ṬAHHLA 4
4
Jerusalem A Siat Hnu Ah
1A tle zohzo mi kan sui pawl cu
An dal ṭheh zo.
Biakinn ih lungto pawl cu lamzin
ah ṭhekdarh ṭheh an si zo.
2Kan hrangah Zion tlangval pawl cu
Sui tlukin an rak sunglawi.
Sikhalsehla atu ahcun tlakbeel
tluk men ah ruah an si.
3Cinghnia pinu hman in a faate cu
ṭhatein zoh a thiam.
Asinain ka minung pawl cu nelrawn
kalauk vate vek an si;
Zaangfahnak zianghman
an thiam lo.
4Ka minung in an fano an thihter,
Rawl lo le ti loin.
Nauhak in rawl an dil naón,
Zohman in an pe lo.
5Lamzin ah rawl loin an thi,
Rawl thawbik a rak eitu pawl cu.
Hnawmhne hlonnak ah rawl an hawl,
Nunnuam zetih rak cawmmi
pawl cun.
6Ka minung pawl in cawhkuan
hremnak an tuar.
An tuarnak cu a luar sawn;
Milai kut tel loin rin loih
a siatmi Sodom khuami
pawl hnakin.
7Jerusalem lal pawl cu borhhlawh
loin vur vekin an thiang;
Cawhnawi bangin an raang.
An harhdam ih an cakzet;
Mepian lungvar bangin an mawi
ih an naal zenzen.
8Atu ahcun lamzin ah an thi,
Rapṭing hnakin an dum sawn;
Zohman in an thei thiam nawn lo.
An vun cu an ruh ah a erh aw ṭheh,
Thingro vekin an caar.
9Ral kut in a thimi kha an van
nei sawn;
Neta ih a thimi pawl hnak cun.
Ei ding zianghman nei loin,
Rawl loih nuamte ih thih cu
a har sawn.
10Tuksumza ngaingai a si,
Ka minung hnenih a thlengmi
vanduainak cu;
Lainatu nule pawl in rawl ai ah
an suan hai,
An sungsuak an faate pawl cu.
11 Bawipa in a ai thawhnak cu,
Meivam bangin a run burh.
Zion ah meisa a alhter ih,
A hramṭohnak tiang
ciam ṭheh ko in a kang.
12Zohman in an zum thei lo,
Ramdang uktu bawi khal in
an zum thei lo;
Jerusalem khawpi sung luh
thei ding cu;
Jerusalem kotka sungih ral pawl
luh thei ding cu.
13Asinain an lut thei,
A profet le a puithiam pawl
an sual ruangah.
A profet le a puithiam pawl in
thil poimawh an tuah,
Mawh nei lomi ih thisen
an luanter ruangah.
14An hotu pawl cu an vakvai,
Lamzin tluan ah mitcaw bangin.
Thisen an hnih awknak a luar tuk,
Zohman ih tham ṭha lo an si.
15Misenpi pawl in, “Tlan uh,
Mi borhhlawh nan si,
In dai hlah uh,” an ti.
Curuangah ram kip ah an vakvai,
Khui hmanah tlun inn an tong lo;
“Hinah nan um thei lo” an ti.
16 Bawipa in an hrangah helhkamnak
zianghman a nei lo;
A ṭhekdarh sawn hai a si.
Kan puithiam le kan upa pawl cu
Zianghman ah a siar lo.
17Bomnak a ra hmang ding ti zoh
na ah kan mit a kham ṭheh;
Bomnak cu a ra dah si lo.
Bomnak in pe hmang ding tiah
kan hngak rero naón,
Khui ram hman in bomnak in pe
thei lo.
18Kan ral pawl in in thlingthla,
Kan dung in in thlun ringring;
Lamzin hmanah kan vak ngam lo.
Tikcu le caan kan nei nawn lo,
Kan cem netnak ni a thleng zo
a si.
19Van ih khaupi hnakin,
Zamrang sawn in kan ral in
in dawi.
Tlangpar ah in dawi ih,
Nelrawn ah rinlopi in in man.
20Kan nunnak hrampi an kai ngah,
Bawipa ih hriakculhmi
kan rinsan bikmi cu.
In dotu pawl kut ihsin in hum ding;
A thla thuai ah kan um ding,
kan timi cu.
21Hni rero uh, Edom le Uz mipawl,
Nan lung awi ko uh, tikcu nan
neih sungah cun.
Nan siatralnak tikcu a ra thleng
ve ko ding;
Taklawng le ningzak in nan sawn
nan ril rero ve ko ding.
22Zion in a sualman cu a kuan
ṭheh zo;
Bawipa in saltaannak ah in re
nawn lo ding.
Sikhalsehla Edom, nang cu Bawipa
in a lo hrem ding;
Na mawhnak hmuahhmuah a langter
ṭheh ding.
Currently Selected:
ṬAHHLA 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.