THUṬHENTU 2

Bokhim Ah Bawipa ih Vancungmi

1 Bawipa ih vancungmi cu Gilgal ihsin Bokhim ah a feh ih Israel mi hnenah, “Izipt ram ihsin ka lo suahter ih nan pupa hnenih ka tiamkammi ramah ka lo thlenpi. Nan hnenih ka thukamnak cu ka bal lo ding. 2‘Nannih khal in hi ramih a ummi miphun dang pawl thawn thukamnak nan tuah ve lo pei ih an biakṭheng pawl cu nan bal thluh sawn pei,’ tiah ka lo ti zo kha! Asinain ka lo ti vekin nan tuah dah lo. Nan tuah sawn mi hi zohhnik uh! 3Curuangah fiangtein ka lo sim: hmaiih nan nor tikah himi pawl cu ka dawi lo ding. Nan ral#nan ral timi hi nan hnak ti tla a si thei. Hebru Ca Thianghlim sungah a fiang lo. an si dingih nan hrangah an khawzing pawl cu a lo awktu thang an si ding,” tiah a ti. 4Cutiih vancungmi ih simmi an theih tikah Israel pawl cu napi in an ṭap ciamco. 5Curuangah cuih hmun cu Bokhim#Bokhim ti cu Hebru ṭong in a ṭaptu pawl tican a si. tiah an ko. Cule Bawipa hnen ah cutawkah cun thawinak an pek.

Joshua Thihnak

6Joshua in Israel mi pawl cu an comi ram ciarah a tlunter hai. 7Joshua ih nun sung hmuahhmuah le a thih hnu tiang khalah Bawipa ih thiltuahmi a theitu upa pawl an nun sung cu Israel mi pawl in Bawipa an bia. 8Nun ih fapa Joshua, Bawipa ih salpa cu kum za le kum hra a ti ah a thi. 9Amah cu Gaash tlang ihsin saklam, Efraim tlangram ih a ummi amah ih ram sungah Timnath Heres ah an phum. 10Cule cuih san ih Israel mi pawl cu an thi ih cuih hnu ih a hung suakmi san thar cun Bawipa siseh, Bawipa in Israel hrangih a tuahmi hmuahhmuah siseh, an thei lo.

Israel In Bawipa A Dungtun

11 Bawipa ih hmaiah Israel mi cu an sual ih Baal khawzing pawl an biak sawn. 12An pupa pawl ih Pathian, Izipt ram ihsin anmah a hruai suaktu Bawipa kha bia nawn loin an kiangkap pawl ih khawzing tla biak an thok. Cuih khawzing hmaiah an kun ih Bawipa a thin an hengter. 13Bawipa an tlansan ih Baal khawzing le Ashtarte khawzing pawl sawn an biak. 14Curuangah Israel parah Bawipa cu a thin a heng ngaingai ih damiah le rukru pawl ih rukmi le rammi ah a canter. An kiangkap ih an ral pawl in an nor vivo ih Israel pawl cu anmah le anmah hman an hum-aw thei nawn lo. 15A rak sim cia zo vekin raldo ih an feh tinte in Bawipa in a hnong hai a si. Curuangah Israel mi cu an van a saang ngaingai.

16Cule mi ramtu damiah pawl ih kut ihsin an himnak dingah Israel mi hnenah Bawipa in thuṭhentu pawl a pek. 17Sikhalsehla hi thuṭhentu pawl ih thu khal an ngai cuang lo. Bawipa ih hrangah cun hlawhhlang vek an si ih khawzing dang pawl an biak. An pupa pawl cun Bawipa ih thupekmi an thlun naón ahi santhar minung pawl cun an thlun nawn lo. 18An hrangih hotu a pekmi an nun sung cu Bawipa in a bawm ih an ral kut ihsin a luatter ringring hai ṭheu. Ziangahtile an ral pawl hremnak ruangih an aihramnak kha Bawipa in a theih tikah a zaangfah a si. 19Asinain an hotu a thih vete cun Israel mi pawl cu an nuncan hlun keel ah an kirsal ih a hlan hnakin an luar sawn. Khawzing dangdang an thlun ih an hmaiah an kun ih an biak. Cutiih an nuncan siava cu thlah siang hrimhrim loin an thlun fetfet. 20Curuangah Bawipa cu Israel mi tlunah a thin a heng ngaingai ih, “An thlun hrimhrim dingah an pupa hnenih ka thukam cu hi miphun in an bal ṭheh zo a si. Cutiih ka thu an thlun lo ruangah, 21Joshua in a thih zawng ih a taanta mi miphun dang pawl cu ka dawisuak lo ding. 22An pupa pawl in ka thu an thlun vekin hi Israel mi pawl hin ka thu an thlun maw thlun lo ding ti zoh-nakah hi miphun dang pawl ka hmang ding,” a ti. 23Curuangah acuih miphun dang pawl tla cu Bawipa in Joshua kut sungah a pe lo; zamrang khal in dawi loin cutawk ih a umternak a si.

Currently Selected:

THUṬHENTU 2: FCL

Highlight

Copy

Compare