EZEKIEL 46

Mi-uk Bawi Le Puai Pawl

1Cungnungbik Bawipa in, “A sunglam tualrawn vung luhnak nisuahnak lam kotka cu hnaṭuan ni ni ruk sung khar a si pei ih Sabbath ni le Thla Thar Puai ni ah on a si pei. 2Mi-uk bawi cu a lenglam tualrawn in khaan tumpi sungah a lut pei ih kotka a thlen tikah kotka ṭhuam kiangah a ding pei. Culai ah puithiam pawl in mei-ur thawinak le remnak thawinak an pek pei. Cutawk kotka ahcun Pathian a biak pei ih cuih hnuah a suak sal pei. Kotka cu zanlam lawngah khar a si pei. 3Sabbath tin le Thla Thar Puai tinah kotka hmai ahcun misenpi pawl cu an lu an kuun pei ih Bawipa an biak pei.

4Sabbath ni ah mi-uk bawi in mei-ur thawinak hrangah raitluan tuufaate paruk le tuucang pakhat Bawipa hnenah a keng pei. 5Tuucang pakhat thawn hmun khatah vainim reelkhat a pek pei ih tuufaate pakhat thawn a pek duhmi poh a pek pei. Cubangtuk sangphut thawinak hrangah olif hriak pawng thum a pek pei. 6Thla Thar Puai ah cawcangte pakhat, tuufaate paruk le tuucang pakhat, an zatein raitluanmi a pek pei. 7Cawcang pakhat le tuucang pakhat hrangah thlairawl thawinak pekmi cu rawl haan hrek ciar a si pei ih tuufaate pakhat hrangah cun mi-uk bawi ih a pek duhmi a pek pei. Cubangtuk in thlairawl thawinak ih rawl haan hrek pek a si tik poh ah olif hriak pawng thum pek a si ve pei. 8Mi-uk bawi khaan tumpi sung a luh laiih kotka zin a zawh vek in, a suah tik khalah cuih kotka zin thotho a zawh pei.

9“Miseenpi pawl in puai tikcu ih Bawipa an biak tikah saklam kotka ihsin a luttu pawl cu Pathian an biak hnuah thlanglam kotka in an suak pei; cule thlanglam kotka in a luttu pawl cu saklam kotka in an suak pei. Zohman an luhnak kotka in an suak sal lo pei, khatlam kotka in an suak sal pei. 10Misenpi an luh tikah mi-uk bawi cu a lut ve ding ih an suah tikah a suak ve ding. 11Rawl ei puai le biaknak puai tikcu ah cawcang pakhat a si lole tuucang pakhat hrangah thlairawl thawinak pekmi cu rawl haan hrek a si pei ih tuufaate pakhat hrangah cun Pathian biatu in a pek duhmi pohpoh a si pei. Cubangtuk thlairawl thawinak pek tikah cun olif hriak pawng thum pekcih a si pei.

12“Mi-uk bawi in Bawipa hnenah mah lungtho ih peknak a tuah duh tikah, mei-ur thawinak a si khalle, remnak thawinak a si khalle a sunglam tualrawn vung luhnak nisuahnak lam kotka cu amah hrangah on a si pei. Sabbath ni ih thawinak a pek bangtuk in thawinak cu a pek pei ih a suah sal hnuah cun kotka cu khar a si pei,” tiah a ti.

Nitinte Pekmi Thawinak

13 Bawipa in, “Zingtinte in kum khat kim raitluan tuufaate cu Bawipa hnenih thawinak pekmi ah meisa in a pumte in ur a si pei. Hi thawinak cu nitinte in pek a si pei. 14Cuih tlunah zingtinte in sangvut pawng li le hrek a rawi dingmi olif hriak pawng khat thawn pek a si pei. Bawipa hnenih pekmi hi thawinak hrangah daan pawl cu kum tluan ih thlunmi daan an si pei. 15Tuufaate, thlairawl thawinak le olif hriak pawl cu zingtinte in Bawipa hnenah pek ringring an si pei,” a ti.

Mi-uk Bawi Le Ram

16Cungnungbik Bawipa in hi bangtuk in thu a pek: “Mi-uk bawi in a fapa pakhatkhat hnenah a co dingmi ram laksawng ih a pek a si ahcun cuih ram cu a fapa innsang ih ramah a cang ding. 17Sikhalsehla mi-uk bawi in a ram pakhatkhat a hnaṭuantu hnenih a pek a si ahcun Jubilee Kum a kim tikah amah ih ramah a cang sal ding. Ram cu amah ih ta a si ih amah le a fapa pawl lawngin kumkhua hrangin an nei thei ding. 18Mi-uk bawi in misenpi thilri ziangvek hman a long lo pei. A ram pakhatkhat a fapa pawl a pek tikah amah ih ram sungta lawnglawng a pek pei; cuticun ka minung pawl namsuk tahrat in an ram a long thei lo ding,” tiah a ti.

Biakinn Coka Pawl

19Cupa cun a sunglam tualrawn thlanglam kap kotka kiangih a ummi, saklam a hoimi khaan pawl luhnak ah i fehpi. Hi khaan pawl cu puithiam pawl hrangih khaan thianghlim timi an si. Cuih khaan pawl ih nitlaknak lam hmun pakhat cu i khihhmuh ih, 20“Hi hmunah hin puithiam pawl in sualthlah thawinak le kuansal thawinak hrangih pekmi sa pawl an suang pei ih thlairawl thawinak pekmi pawl tla an rawh pei; cuticun thil thianghlim cu misenpi tuahmawhtu ih a can lonak dingah a lenglam tual ah suahpi a si lo pei,” a ti.

21-22Cule cupa cun a lenglam tualrawn ah i fehpi ih a kil kil li ah dong sawmli a saumi le dong sawmthum a kaumi tualrawn fate a um vivo kha i hmuh. 23Cuih tual pawl cun an kimvel in lungto ih dawlmi phar an nei fingfing ih tappi cu phar thawn dai-aw in an tuah. 24Cupa cun, “Hi coka pawl cu biakinn hnaṭuantu pawl in misenpi ih thawinak an pekmi sa an suannak hmun a si pei,” tiah a ti.

Currently Selected:

EZEKIEL 46: FCL

Highlight

Copy

Compare