EZEKIEL 4
4
Jerusalem An Kulhnak Ding A Hmuhsak
1Pathian in, “Milaipa, tlakrawh la awla na hmaiah re aw; a parah Jerusalem khawlipi zuk suai aw. 2Cule ral in Jerusalem an kulhnak langternak ah kahsam laihmi, leilung dawlmi, ralkap umnak le ralhruang sutsiatnak pawl a kimvel ah tuah ṭheh aw. 3Thirpheng la awla nangmah le khawpi karlak ahcun phar bangin song aw. Khawpi lam hoi aw. Khawpi cu kulh ṭheh a si ih a kulhtu cu nangmah na si ding. Himi cu Israel miphun hrangah hminsinnak a si ding.
4-5“Cule na kehlam sir zawng in it awla Israel miphun mawhnak cu na parah ka suang ding.#ka suang ding timi hi Hebru Baibal ahcun na suang ding tin a um. An mawhnak ruangah cuticun ni zathum le sawmkua sung cutawkah na um ding ih na tuar ding. Na ni khat tuarmi cu an kum khat tuar dingmi ai ah ka relcat zo. 6Cu ṭheh in her awla na vorhlam sir zawng in it in Judah mi mawhnak ruangah ni sawmli sung tuar aw: ni khat na tuarmi cu an kum khat tuar ai a si ding.
7“Ral in Jerusalem an kulh ṭhehnak cu ṭhatein zoh aw. Cuih khawpi lam hoi in na kuttum vai awla a parih thu cu sim suak aw. 8Hri in ka lo ṭem ding ih Jerusalem an kulhnak a reh hlanlo na sir na her thei lo ding.
9“Sangvut, barli sangvut, bete, phiang, laifang le fangtlor malte ciar la awla kheng sungih na rawi ṭheh hnuah sangah tuah aw. Cuih na tuahmi cu na kehlam sir in ni zathum le sawmkua sung na ei ding mi a si. 10Ni khatah rawl pawng hnih lawng na ei ding ih cuih pawng hnih cu a thaisun tiang lo daihseh. 11Tidai khal na duh zat in na in thei lo ding; ni khatah khuat hnih lawng na ngah ding. 12Milai eek caar in meisa na muah pei ih cuih meisa vaam ah sang na rawh pei ih mi hmuahhmuah ih an lo hmuh theinak ah na ei pei.
13 Bawipa in, “Himi cu daan ih a khammi rawl #khammi rawl timi hi Pui 11 ah zoh aw. pawl kha Israel mi pawl in ram dangdang i ka ṭhekdarh tikah ziangvekin an ei ding, ti langternak dingah a si,” a ti.
14Sikhalsehla kei in, “Asilo, Cungnungbik Bawipa! Thil borhhlawh ka dai dah lo. Ka sentet lai ihsin mahte thimi sa siseh, sahrang ih dehmi sa siseh ka ei dah lo. A thiang lomi rawl ka ei dah lo a si,” tiah ka ti.
15Cutikah Pathian in, “Cuti asile, milai eek si loin caw eek hmang awla sang cu rawh aw,” a ti.
16Cuih tlunah Pathian in, “Milaipa, Jerusalem khawpi in rawl a ngah ṭheumi cu ka phiatsak ding. Khawsungih a ummi pawl cu an ei dingmi rawl le an in dingmi tidai ngaihtuah na ah donhar le riahsia in an um ding. 17In le ei ding ti le rawl an nei lo ding; riahsia in an um ding ih an sualnak ruangah an tisa a cem zutzo ding,” tiah a ti.
Currently Selected:
EZEKIEL 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.