JEREMIAH 43
43
Izipt Ah Jeremiah An Thlenpi
1 Bawipa an Pathian in an hnenah sim dingih i fialmi hmuahhmuah cu misenpi hnenah ka sim ṭheh. 2Cutikah Hoshaiah ih fapa Azariah le Kareah ih fapa Johanan le mi puarthau pawl in, “Na thuphan a si. Bawipa kan Pathian in Izipt ram feh lo dingah le um lo dingih sim dingah a lo thlah lo a si. 3Babilon mi pawl in kan tlunah thu an neih ih in thah theinak dingah, a si lole Babilon ih in fehpi theinak dingah Neriah ih fapa Baruk in thusia a lo forh a si,” tiah in ti. 4Cuticun Judah ram sungih um dingah Bawipa ih thupekmi cu Johanan in siseh, ralbawi pawl in siseh, misenpi pawl khal in siseh, zohman in an thlun duh lo. 5Cule Johanan le ralbawi pawl in Judah ramih a taangmi pawl hmuahhmuah le ṭhekdarh ṭheh an sinak ram ihsin a ra kirtu pawl hmuahhmuah cu Izipt ram ah an fehpi. 6Mipa, nunau, nauhak le siangpahrang fanu pawl tla an fehpi ṭheh. Gedaliah ih kilkhawi dingah Babilon ralkap hotu ralbawi Nebuzaradan ih a retmi hmuahhmuah pawl le, Baruk le keimah tiangin in hruai ṭheh a si. 7Bawipa ih thupekmi cu ngai loin Izipt ram Tahpanhes khua tiang an vung feh a si.
8Cutawkah Bawipa in ka hnenah, 9“Lungto tum pipi la awla hi khawpi sung acozah inn luhnak hmai ih lamzin phah mi phahlei thuai ah phum aw; cuti na tuah cu Israel mi hrekkhat in lo hmu hai seh. 10Cungnungbik Bawipa, Israel ih Pathian keimah in i riantu Babilon siangpahrang Nebuchadnezzar cu hi hmunah ka runter ding ih cuih na phummi lung tumpipi parah cun a siangpahrang tokham a hung ding ih an tlunah a siangpahrang puanthlam a zaar ding, ti thu sim aw. 11Nebuchadnezzar a ra ding ih Izipt cu a neh ding. Natnak in thi dingih ruahciami pawl cu natnak in an thi ngaingai ding; sal kaih dingih ruahciami pawl cu sal kaihmi an si ngaingai ding; ral kut in thi dingih ruahciami pawl cu ral kut in an thi ngaingai ding. 12Izipt ram khawzing pawl ih biakinn pawl cu meisa in ka ur ding. Babilon siangpahrang in an khawzing pawl cu meisa in a ur ding, a si lole a phurhlo ding. Tuukhal in a hnipuan par ih hrik a lak ṭheh ih a faiter vekin Babilon siangpahrang in Izipt ram cu a faiter ding ih nehtu a si hnuah Izipt ram ihsin a feh sal ding. 13Izipt ram Heliopolis ih a zarhmi lungto phunmi pawl cu a balcim ṭheh ding ih an khawzing biakinn pawl cu a ur ṭheh ding a si,” tiah ka ti.
Currently Selected:
JEREMIAH 43: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
