JEREMIAH 48
48
Moab Ram Siatralnak Ding
1Cungnungbik Bawipa, Israel ih Pathian in Moab ram thu ah hiti in a sim:
“Nebo khuami pawl cu zaangfakza
an si!
An khawpi a siatral zo!
Kiriathaim khua cu lak a si zo;
An ralhruang bal ṭheh a si zo;
An mipawl cu mualpho in an um.
2Moab ram sunlawinak a cem zo;
Ral pawl in Heshbon khua an lak;
Moab miphun siatsuah ṭheh dingin
an ngaihtuah.
Madmen khua cu a ṭhing reprep ding,
Ralkap pawl in an ciil ṭheh ding.
3Horonaim mipawl cu,
‘Siatsuahnak, Thisen luannak,’
tiah an au!
4“Moab cu a siat ṭheh zo;
Nauhak ṭah thawm cu ngaihnik uh!
5An ai thawmvang cu ngaihnik uh,
Lamzin thlun in saklam ah Luhith
tiang a thang.
Ninghan riahsiatnak ai-thawm cu
ngaihnik uh,
Thlanglam ah Horonaim tiang
a thang.
6‘Zamrang in, luat dingah tlan uh,
Nelrawn ih laak lauzet bangin
tlan uh,’ an ti.
7“Maw Moab, na cahnak le na
lennak na rinsan;
Asinain atu-ah nehmi na si thlang
ding.
Na khawzing Khemosh cu sal
taannak hmun ah a feh ve ding.
A bawi pawl le a puithiam pawl
thawn.
8Khua pakhat hman siatral loin
a luat lo ding.
Phairawn le hmunrawn tiangin an
siat ṭheh ding.
Keimah Bawipa in ka sim zo.
9Moab hrangah lungphun phun uh,
Tuan ah siat ṭheh a si thlang ding.
A khawpi pawl cu khawrop ah
an cang ṭheh ding.
Zohman an um sal nawn lo ding.”
10 Bawipa ih hnaṭuan ah a muangcaangtu cu siatserh siseh! Mi a saat lotu le a that lotu cu siatserh siseh!
Moab Khua Pawl Siatsuahnak
11 Bawipa in, “Moab cu himzet le daizetin a um ringring. Ral kaihmi a si dah lo. Moab cu beel pakhat in a dang pakhat ah tleng reromi sabitti vek a si lo. Zohman ih puah lomi a hran vekih retmi sabitti bangtuk a si. A rim a siat dah lo ih a thaw ringringmi sabitti vek a si.
12“Asinain a tu-ah mi ka thlah ding ih Moab cu an thlet hlomi sabitti bangin an thlet hlo tikcu a ra thleng ding. A sabitti an thlet hlo ding ih a beel cu cip seksek in an khuai ṭheh ding. 13Cule Israel mipawl in an rinsan zetmi an khawzing Bethel cu a kim lo le zahpi tlak ih an theih vekin Moab mipawl khal in an khawzing Khemosh cu a kim lo le zahpi tlak in an thei ding.
14“Maw Moab mipawl, ziangah so
mi ralṭha le raldo thiam kan
si tiah nan puar thau rero?
15Moab le a khua pawl cu siatsuah
ṭheh an si ding;
An tlangval ṭha bik pawl tla
thah ṭheh an si.
Keimah hi siangpahrang ka si,
Cungnungbik Bawipa ka si.
Keimah in ka sim zo.
16Moab ram ih vanduai ni a nai zo,
A siatral ni a thleng cing ding.
17“Hi miphun hrangah ṭap uh,
A kiangkap ih a umtu pawl,
A hmin thannak a theitu pawl
khal ṭap uh.
‘A nasa zetmi a mi uknak a cem zo,
A sunlawinak le a cahnak a um
nawnta lo,’ ti uh.
18Nannih Dibon khuami pawl,
Nan sunlawinak hmun ihsin ṭum
uhla leivut lakah to uh.
Moab siatsuahtu a ra zo.
A ruhkulh pawl hnawmpen ah
a canter ṭheh zo.
19Nannih Aroer khua a ummi pawl,
Lamzin kiangah ding tahrat in
hngak uh;
An khua a tlansantu pawl hi
sut uh;
Ziangvek thil so a thleng ti
sut uh.
20‘Moab cu a tlu zo,’ tiah an lo
sim ding;
‘A hrangah ṭap uh, mualpho in
a um zo;
Moab cu a siat ṭheh zo,
Arnon Tivapi tluan ah than uh,’
an lo ti ding.
21“Tlangpar ih a ummi khua pawl parah thuṭhen ni a thleng zo. Cuih khua pawl cu Holon, Jahzah, Mefaath, 22Dibon, Nebo, Beth Diblathaim, 23Kiriathaim, Bethgamul, Bethmeon, 24Kerioth, le Bozrah khua an si. A hlat siseh, a nai siseh, Moab ram ih khua hmuahhmuah parah cun thuṭhennak a thleng zo a si. 25Moab ih ki cu sahtan ṭheh a si zo; a cakmi a baan tla an khiak ṭheh zo. Keimah Bawipa in ka sim zo,” a ti.
Moab Cu Ningzak In A Um Ding
26 Bawipa in, “Moab kha ri-ter uh, ziangahtile keimah dodaltu a si. Moab cu amah ih luak lakah a lawngtaal ding ih mi in an hnihsan ding. 27Maw Moab, hnihsuahsainak men ih Israel na rak hman kha na ciinglai maw? Fifir an kaih ih an tisiat bangin Israel na tisiat a si kha!
28“Moab ram ih a ummi pawl, nan khua pawl tlansan uh! Feh uhla khukhaam lakah va um uh. Khukhaam kiangkap ih bu a saktu thuro bangin um uh. 29Moab cu a hngalzet. A minung pawl an hngalzia, an puarthau le an zum awkzia le ziangvek in an ruat-aw ti ka thei ṭheh. 30Bawipa keimah rori in an hngalnak cu ka thei a si. A puarthaunak cu zianghman a si lo; an thil tuahmi tla rei a daih lo ding. 31Curuangah Moab ram sung mi hmuahhmuah le Kir Heres mi hrangah ka mitthli a tla ding. 32Jazer mipawl hrang hnakih na deuh in Sibmah mipawl hrangah ka ṭap ding. Maw Sibmah khua, Rili Thi le Jazer tiang a ruang a thleng mi sabit hri vek na rak si. Asinain atu ahcun ṭhal caan ih na rah le na rah ding hmuahhmuah khal siat ṭheh an si zo. 33Lungawinak le thinnomnak cu Moab ram ṭha sung ihsin laksak ṭheh a si. Sabit rialnak hmun ihsin sabitti luang nawn loin ka phit ṭheh. Sabit tuahtu le lungawi in a autu zohman an um nawn lo.
34Heshbon le Elealeh khuami pawl an ṭap ih, an ṭah aw cu Jahaz tiang a thang. Zoar khuami tla in an thei ih, Horanaim le Eglath Shelishiyah khua pawl tiang a thang a si. Nimrim Tiva hman a kang thluh zo. 35Moab mipawl cu an khuavang biaknak hmun ah mei-ur thawinak pe thei lo le an khawzing pawl hnenah hlannak pe thei loin ka kham ding. Keimah Bawipa in ka sim zo.
36“Curuangah cawnglai tum phah ih mithi phumnak hla satu bangin Moab le Kir Heres mi hrangah ka thinlung mitthli a tla, ziangahtile an neihmi hmuahhmuah a cem thluh zo. 37An zatein an sam le an khahmul an met. An zatein an baan an sat ih buri hnipuan an hruk ṭheh. 38Moab ram sungih inn par hmuahhmuah ah le khawkip ih khawhnar pawn ah mithi ngainak lawng a khat, ziangahtile Moab cu zohman ih duh lomi beel kuai siava bangin ka khuai ṭheh zo a si. 39Moab cu a siatdarh ṭheh zo! ṭap in ai uh! Moab mualpho in a um zo. Hnawmpen ah a cang zo. A kiangkap miphun pawl in hnihsuahsainak ah an hmang a si. Keimah Bawipa in ka sim zo,” tiah a ti.
Moab Hrangah Luatnak A Um Lo
40 Bawipa in hiti in a sim cia: Moab cu miphun phunkhat in khaupi bangin a thla phar tahrat in a nam ding ih, 41Khua pawl siseh, ruhkulh pawl siseh, a lak ṭheh ding. Cuih ni ahcun Moab ralkap pawl cu nau neizik nunau bangin thinphang in an um ding. 42Ka parah hngalzet ih a um ruangah Moab cu siatsuah ṭheh a si ding ih miphun phunkhat a si nawn lo ding. 43Moab cu tuksumnak, khur thukpipi le mi awktu thang pawl in an bawh. Cucu Bawipa ih ṭong a si. 44Tuksumnak ihsin tlanhlo a tumtu cu khur sungah an tla ding. Khur thuk sung ihsin suak tahratin a tlantu pawl cu thang in a awk ding. Ziangahtile Bawipa in Moab siatsuah dingah ni a khiah cia zo. 45Bawmtu nei lo raltlan pawl cu siangpahrang Sihon in a rak ukmi Heshbon khawsung ah himnak an hawl. Asinain meisa in cuih khua cu a kang ṭheh. Raldo hiarzet Moab mi pawl ih ram le tlang saangpipi pawl an kang ṭheh zo a si. 46Moab mi pawl cu zaangfakza an si! Khemosh khawzing a biatu pawl cu siatralnak an tong ih an fanu le an fapa pawl cu ralkaih thawng thlakmi ah an cang zo.
47Sikhalsehla hmailam tikcu caan ahcun Bawipa in Moab cu neinungzet ah a tuah sal ding. Himi cu Bawipa ih ṭongmi a si ih Moab parah a kim ding a si.
Currently Selected:
JEREMIAH 48: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
