an suang. 19Moses in tuucang cu a that ih a thisen cu biakṭheng ih kap li ah a theh. 20-21Tuucang cu a can thluh ih tidai in a sungril pawl le a dunglam ke pawl a kholhfai ih Bawipa ih thupeknak vekin tuucang sa hmuahhmuah, a lu le a thau pawl thawn, biakṭheng parah meisa in a ur. Hi mei-ur thawinak cu thlairawl thawinak a si hrangah Bawipa hrangah rimthaw a si.

22Cun puithiam pawl hriakculhnak hrangih hman dingmi tuucang pahnihnak cu Moses in a rak keng ih Aaron le a fapa pawl in tuucang ih lu parah an kut an suang. 23Moses in tuucang cu a that ih a thisen hrekkhat a lak ih Aaron ih vorhlam hna-rah parah le a vorhlam kutzungpi le a vorhlam kezungpi ah a hnih. 24Cule Aaron ih fapa pawl cu hmaiah a suahter ih tuucang ih thisen hrekkhat cu an vorhlam hna-rah le an vorhlam kutzungpi le an vorhlam kezungpi tla ah a hnih. A taangmi thisen cu Moses in biakṭheng ih kap li ah a theh. 25A thau, a meifi thau, a sungril tuamtu thau hmuahhmuah, a thinhnun parih thau, a kaileng pawl le a kaileng parih thau, le a vorhlam kawng a lak. 26Cule Bawipa hnenih pekmi thilnu tel lo sangbawm sung ihsin sang zawl khat, siti thawn tuahmi sang zawl khat le an rawhmi sang paate phel khat a lak ih tuucang thau le a vorhlam kawng parah a ret. 27Hi pawl hmuahhmuah cu Aaron le a fapa pawl ih kut ah a pek ih annih in Bawipa hnenah a hleice laksawngah an pek. 28Cuih hnuah Moses in acuih rawl pawl cu a lak ih mei-ur thawinak tlunah cun hriakculh thawinakah biakṭheng parah a ur. Himi thawinak cu thlairawl thawinak a si ruangah Bawipa hnenah rimthaw a si. 29Cun a ir cu Moses in a lak ih a hleicemi laksawngah Bawipa hnenah a pek. Himi cu hriakculhnak tuucang sa sung ihsin Moses ih covo a si. Bawipa ih thupeknak bangtuk in Moses cun a tuah thluh.

30Hriakculhnak siti le biakṭheng parih a ummi sathi hrekkhat cu Moses in a lak ih Aaron le a fapa pawl le an sinfen parah a theh. Cuticun anmah le an sinfen pawl cu Bawipa ih hnenah a thianfaiter a si.

31Moses in Aaron le a fapa pawl hnenah, “Sa cu Bawipa umnak Puanthlam sangka ah suang uhla Bawipa in nan tuah dingah thu i pek zo bangtuk in hriakculh ni-ih pekmi thawinak bawm sungih a ummi sang thawn cutawkah cun ei uh. 32Nan hlahmi sa le rawl cu nan ur thluh pei. 33Nan hriakculh thawinak nan ṭheh lai hlan lo Puanthlam luhnak sangka ah ni sarih sung suahsan loin nan um ringring pei. 34Nan sualthlahnak dingah tuihsun ih kan tuahmi hi tuah dingah Bawipa in thu i pekmi a si. 35Bawipa ih thupekmi cu nan tuah pei ih Puanthlam luhnak sangka ahcun ni sarih sung a sun a zan in nan um pei. Cutiin nan tuah lo asile nan thi ding. Himi cu Bawipa ih thu in pekmi a si,” tiah a ti. 36Curuangah Moses hmang tahratin Bawipa in thu a pek ih, a thupekmi cu Aaron le a fapa pawl in kimtein an tuah ṭheh.

Currently Selected:

PUITHIAM HNAṬUANNAK 8: FCL

Highlight

Copy

Compare