EZEKIEL 37

Ruh Ro In A Khat Mi Phairawn

1Pathian ih ban thacak cu ka hnenah a um; a thlarau in i lak ih ruh hlir in a khatmi phairawn ah i ret. 2Cuih phairawn hmun kipah i hruai ih ruh tam ngaingai ka hmu, cuih ruh pawl cu an ro ngaingai. 3Anih in, “Milaipa, hi ruh pawl hi an nung thei sal pei maw?” tiah i sut.

Kei in, “Cungnungbik Bawipa, nangmah lawngin na thei,” tiah ka sawn.

4Anih in, “Ruh pawl hnenah profet ṭong in phuangsuak aw. Bawipa ih ṭongkam ngai dingah hi ruh ro pawl hi sim aw. 5Cungnungbik Bawipa keimah in an hnenih ka ṭongmi cu hiti in a si, an hnenah sim aw: Nan sungah thaw #thaw timi hi thlarau a si lole thli ti khal a si thei. ka khum ding ih ka lo nungter ding. 6Thahri ka lo pe ding, titsa in ka lo tuam ding ih vun in ka lo khuh ding. Nan sungah thaw ka khum ding ih nan nungsal ding. Cuticun Bawipa ka si hi in thei ding,” tiah i ti.

7Curuangah i sim vekin profet ṭong in ka phuang. Cutiih ka phuan laiah rinlopi in khawng-aw ruihromi thawmvang ka thei ih ruh pawl cu pakhat le pakhat an peh aw rupro. 8Ka zoh cuahco laiah cun ruh pawl cu thahri an hun nei ih titsa in a tuam ih vun in a khuh hai. Asinain an ruangpi sungah cun thaw a um lo.

9Pathian in ka hnenah, “Milaipa, thli#thli timi hi thlarau a si lole thaw ti khal a si thei. hnenah sim aw. Cungnungbik Bawipa in: ‘Maw thli, khuazakip ihsin ra awla hi miruak pawl sung ahhin thaw thawtkhum awla nungter hai aw, tiah thu a lo pek,’ tiah ti aw,” i ti.

10Cule i sim vek cun ka ti. Cuih titsa ruang pawl sungah cun thaw a lut ih an nung ih an ding. Ralkap burpi zat in an tam.

11Cule Pathian in, “Milaipa, Israel mi pawl cu hi ruh bangtuk an si. Kan ro ṭheh zo ih hmailam ruahsannak zianghman kan nei lo an ti. 12Curuangah profet ṭong in phuang awla Bawipa Pathian keimah ih simmi hi than aw: Keimah in an thlaan pawl cu ka ong ding. Ka suahter ding ih Israel ramah ka kirter hai ding. 13Ka minung pawl an phumnak thlaan pawl ka on ih ka suahter hai tikah cun keimah hi Bawipa ka si kha in thei ding. 14An sungah ka thaw ka khum ding, ka nungter hai ding ih anmah ih ramah ka umter ding. Cuticun keimah hi Bawipa ka si kha in thei ding. Hi bangtuk in ka tuah ding tiah thu ka tiam zo ih ka tuah suak rori ding. Bawipa keimah in ka sim zo a si,” tiah a ti.

Judah Le Israel Uknak An Kom Aw

15 Bawipa in ka hnenah, 16“Milaipa, fung pakhat la awla a parah ‘Judah ukmi ram,’ tiah ngan aw. Fung dang pakhat la awla a parah ‘Israel ukmi ram,’ tiah ngan aw. 17Cule na kut sungih fung pahnih zim cu pehton awla cuticun fung pakhat a bang ding. 18Cule na minung pawl in a tican an lo suh tikah, 19Cungnungbik Bawipa keimah in Israel ai ah fung ka la ding ih Judah ai ih fung thawn ka re tlang ding a ti, tiah sim aw. Fung pahnih cu pakhat ah ka tuah ding ih ka kut sungah ka huum ding.

20“Fung pahnih cu na kut sungah huum awla mi pawl in hmu hai seh. 21Cungnungbik Bawipa ih ka simmi cu than aw: Ka minung pawl cu an vahvaihnak miphun tampi sungin ka hruai kir ding, ka finkhawm ding ih an ramah ka kirter ding. 22An ramsung Israel tlangpar ah miphun pakhat ah ka kom ding. Anmah uktu ah siangpahrang pakhat an nei ding ih miphun pahnih an si nawn lo ding; uknak pahnih khalah an ṭhen aw nawn lo ding. 23Fihnungza milem pawl thawn an borhhlawh awter nawn lo ding; sualnak thawn khal in an baal awter nawn lo ding. An sualih keimah in zuarthlainak lamzin hmuahhmuah in ka luatter ding. Ka thiangfaiter ding; ka minung an si ding ih an Pathian ka si ding. 24I riantu David bangtuk a si mi siangpahrang cu an siangpahrang a si ding. Uktu bawi pakhat hnuai ah an kom aw ṭheh ding ih ka daan pawl cu feltein an thlun ding. 25I riantu Jakob hnenih ka pekmi ram, an pupa pawl an rak umnak ramah an um ding. Cutawkah kumkhua in an um ding ih an faate pawl le an tesinfa pawl tla kumkhua in an um ding. I riantu David bangtuk a si mi siangpahrang in kumkhua in a uk ding. 26Kumkhua in humhim an si theinak dingah anmah thawn thukamnak ka tuah ding. Ka hngetkhohter ding ih ka karhzaiter hai ding; an ram sungah ka Biakinn a din ringringnak dingah ka ngaihtuah ding. 27An hnenah keimah ka um ding; an Pathian ka si ding ih ka minung an si ding. 28Anmah lakah kumkhua um dingin ka Biakinn ka ret tikah cun ka minung si dingih Israel mi pawl ka hril kha miphun pawl in an thei ding,” tiah a ti.

Currently Selected:

EZEKIEL 37: FCL

Highlight

Copy

Compare