THUṬHENTU 3
3
A Taangmi Miphun Dang Pawl
1Kanaan ram sungih ral a do hrih lomi Israel mi pawl hniksaknak ah hi ram sungah Bawipa in miphun dang malte a taanter. 2Israel mi pawl hrek khat raldo hi ziangvek a si ti a thei hrih lo pawl in raldo an zirnak le an theihnak dingah a taanter hrimmi an si. 3Kanaan ram sungah a taangmi pawl cu: Filistin khawpi panga, an zatein Kanaan mi, Sidon mi, le Baal Hermon Tlang ihsin Hamath Tlangkawn tiang Lebanon Tlangih a ummi Hiv mi pawl an si. 4Bawipa in an pupa pawl hnenah Moses hmangin a thupek kha Israel mi pawl ih an thlun le thlun lo theih hliahnak ah cuih miphun dang pawl cu a umter hrim a si. 5Curuangah Israel mi pawl cun Kanaan mi, Hit mi, Amor mi, Periz mi, Hiv mi le Jebus mi pawl lakah umhmun an khuar ih an um. 6Nupi pasal ah nei-aw in an khawzing tla an biak ve.
Othniel
7Israel mi pawl in Bawipa an Pathian cu an hngilh; Bawipa ih duhlomi an tuah, an sual ih Baal khawzing le Asherah khawzing pawl an biak. 8Curuangah Israel mi parah Bawipa ih thinhengnak cu meisa bangin a alh ih Mesopotamia siangpahrang Kushan Rishathaim a nehter. Cuticun Israel mi pawl in Mesopotamia siangpahrang cu kum riat sung an rian. 9Cule Israel mi pawl cu Bawipa hnenah an aihram ih Bawipa in anmah luatter dingah mi pakhat a thlah. Cupa cu Kaleb ih naupa Kenaz ih fapa Othniel a si. 10Othniel cu Bawipa ih thlarau in a umpi ih Israel pawl hotu ah a cang. Othniel cu raldo in a feh ih Bawipa in a hnenah Mesopotamia siangpahrang va nehnak a pek. 11Israel ram cu kum sawmli sung ral a dai. Cule Kenaz ih fapa Othniel cu a thi.
Ehud
12Israel mi cu Bawipa ih hmaiah an sual lala. Curuangah Moab siangpahrang Eglon cu Bawipa in Israel hnakin a cakter. 13Cule Eglon cun Ammon mi le Amalek mi pawl a sawm ih Israel mi pawl an neh ih Ungkung Khawpi an ti mi Jerikho khua an lak. 14Israel mi pawl in Moab siangpahrang Eglon cu kum hleiriat sung an rian.
15Cule Israel mi pawl cu Bawipa hnenah an au ih anmah luatter dingah mi pakhat a thlah. Amah cu Benjamin hrin sung ihsin Gera ih fapa, kehtlakpa Ehud a si. Cutikah Israel mi pawl in an siah pekmi thawn Ehud cu Moab siangpahrang Eglon hnen ahcun an thlah. 16Ehud cun kap hnih hriam ralnam pakhat, dong khat sau amah ih hrangah a tuah ih a vorhlam siir a angki fual sungah a ṭemcih. 17Cuticun an siah cu Ehud in Eglon a va pek. Eglon cu mi thauzet a si. 18Ehud in a pek ṭheh hnuah siah a phurtu pawl cu a tlunter. 19Asinain amah cu Gilgal ih an phunmi lungṭelh ihsin a kir sal ih, “Maw Siangpahrang, thuthup sim ding pakhat ka lo nei a si,” a ti.
Cutikah siangpahrang bawipa in a sal pawl hnenah, “Midang cu suak thluh uh,” tiah thu a pek. A ti bangtuk in an suak thluh.
20Cutiin Siangpahrang bawipa cu amahte lawng a daizetmi a inn tlun colhnak khaan ih a um laiah Ehud cu a hnenah a feh ih, “Na hrangah Pathian hnen ihsin thu pakhat ka rak keng a si,” tiah a ti. Cule siangpahrang bawipa cu a ding. 21A din laifangah Ehud cun a vorhlam siir ih a thuhmi nam cu a kehlam kut in a vun zuk ih siangpahrang bawipa ih thinhna ah a sun. 22A nam cu a pil thluh; a hlok tiangin a pil ih a dunglam ah a tlang suak. Cule Ehud in a phawi nawn lo ruangah a nam cu a thau in a khuh thluh. 23Ehud cu lengah a suak ih sangka pawl a hren ṭheh in a tlansan. 24Siangpahrang bawipa ih hnen-um pawl an ra ih sangka pawl hren thluh mi an hmuh tikah siangpahrang bawipa cu inn sungah pawng a thawh lai a si pei, tiah an ruat. 25Reipi an hngak naón sangka cu a ong dah lo. Curuangah tawhfung an lak ih sangka cu an on; cutikah an bawipa cu zial parah a thi in an hmu.
26Hnen-um pawl in an bawipa an hngak sungah Ehud cu a rak tlan hlo. Khermi lungphun a lan ih Seirah ah a tlan. 27Seirah a va thlen tikah Israel mi, Efraim tlang parah Israel mi pawl cu ral tho dingin Ehud in tuucangki a phaw ciamco. A cuih tlang ihsin amah rori in a hruai. 28“I thlun uh; Bawipa Pathian in nan ral Moab mi pawl ih tlunah nehnak a lo pek zo a si,” tiah a ti. Cule Israel mi pawl cun an vun thlun ciamco ih Moab mi pawl Jordan tiva an tan zik zawng ah an va kaih thluh. Mi pakhat hman Jordan tiva an tan man lo. 29Cuih ṭum ah a cakzet mi Moab ralkap thawng hra tluk an that. Zohman an luat lo. 30Cuih ni ahcun Israel mi pawl in Moab mi pawl cu an neh. Cun Israel ramah kum sawmriat sung daihnak a um.
Shamgar
31Ehud hnuah an hotu cu Anath ih fapa Shamgar a si. Shamgar in Filistin mi zaruk caw vuaknak fungzum in a vuak that thluh. Anih khal Israel mi runsuaktu a si.
Currently Selected:
THUṬHENTU 3: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
