JEREMIAH 41
41
1Cuih kum thla sarih thla ah siangpahrang sungkhat a si mi, siangpahrang kut thuai ih bawi upa bik lakah pakhat a si mi, Elishama ih tesinfa Nethaniah ih fapa Ishmael cu minung pahra thawn Judah ram uktu Gedaliah tong dingah Mizpah ah a feh. An zatein hmunkhat ih rawl an hil tlang laiah, 2Ishmael le a minung pahra cun an ralnam an suah ih Gedaliah cu an that. 3Gedaliah hnenih a ummi Israel mipawl le Babilon ralkap hrekkhat cutawkih a rak ummi pawl tla Ishmael in a thah ṭheh a si.
4A thaisun ah, Gedaliah an thah kha zohman ih an theih hlanah, 5Shekhem, Shiloh le Samaria ihsin minung sawmriat an ra thleng. An khabe hmul meet in le an hnipuan thlek in anmah le anmah an sun an at-aw ih Biakinn ah sangphut le rimhmui pe dingah a rami an si. 6Ishmael cun ṭap phah in Mizpah ihsin a va hmuak hai. An hnen a thlen tikah, “Gedaliah tong dingah cun rung uh,” tiah a ti. 7Khawpi an rung luh tikah Ishmael le a minung pawl cun an rak that hai ih an ruak cu tikhur sungah an hlon ṭheh a si.
8Asinain anmah lakah minung pahra in Ishmael hnenah cun, “In that hram hlah aw; sangvut le fangtlor le olif hriak le khuaitizu pawl hramlak ah thuhmi kan nei,” tiah an leem. Curuangah that loin a zuah hai. 9Ishmael in a thahmi pawl ih ruak an hlonnak tikhur cu a tumpi#41.9 a tumpi timi hi Grik Baibal thlunmi a si ih Hebru Baibal ahcun Gedaliah ruangah ti in a um. a si ih Israel siangpahrang Baasha in siangpahrang Asa a rak do laiah siangpahrang Asa in a rak laihmi tikhur a si. Ishmael in cuih tikhur cu miruak in a khatter ṭheh. 10Cule Babilon ralkap pawl hotu ralbawi Nebuzaradan in Gedaliah kilkhawi dingih a retmi siangpahrang fanu pawl le Mizpah khua ih mipi pawl cu thawng ah a thlak ṭheh. Cupawl cu Ishmael in salah a kaih ih Ammon ram lam ah a tlanpi ṭheh.
11Ishmael ih thilsual a tuahmi cu Johanan le amah thawn a ummi ralkap hotu ralbawi pawl in an theih tikah, 12ralkap thawn an dawi ih Gibeon ih tili tumpi kiangah an man. 13Ishmael ih sal kaihmi pawl in Johanan le amah thawn a rami ralbawi pawl cu an hmuh tikah an lung a awi ngaingai. 14An let kir ih an hnenah cun an ra tlan. 15Asinain Ishmael le a minung pariat cu Johanan ih kaih ngah lo in an tlan suak ih Ammon ram ah an thleng.
16Cule Ishmael in Gedaliah a thah hnuah Mizpah ihsin sal ih a kaihmi ralkap pawl siseh, nunau le nauhak pawl siseh, tilper mipawl tiangin Johanan le ralbawi pawl cun ṭhatein an zoh. 17-18Asinain Babilon siangpahrang in Judah ram uktu ah a tuahmi Gedaliah kha Ishmael in a thah ruangah Babilon mi ṭihnak an thinlung sungah a khat. Curuangah Babilon mi ṭih ah Izipt ram ah an tlan. Lamzin ah Bethlehem khua kiangah Khimham ah an cawl.
Currently Selected:
JEREMIAH 41: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
