EZEKIEL 43

Bawipa Cu Biakinn Ah A Ra

1Cupa cun nisuahnak lam a hoitu kotka ah i hruai ih, 2cutawkah nisuahnak lam ihsin a rami nasa zetih a tleumi Bawipa ih sunlawinak cu ka hmu. Pathian ih aw cu tifinriat tidai huuk thawm bangtuk a si ih leilung cu a nasa zetmi tleunak in a tlet ṭheh. 3Hi langnak cu Jerusalem siatsuah ding ih Pathian a rat lai ih ka hmuhmi le Khebar Tivapi kiangih ka rak hmuhmi langnak bangtuk thotho a si. Cutikah leilung ah ka hlon aw ih ka bok. 4Nasa zetih a tleumi tleunak cu nisuahnak lam kotka sungin a lan ih Biakinn sungah a lut.

5 Bawipa ih thlarau in i cawi ih a laifang tualrawn ah i fehpi; cutawk ihsin Biakinn cu Bawipa ih sunlawinak in a khat ti kha ka hmu. 6Cutawkah ka kiangah mi pakhat a rung ding ih Biakinn sung ihsin Bawipa ka hnenih a ṭong kha ka thei: 7“Milaipa, hitawk ah ka siangpahrang tokham a um. hittawk ah Israel mi lakah hin ka um ding ih kumkhua in ka uk hai ding. Israel mi pawl in siseh, an siangpahrang pawl in siseh khawzing dangdang bia tahrat in, a si lole an siangpahrang ih ruak pawl cu hi hmunah re tahrat in ka hmin thianghlim cu an thangsiatter nawn lo ding. 8Siangpahrang pawl in an inn sung luhnak sangka le an sangka ṭhuam pawl cu ka Biakinn sung luhnak sangka le sangka ṭhuam kiangah an tuah ih cuticun kan karlak ah phar pakhat lawng a um a si. Fihnungza thil tampi tuah tahrat in ka hmin thianghlim an thangsiatter ruangah ka thinheng in ka siatsuah hai a si. 9Atu cun khuavang biak cu an bansan ding ih an siangpahrang ih ruak pawl cu an hlon a ṭul ding. Cutiih an tuah a si ahcun an hnenah kumkhua in ka um ding,” tiah a ti.

10Cuih tlunah Bawipa in, “Milaipa, Israel mi pawl hnenah hi Biakinn thuhla hi sim awla a sak daan tla thei hai seh. An thil tuahsualmi ruangah an ningzakter aw. 11Cule an thil tuahsualmi ruangah ningzahnak caang an thiam a si ahcun an hnenah Biakinn sak daan ding pawl cu simfiang aw: ruang an zingmi, a sung luhnak le a leng suahnak pawl, ziangvek pianhmang a si ding tile ziangvek in thilri hmuahhmuah an ret ding tile a daan le a daan terek pawl hmuahhmuah cu simfiang aw. An hrangah ngan ṭheh awla cuticun ziangvek in thil a um ti an thei ding ih daan hmuahhmuah cu an tuahsuak thei ding. 12Biakinn hrangih daan cu hihi a si: Biakinn umnak tlangpar le a kimvel hmuahhmuah cu hmun thianghlim a si,” a ti.

Biakṭheng

13Biakinn tahnak thotho in tah tikah biakṭheng cu a hnuailam bangtuk in a si. A hramah a kimvel in khur a um ih dong khat thuk le dong khat kau a si. Biakṭheng tlangah a tlangkop a um ih khap khat a sang. 14Biakṭheng a niamnak bik zawn cu a hram a sannak bik ihsin dong hnih a sang. Cule biakṭheng kimvel in dong khat zau in an tuah ih a saannak zawn cu dong li a sang. Cuih hnuah a kimvel in dong khat zau in an tuah lala ih a laifang cu a sang bik. 15Hi a saannak bik zawn, thawinak pekmi pawl an urnak zawn cu dong li sang a si. Hi tlunah a kil li ah ki pali an um. 16Biakṭheng lu, a saannak bik cu dong hleihnih sau le dong hleihnih kau a si ih tungvang can aw a si. 17A laifang zawn khal a tung le a vang an can aw ih dong hleili veve an si. A tlangah tlangkop a um ih khap khat a sang. (A tawhram ih khur a ummi cu dong khat a kau.) Biakṭheng hung fehnak kailawn cu nisuahnak lamah a um.

Biakṭheng Hlannak

18Cungnungbik Bawipa in ka hnenah, “Milaipa, ka lo sim mi hi ṭhatein ngai aw. Hi biakṭheng hi dawl ṭheh a si tikah thawinak ih pekmi sa a parah ur tahrat in le sathi a parah theh tahrat in hlannak na tuah pei. 19Levi phun puithiam Zadok tesinfa pawl lawnglawng keimah riantu ah ka umnak hmunah an lut thei ding. Himi cu Cungnungbik Bawipa keimah thupekmi a si. Sualthlah thawinak hrangah cawcangte na pek ding. 20Cawcang thisen malte na lak pei ih biakṭheng lu ih ki pali ah na hnih pei; biakṭheng laifang zawnih kil pawl tla na hnih pei ih a tlang kimvel khalah na hnih thluh pei. Cuticun biakṭheng cu na thiangter pei ih na hlan pei. 21Sualthlah thawinak hrangih pekmi cawcang cu na lak pei ih biakinn lengah hmun pakhat ah na ur pei. 22A thaisun ah raitluan mecang pakhat na lak pei ih sualthlah thawinak ah na pek pei. Biakṭheng thianternak dingah cawcang thisen thawn na tuah vekin mecang thisen thawn khal in tuah aw. 23Cumi na tuah ṭheh tikah raitluan mi cawcangte le tuucangte la awla, 24ka hnenah rak keng aw. Puithiam pawl in an parah ci an phulh ding ih ka hnenah mei-ur thawinakah an pe ding. 25Nitinte ni sarih sung, mecang pakhat, cawcang pakhat le tuucang pakhat sualthlah thawinak ah nan pek pei. An zatein raitluan an si ṭheh pei. 26Nisarih sung puithiam pawl in biakṭheng cu an thiangter pei ih hman dingah an timlaam pei. 27Zarh khat hnuah cun biakṭheng parah puithiam pawl in thawinak pek an thok pei; misenpi pawl ih mei-ur thawinak le remnak thawinak pawl cu an pek pei. Cuticun nan zate parah ka lung a awi ding. Cungnungbik Bawipa keimah in ka lo sim zo,” tiah a ti.

Currently Selected:

EZEKIEL 43: FCL

Highlight

Copy

Compare