ṬAHHLA 5
5
Zaangfah Dil Ih Thlacam
1Maw Bawipa, kan parih a thleng
mi hi in theihsak hram aw.
In run zoh awla kan ningzahnak
hi in run hmuhsak hram aw.
2Kan ram le kan ro neihmi pawl cu
Kan theih dah lomi pawl ih kut
sung an thleng.
Kan inn pawl cu ramdangmi pawl
ih ta ah an cang.
3Kan pale pawl ral kut in an thi,
Ngakṭah farah ah kan cang.
Kan nule pawl nuhmei ah an cang.
4Kan inmi tidai kan lei a ṭul;
Kan tihmi zanthing khal a man
kan pek a ṭul.
5Kan hngawng ah hngawngkol in
thlaih;
Ramsa bangin cat lo ih dawimi
kan si.
Kan bang nasa zet naón colh ni
kan nei lo.
6Rawl khopkham ih ngah duh ah,
Izipt ram le Assiria ram ah
rawl dil ah kan feh.
7Kan pupa pawl cu an sual ih an
um nawn lo;
Asinain an sual man cu kannih
in kan tuar.
8Sal hnakin a ṭha cuang lomi pawl,
Kan tlun ah lal an cang.
An kut sung ihsin in suah theitu
Zohman an um fawn lo.
9Mi thah hmang pawl hramlak ah
an vak rero;
Thih ṭih cingin nun duh ah
rawl kan hawl.
10Kan rilrawnnak in kan taksa a satter thluh;
Kan vun cu lungthu bangin a ling.
11Kan nupi pawl an kaihrem,
Zion tlang rori ahcun.
Judah khawte kipah kan fanu pawl
Sualpinak an tuar.
12In hotu pawl an hruai ih,
An hngawng in an awk that.
Kan patar pawl khal zianghman
hmaizahnak an pe lo.
13Kan tlangval pawl sal bangin
Fang an rialter;
Kan nauhak tualleng pawl cu
an sawn rero,
An phurhmi zanthing a rit
tuk ruangah.
14Kan patar pawl in an tlansan zo,
An to ṭheunak khawpi kotka cu.
Tlangval khal in an tlansan zo,
An tum ṭheumi ṭingṭang pawl cu.
15Kan nunnak sung ihsin
Lungawinak a suakhlo zo.
Kan nomnak le kan laamnak cu,
Riahsiatnak in a airawl zo.
16Kan suilukhuh kan lu ihsin
a tla zo.
Kan sual zo ih kan lamzin
a pit a si.
17Hi ruangah kan thin a na,
Kan thin muril tiangin a na.
Hi bangtuk ruangah hin
Kan mit a mal thlang a si.
18Ziangahtile Zion tlang cu a ṭhing,
ṭio sanmi hmun a si;
Hramlak ih cinghnia pawl an vak,
Siatbalmi khawrop ahcun.
19Asinain, maw Bawipa, nang cu
Kumkhua in uktu bawi na si.
Na bawi tokham cu san ih-khuk in
a hmun ringring ding a si.
20Ziangah so atu tiang,
In dungtun ringring hrih?
Ziangtik talah in thei sal nawn
pei maw?
21Na hnenah in kirter hram aw,
Maw Bawipa, in kirter hram aw.
Khuahlan kan rak sunlawinak pawl cu
In pe kir sal hram aw.
22Culole kannih hi kumkhua
in maw in hnong ding?
Kan parih na thinhengnak hi
Cem ni a nei lo ding maw si?
Currently Selected:
ṬAHHLA 5: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.