SUAHLANNAK 7

1Cutikah Bawipa in Moses hnenah, “Zohhnik, Faro hnenah nangmah cu Pathian bangtuk ah ka lo tuah pei ih, na u Aaron cu a hnenah na profet bangtuk in thu a sim ding. 2Thu ka lo pekmi hmuahhmuah Aaron na sim pei ih, amah in Faro hnenah a ramsung ihsin Israel mi suakter dingin a sim pei. 3Sikhalsehla Faro ih thinlung cu ka hakter pei ih Izipt ram sungah mangbangza a phunphun ka tuah khalle, 4Faro in nan thu a ngai lo ding a si. Cutikah an ram cu napi in ka hrem pei ih Izipt mi pawl cu nasa zetin cawhkuan ka pe pei; cutiin ka minung Israel mi pawl cu a bur a bur in Izipt ram ihsin ka hruaisuak hai ding. 5An ram ihsin Israel mi ka hruaisuak ih an tlunih ka baan thacak ka hawi tik lawngah Izipt mi pawl in Bawipa ngaingai ka si ti in thei ding,” tiah a ti. 6Bawipa ih a fial bangtuk in Moses le Aaron in an tuah. 7Faro hnenih thu an va sim tikah Moses cu kum sawmriat a si ih Aaron cu kum sawmriat le kum thum a si.

Aaron Ih Kianghrol

8 Bawipa in Moses le Aaron hnenah, 9“Faro in, ‘Ziangngai nan si le si lo, mangbangza cu tuah hnik hmen uh,’ a lo ti asile, nang Moses in Aaron hnenah, ‘Na kianghrol la awla Faro hmaiah hlon aw; cule rulah cangter aw,’ na ti pei,” tiah a ti. 10Moses le Aaron cu Faro hnenah an feh ih Bawipa ih thupek vekin an tuah. Faro le a kuthnuai bawi pawl ih hmaiah Aaron in a kianghrol cu a hlon ih rulah a cang ngaingai. 11Cule Faro in a mifim pawl le a dawithiam pawl a ko ih an dawithiamnak in Aaron ih tuah vekin an tuah ve. 12An kianghrol cu an hlon ih rulah an canter ve. Asinain an rulpi pawl cu Aaron ih rul in a dolh thluh. 13Sikhalsehla Bawipa ih a sim cia bangtuk in Faro ih thinlung cu a hak ngaingai ih Moses le Aaron ih thu cu a ngai duh hrimhrim lo.

Izipt Ram Ah Mangbangnak A Thleng

Thisen

14Cun Bawipa in Moses hnenah, “Faro ih thinlung cu a hak ngaingai. Ka minung pawl cu a thlah duh lo a si. 15Faro cu zinglamih Nail tiva-ih a feh tikah va tong aw. Tivapi kap in rak hngak awla, rulih a cang dahmi kianghrol kha keng aw. 16Cule Faro hnenah, ‘Hebru mi pawl ih Pathian Bawipa in na hnenah i thlah ih, ka minung pawl in ramṭhing ah in biak theinak dingah ka minung pawl cu thlah seh, a lo ti. Asinain atu tiang cu a thu na ngai lo. 17Bawipa ih thu cu hiti in a si: Bawipa ka sinak cu ka tuah dingmi thil in na thei ding. Zohhnik, hi kianghrol hin tivapi ih tidai cu ka vuak pei ih tidai cu thisen ah a cang ding. 18Nga hmuahhmuah an thi thluh ding ih tiva cu a nam tuk lawmmam ding ruangah Izipt mi pawl in tivapi ih tidai cu an in thei lo ding,’ tiah na va ti pei,” a ti.

19Cun Bawipa in Moses hnenah, “Aaron kha, ‘Na kianghrol la awla Izipt ram sungih a ummi tiva siseh, tihriat siseh, tili siseh, tidai hmuahhmuahih tlunah na kianghrol cu thlir aw. Tidai cu thisen ah a cang ding ih Izipt ramsung khuazakip ah, tikuang sungih tidai le lungbeel sungih an khawlmi tidai tiangin thisen ah an cang thluh ding,’ tiah sim aw,” a ti.

20 Bawipa ih a fial bangtuk in Moses le Aaron in an tuah. Faro le a kuthnuai bawi pawl ih hmai rori-ah Aaron in a kianghrol cu a thlir ih tivapi cu a thawi. Cuvete in tidai cu thisen ah a cang ṭheh. 21Tiva sungih nga hmuahhmuah an thi ṭheh; curuangah a nam ngaingai ih Izipt mi pawl in tiva ih tidai cu an in thei lo. Izipt ram cu thisen lawnglawngin a khat. 22Cun Izipt ramih dawithiam pawl in an dawi in cubangtuk cu an tuah ve. Faro ih thinlung cu a hah keelin a hak thotho. Bawipa ih a rak sim cia vekin Moses le Aaron ih thu cu a ngai hrimhrim lo. 23Hi bangtuk mangbangza hman cu poisa loin Faro cu a siangpahrang innpi ah a kir. 24Cule Izipt mi pawl cun tiva ih tidai an in thei nawn lo ruangah tiva kapah tikhur an lai ciamco.

25 Bawipa in tiva a vuak hnuah ni sarih a rei.

Currently Selected:

SUAHLANNAK 7: FCL

Highlight

Copy

Compare