EZEKIEL 45

Bawipa Ih Co Mi Ram

1Hi ram cu Israel miphun pawl hrangih zem a si tikah ṭhenkhat cu Bawipa ih hrangah pek a si pei. Peng riat sau le peng ruk kau a si pei. A ram pumpi in ram thianghlim a si pei. 2Cuih ram sungah tungvang can aw mi hmun, Biakinn hrangah zuah a si pei ih dong za-nga a saumi le a kaumi a si pei; a kimvel in dong sawmnga kau hmunlawng in a kulh pei. 3Hi hmunih a hrek, peng hra sau le peng riat kaumi hmun ih hrek, cu a dangte in ret a si pei; Biakinn umnak, hmun thianghlimbik a si pei. 4Hi ram sungih hmun thianghlim, Biakinn sungih Bawipa ih hna a ṭuantu puithiam pawl hrangih retmi a si pei. Puithiam pawl ih inn le Biakinn saknak hmun a si pei. 5Cuih tlunih hmun hrek a taang hrihmi cu Levi mi pawl, Biakinn sungih hna a ṭuanmi hrangah ret sak a si pei. Cutawk cu Levi mi pawl umnak khua a si pei.

6Cuih hmun thianghlim sangtu ram, peng riat sau le peng hnih kau ih tahmi ram cu Israel mi zokhal an umnak ding khawpi hrangah ret a si pei.

Mi-uk Bawi Comi Ram

7Mi-uk bawi hrang khalah ram retsak a si pei. Hmun thianghlim ih nitlaknak lam ramri ihsin nitlaknak lamah Mediterranean Tifinriat tiang a thleng ding. Nisuahnak lamah cun hmun thianghlim ih nisuahnak lam ramri ihsin rampi a netnak tiang a si ding; cuticun a saulam cu Israel miphun phunkhat hrangih ṭhenmi ram can in a sau ding. 8Cuih hmun le cuih ram cu Israel ram sungah mi-uk bawi ih a comi ram a si ve ding ih cuticun misenpi pawl cu hnaihnok nawn loin ram ṭhen dangdang pawl cu Israel miphun pawl ih comi ram a si, tiah a upat ve ding.

Mi-uk Bawi Hrangih Daan

9Cungnungbik Bawipa, in, “Maw Israel mi-uk bawi pawl, nan sualnak hi a reituk zo! Mi nan hmuhsuamnak le mi nan ramnak pawl hi baang thlang uh! A dikmi le a felmi lawng tuah thlang uh. Ka minung pawl cu an ram ihsin nan dawihlo nawn lo ding. Cungnungbik Bawipa keimah in ka lo sim a si.

10“Zokhal in a dikmi tahnak le thlainak an hmang pei:

11“Thil a romi tahnak ephah pakhat cu a tii-mi tahnak bath pakhat thawn an bang aw. Homer cu mi zapi hman bikmi tahnak a si. A hman daan cu a tanglam vekin a si:

Homer pakhat cu ephah pahra

le bath pahra thawn an bang aw.

12“Nan thil thlainak cu a thuailam vekin a si pei:

Gerah kul cu shekel pakhat

thawn a bang aw.

Shekel sawmruk cu mina

pakhat thawn a bang aw.

13-15“Thawinak nan pek tikah a tanglam vekin nan pek pei:

Sangvut cu nan lo in a suakmi

ṭhen sawmruk ih ṭhenkhat,

Barli sangvut cu nan lo in a suak

mi ṭhen sawmruk ih ṭhenkhat,

Olif hriak cu nan thingkung in

a suakmi sungin ṭhen zakhat

ih ṭhen khat a si ding.

Bath in tah tikah: bath pahra

cu homer pakhat thawn an

bang aw;

homer pakhat cu kor pakhat

thawn an bang aw a si.

Tuu a si ahcun Israel ram sungih tuu zahnih sungah tuu pakhat a si ding.

“Sangphut thawinak, mei-ur thawinak le pawlkom thawinak hrangih ṭilva pawl cu nan rak keng pei ih cuticun nan sualnak ngaithiam an si ding. Cungnungbik Bawipa keimah in thu ka lo pek a si.

16“Israel ramsung misenpi pawl in hi thawinak pawl cu Israel ram mi-uk bawi hnenah an keng pei. 17Mi-uk bawi ih ṭuanvo cu Israel miphun pumpi hrangah Thla Thar Puai, Nizarh puai le puai dangdang tuah tikah mei-ur thawinak, sangphut thawinak le sabit thawinak pawl hrangih ṭilva pawl hawlsak ding kha a si. Israel mi pawl ih sual thianfaiternak dingah sualthlah thawinak, sangphut thawinak, mei-ur thawinak le pawlkom thawinak pawl tuahsak ding kha a ṭuanvo a si,” a ti.

Puai Pawl

(Suah 12.1-20; Pui 23.33-43)

18Cungnungbik Bawipa in, “Thla khat thla, ni khat ni ah raitluan cawcang pakhat nan that pei ih Biakinn nan thiangter pei. 19Puithiam in hi sualthlah thawinak cawcang ih thisen malte cu a lak pei ih Biakinn sangka ṭhuam pawl, biakṭheng kil li parah le a sunglam tualrawn luhnak kotka ṭhuam pawlah a hnih pei. 20Cuih thla ni sarih ni ah cubangtuk ṭhiamṭhiam in tipang sual hrangah siseh, a si lole theih lo sual hrangah siseh, nan tuah pei. Cuticun Biakinn cu nan thianghlimter pei.

21“Thla khat thla, ni hleili ni ah Lantak Puai tuah nan thok pei. Ni sarih sung mi hmuahhmuah in thilnu tel lo sang nan ei pei. 22Puai tuah ni khatnak ni ah mi-uk bawi in amah ih sualnak le misenpi sualnak ruangah cawcang a that pei ih a pek pei. 23Puai tuah ni ni sarih sung nitinte in raitluan cawcang pakhat le tuucang pakhat Bawipa hnenah a pek pei ih a pumte in mei-ur thawinak ah a ur ṭheh pei. Nitinte in mecang pakhat khal sualthlah thawinak hrangah a pek pei. 24An thahmi cawcang pakhat le tuucang pakhat thawn vainim reelkhat le olif hriak pawng thum ciar pek a si pei.

25“Puanthlam Puai cu thla sarih thla ni hleinga ni ah thok a si pei ih ni sarih sung cu nitinte in mi-uk bawi in cubangtuk ṭhiamṭhiam in sualthlah thawinak, mei-ur thawinak le vainim le olif hriak a pek pei,” tiah a ti.

Currently Selected:

EZEKIEL 45: FCL

Highlight

Copy

Compare