JOSHUA 21

Levi Mi Ih Khawpi Pawl

1Levi hrin hotu pawl cu puithiam Eleazar, Nun ih fapa Joshua le Israel miphun an hrin ciarih hotu pawl hnenah an ra ih, 2Kanaan ramih an riahnak Shiloh ahcun an hnenah, “Moses hnen ihsin Bawipa ih thupekmi bangtuk in kan umnak hrangah khawpi pawl le kan ṭilva hrangah tlimno umnak ram cu in pe ve hram uh,” tiah an ra dil. 3An dil vek le Bawipa ih thupekmi bangtuk in Israel mi pawl cun anmah ih comi ram sung ihsin khawpi le ṭilva tlannak ram pawl cu Levi mi hnenah an pek.

4Levi mi lakah hmaisa bikih khawpi pekmi pawl cu Kohath hrin an si. Puithiam Aaron ih cithlahmi Levi mi pawl cu Judah, Simeon, le Benjamin hrin pawl ih ram ihsin khawpi hleithum an pek. 5A taangmi Kohath hrin pawl cu Efraim, Dan le Nitlak lam Manasseh hrin a hrek pawl ih ram ihsin khawpi pahra an pek.

6Cun Gershon mi pawl cu Issakhar, Asher, Naftali le Bashan ih a ummi Nisuah lam Manasseh hrin pawl ih ram ihsin khawpi hleithum an pek.

7Merar hrin pawl cu Reuben, Gad le Zebulun hrin pawl ih ram sungin khawpi hleihnih an pek.

8Cuticun Moses hnenih Bawipa ih thupek bangtuk in camcawhfung zuuk in Israel mi pawl cun an khawpi pawl le ṭilva tlannak ram pawl tla cu Levi mi hnenah an pek a si.

9Judah le Simeon phun pawl ih khawpi pawl lak ihsin Levi mi, 10Aaron tefa pawl lakih Kohath sungkhat pawl an pekmi khawpi cu hihi an si. Anmah cu hmaisa bikih pekmi an si. 11Judah tlangpar ram Hebron timi Kiriath Arba khua le a kimvel ram cu Kohath mi hnenah an pek. Arba cu Anak ih pa a si. 12Asinain Kiriath Arba khua kiangih lo le khawte pawl cu Jefunneh ih fapa Kaleb an pek.

13Cun puithiam Aaron ih tefa pawl hnenih an pekmi khua (mithattu rolnak) Hebron khua tlunah Libnah, 14Jattir, Eshtemoa, 15Holon, Debir, 16Ain, Juttah, le Beth Shemesh khua pawl, an kiangkap ṭilva tlannak ram pawl thawn an pek a si. Judah le Simeon phun pawl ih ram sungin khawpi pakua pek an si. 17Cule Benjamin hrin pawl ih ram sung in Gibeon, Geba, 18Anathoth le Almon khua pawl, khawpi pali cu an ṭilva tlannak ram pawl thawn an pek. 19Puithiam Aaron ih tefa pawl puithiam hna a ṭuantu pawl hnenah an ṭilva tlannak ram pawl thawn a zatein khawpi hleithum an pek.

20Levi miphun Kohath ih hrin pawl cu Efraim hrin ram sungin khawpi hrekkhat pek an si. 21An pekmi cu Efraim tlangpar ramih ummi Shekhem khua le a kiangkap ram pawl (Shekhem cu mi thattu rolnak ih hrilmi khua a si), Gezer khua, 22Kibzaim khua le Beth Horon khua, an ṭilva tlannak ram thawn a zatein khawpi pali an si. 23Dan hrin pawl ih hnen in Eltekeh, Gibbethon, 24Aijalon, le Gath Rimmon, a zatein khawpi pali cu an ṭilva tlannak ram pawl thawn an pek. 25Nitlaknak lam Manasseh a hrek ram in Taanak le Gath Rimmon khawpi pahnih cu an ṭilva tlannak ram pawl thawn pek an si. 26Curuangah Kohath ih hrin pawl cun an ṭilva tlannak ram pawl thawn khawpi pahra an co.

27Levi hrin a si vemi Gershon mi pawl cun nisuahnak lamih ummi Manasseh hrin pawl hnen ihsin khawpi pahnih an co. Bashan pengah mi thattu rolnak khua Golan khua le, Be Eshterah khua, an ṭilva tlannak ram pawl thawn an co. 28Issakhar hrin hnen ihsin Kishion, Daberath, 29Jarmuth, le En Gannim khawpi pawl, an kiangkapih ṭilva tlannak ram pawl thawn, khawpi pali an co. 30Asher hrin hnen ihsin, Mishal, Abdon, 31Helkath le Rehob khawpi pawl, khawpi pali, an kiangkapih ṭilva tlannak ram pawl thawn an ngah a si. 32Naftali hrin hnen ihsin, Galilee pengih Kedesh khua (Kedesh cu mithattu rolnak khua a si), Hammoth Dor khua le Kartan khua pawl, khawpi pathum, an kiangkapih ṭilva tlannak ram pawl thawn an ngah. 33Curuangah Gershon hrin pawl ih ngahmi khawpi pawl cu a kiangkapih ṭilva tlannak ram pawl thawn a zatein hleithum a si.

34Levi hrin thotho a si mi Merari mi pawl cun Zebulun hrin hnen ihsin Jokneam, Kartah, 35Dimnah le Nahalal khawpi pawl, a zatein khawpi pali, an kiangkapih ṭilva tlannak ram pawl thawn an ngah. 36Reuben hrin hnen ihsin Bezer, Jahaz, 37Kedemoth, le Mefaath khua pawl, khawpi pali, an kiangkapih ṭilva tlannak ram pawl thawn an ngah. 38Gad hrin hnen ihsin Gilead pengah Ramoth (Ramoth cu mithattu rolnak khua) le Mahanaim, 39Heshbon, le Jazer khua pawl, khawpi pali, an kiangkapih ṭilva tlannak ram pawl thawn an ngah. 40Curuangah Levi hrin Merari mi pawl in a zatein khawpi hleihnih an co a si.

41Israel ih comi ram sung ihsin a zatein khawpi sawmli le pariat cu Levi mi hnenah an pek a si. 42Hi khawpi pawl kiangkapah ṭilva tlannak ram a um thluh.

Israel Mi In Kanaan Ram An Luah

43 Bawipa in an pupa pawl hnenih a rak tiam cia bangtuk in Israel mi hnenah Kanaan ram cu a pek. Ram an lak ṭheh tikah umhmun an khuar ih an um. 44Cule an pupa pawl hnenih a rak tiam cia bangtuk in an ram sung le an kiangkap hmunkipah daihnak a um. Bawipa in nehnak a pek ruangah an ral ziang bangtuk hman in Israel mi cu an neh dah lo. 45Bawipa in Israel mi hnenih a tiamkammi hmuahhmuah cu pakhat hman a pelh mi a um lo; a zatein a kim thluh a si.

Currently Selected:

JOSHUA 21: FCL

Highlight

Copy

Compare