EZEKIEL 42

Biakinn Kiangih Inn Pahnih

1Cupa cun a lenglam tualrawn ah i fehpi ih Biakinn ihsin saklam ih a ummi inn ah i hruai. Cuih inn cu Biakinn ih nitlaknak lam dengih a ummi inn ihsin a hla lo. 2Cuih inn cu dong zakhat a sau ih dong sawmnga a kau. 3Cuih inn khatlam cu Biakinn sau zawng ih a ummi, dong kul a kaumi hmunlawng lam a hoi; a dang khatlam cu a lenglam tual ih lungto phah mi lamzin a hoi. Dot thum in sakmi inn a si ih a tlunta dot cu a hnuaita dot hnakin dunglam ah a pil deuh vivo. 4Cuih inn saklam tluan ahcun fehnak lamzin a um ih dong hra kau le dong zakhat sau a si. Saklam kap in luhnak ong pawl an um. 5Hi inn ih tlunta khaan pawl cu a hnuai ih khaan pawl hnakin an fiak deuh, ziangahtile tlunta dot pawl cu dunglam ah an pil deuh vivo ruangah a si. 6Inn dot thum ih khaan pawl cu cangdawl parih sakmi an si ih tualrawn ih sakmi inn dangdang vek si loin ṭhuam pakhat hman in a do lo. 7-8Hnuaita dot ih lenglam phar cu dong sawmnga sung a khaan dannak um loin a peh aw thluh; dong sawmnga cu inn a saulam ih hrek a si. A dang dong sawmnga ahcun khaan tampi a um. Tlunta bik dot ahcun inn tluan ih khaan lawnglawng a um. 9-10Hi khaan pahnih hnuai, nisuahnak lam inn netnak, phar an dawl thoknak zawn ihsin a lenglam tualrawn ih vung ṭumnak ah lamzin a um.

Biakinn thlanglam kapah Biakinn ih nitlaknak lam dengih inn thawn a hlat lomi hmunah saklam kapih inn vek cekci in inn pakhat a um. 11Inn khaan pawl ih hmaiah cun saklam kapih a um vekin lamzin pakhat a um. Cuih lamzin pawl cu an tia aw thluh, an pianhmang khal an bang-aw ih vung luhnak sangka pawl khal an bangrep aw. 12Cuih inn thlanglam kap khaan pawl hnuai, phar an dawl thoknak nisuahnak lam dengah sangka pakhat a um.

13Mipa cun ka hnenah, “Hi inn pahnih cu an thianghlim a si. Hi inn sungah hin Bawipa ih umnak hmunih a lut theitu puithiam pawl in Bawipa hnenih pekmi thawinak thianghlim bik an ei a si. Inn khaan pawl cu a thianghlimmi an si ruangah thawinak thianghlim bik - sangphut thawinak, sualthlah thawinak, a si lole kuansal thawinak pawl cu puithiam pawl in cutawkah an ret ding. 14Biakinn sungah puithiam pawl an luh hnuah a lenglam tualrawn ih an feh duh a si ahcun Bawipa ih hna an ṭuan tikih an hrukmi hnipuan pawl an hlit pei ih hi innkhaan ah an ret pei. Mipi pumkhawmnak hmunih feh an duh a si ahcun hnipuan dang an hruk hmaisa pei.

Biakinn Hmun Tahnak

15Cupa cun Biakinn sung a tah ṭheh hnuah nisuahnak lam kotka in i suahpi ih Biakinn lenglam ih hmun pawl a tah. 16A tahfung cu a lak ih nisuahnak lam a tah ih dong za nga a ti. 17-19Cuih hnuah saklam kap a tah; thlanglam le nitlaknak lam khal a tah ih an zatein dong za nga an ti fingfing. 20Cutiin phardawl ih a kulhmi hmun cu dong za nga kau, za nga sau hmun a si. Cuih phardawl cu a thianghlimmi le a thianghlim lomi ramri ṭhentu ah a cang.

Currently Selected:

EZEKIEL 42: FCL

Highlight

Copy

Compare