SUAHLANNAK 6

1Cutikah Pathian in Moses hnenah, “Atu thok ihsin Faro hnenih ka thil tuah dingmi cu na hmu ding. Israel mi pawl thlah dingah ka kut cak in ka hneek ding. Thungai in tile ka kut cak ih ka hneek hnuah cun amah hrimhrim in a ram sung ihsin a dawi hai ding a si,” tiah a ti.

Pathian In Moses A Ko Sal

2Pathian in Moses hnenah, “Keimah cu Bawipa ka si. 3Ziangkimtithei Pathian#6.3 Ziangkimtithei Pathian: timi hi Hebru ṭong in El Shaddai an timi a si. tiin Abraham, Isaak le Jakob hnenah ka lang. Asinain an hnenah Bawipa timi ka hmin in ka lang-awter lo. 4Cule ramdang mi bangtuk ih an rak um dahnak Kanaan ram cu ka lo pe ding, tiah anmah thawn thukamnak ka tuah zo. 5Atu-ah Izipt mi pawl in salih an kaihmi Israel mi pawl aihramnak cu ka thei ih ka thukam cu ka ciing ṭha a si. 6Curuangah nangmah in Israel mi hnenah ka thu cu na sim pei, ‘Keimah cu Bawipa ka si. Izipt mi pawl in hramhram ih an lo ṭuantermi hnaṭuan khunghar sung ihsin ka lo luatter ding. An sal nan sinak sungin ka lo run ding. Ṭihnungza hremnak thawn an thu ka ṭhen ding ih ka baan thacak thawn ka lo humhim hai ding. 7Ka minung ah ka lo tuah ding ih Keimah cu nan Pathian ka si ding. Izipt mi pawl in nan parih an suanmi hnaṭuan khunghar sung ihsin a lo suahtu Bawipa nan Pathian ka si kha in thei ding a si. 8Abraham, Isaak le Jakob hnenih ka hmin saal in ka kam ciami ramah ka lo thlenpi hai ding. Cuih ram cu nanmah ih ta si dingin ka lo pe ding. Keimah cu Bawipa ka si,’ a ti tiah va sim aw,” tiah a ti. 9Pathian ih a sim bangtuk in Moses in Israel mi hnenah a sim. Asinain Moses ih thusimmi cu an ngai lo; ziangahtile an saltuarnak cu a na tuk ih an thin a pit ih an bei a dong ṭheh ruangah a si.

10Cutikah Bawipa in Moses hnenah, 11“Izipt siangpahrang Faro hnenah feh awla, Israel mi pawl cu na ramsung ihsin na suakter hrimhrim pei, tiah va ti aw,” tiah a ti.

12Asinain Bawipa ih hnenah Moses in, “Israel mi hman in ka thu in ngai lo a si ahcun ziangtinso Faro cun i ngai ding? ṭong lam ahcun ka hlawhsam tuk lawmmam a si,” tiah a ti.

13Cule Bawipa in Moses le Aaron cu Izipt ramsung ihsin Israel mi pawl hruaisuak tengteng dingih a thlahmi an si ti cu Israel mi pawl le Izipt siangpahrang sim dingin a fial.

Moses Le Aaron Ih Thawhkehnak

14An sungkhat ih cithlahtu pawl cu hihi an si. Israel ih fatir Reuben ih fapa-ah Hanok, Pallu, Hezron, le Karmi an si. Hihi Reuben ih sungkhat tesinfa cithlahtu an si. 15Simeon ih fapa-ah Jemuel, Jamin, Ohad, Jakhin, Zohar le Kanaan nu-ih fapa Shaul tla an si. Hihi Simeon ih sungkhat tesinfa cithlahtu an si. 16Levi ih fapa pawl ih hmin cu, an tefa pawl thawn, Gershon, Kohath le Merari an si. Hihi Levi ih sungkhat cithlahtu an si. Levi cu kum za le sawmthum le kum sarih a nung. 17Gershon ih fapa pawl cu Libni le Shimei an si ih tefa tampi an nei. 18Kohath ih fapa pawl cu Amram, Izhar, Hebron le Uzziel an si. Kohath cu kum za le sawmthum le kum thum a nung. 19Merari ih fapa pawl cu Mahli le Mushi an si. Hi pawl cu Levi ih sungkhat, an tesinfa pawl ih thuanthu thawn an si.

20Cun Amram in a pa ih farnu Jokhebed a ṭhit ih Aaron le Moses a hrin. Amram cu kum za le sawmthum le kum sarih a nung. 21Izhar ih fapa pawl cu Korah, Nefeg, le Zikhri an si. 22Uzziel ih fapa pawl cu Mishael, Elzafan le Sithri an si.

23Aaron in Amminadab ih fanu, Nahshon ih farnu Elisheba a ṭhi ih Nadab, Abihu, Eleazar le Ithamar a hrin. 24Korah ih fapa pawl cu Assir, Elkanah, le Abiasaf an si. Hihi Korah mi pawl ih sungkhat an si. 25Aaron ih fapa Eleazar in Putiel ih fanu lakah pakhat a ṭhit ih Finehas a hrin. Hihi an sungte ciar in Levi miphun ih cithlahtu pawl an si.

26Hi Aaron le Moses hi Bawipa in, “Izipt ram ihsin Israel mi pawl cu suakter uh,” tiih a fialmi cu an si. 27Izipt siangpahrang hnenah Israel pawl Izipt ram ihsin thlah dingin a va simtu cu anmah thotho an si.

Moses Le Aaron Hnenah Bawipa ih Thupekmi

28Izipt ramih Moses hnenah Bawipa in thu a sim tikah, 29“Keimah cu Bawipa ka si. Ka lo simmi hmuahhmuah cu Izipt siangpahrang hnenah va sim aw,” tiah a ti.

30Asinain Moses in Bawipa hnenah, “ṭong lamah cun ka hlawhsam tuk lawmmam. Ziangtin so Izipt siangpahrang in ka thu cu a ngai duh ding?” tiah a ti.

Currently Selected:

SUAHLANNAK 6: FCL

Highlight

Copy

Compare