SUAHLANNAK 40

Pathian Hnenah Puanthlam Hlannak

1 Bawipa in Moses hnenah, 2“Thla hmaisa bikih ni khat ni-ah Bawipa ih Umnak Puanthlam cu nan din pei. 3Cuih thlam sungih Thukam Kuang sungah Thukham Pahra cu nan ret pei ih thingkuang cu puanzar phenah nan ret pei. 4Cabuai khal nan ret pei ih a thilri pawl khal a parah na ret pei. Meivannak fung ret uhla a parah mei nan vang pei. 5Thukam Kuang ih hmaizawn ah zihmui rimthaw urnak sui ih tuahmi biakṭheng cu nan ret pei ih luhnak sangka ah puanzar nan thlai pei. 6Cule Puanthlam ih hmaiah mei-ur thawinak biakṭheng cu nan ret pei. 7A cuih biakṭheng le Puanthlam karlakah kut kholhnak kheng nan ret pei ih a sungah tidai khal nan ret pei. 8A kulhnak pawl cu nan bun thluh pei ih luhnak kotka ah puanzar khal nan thlai pei.

9“Cun hriak nan lak pei ih, Pathian Umnak Puanthlam le a sungih a ummi hmuahhmuah nan culh pei. Cubangtuk in Puanthlam le a thilri hmuahhmuah cu Pathian hnenah nan hlan pei ih inn thianghlim ah a cang ding. 10Mei-ur thawinak biakṭheng le a thilri pawl khal hriak nan culh pei. Cubangtuk in Pathian hnenah nan hlan pei ih a thianghlim zetmi biakṭheng a si ding. 11Kut kholhnak le a tawdam khal hriak nan culh pei ih cubangtuk in Pathian hnenah nan pek pei.

12“Aaron le a fapa pawl cu Puanthlam sangka ah ra hai sehla tidai in kholh-aw hai seh. 13Aaron cu hnipuan thianghlim pawl hrukter uhla ka hrangih puithiam hna a ṭuan theinak dingah hriak culh in thianghlimter uh. 14A fapa pawl khal a kiangah ra hai sehla angki hrukter uh. 15An pa hriak nan culh vek thothoin a fapa pawl khal hriak culh uh; cuticun ka hrangah puithiam hna an ṭuan ding. Hriak culhmi an si ruangah kumkhua in puithiam hna an ṭuan ding a si,” tiah a ti.

16 Bawipa ih thupek vekin Moses in a tuah. 17Cuhrangah Izipt ram an taan hnu kum hnihnak, thla hmaisa bikih ni khat ni-ah Bawipa ih Umnak Puanthlam cu an dingter. 18Amah Moses rori in a dingter a si. Moses in ṭhuam tawdam pawl cu a ret ih ṭhuam pawl cu a phun; phartlang pawl khal a bun ih phar pawl khal a song ṭheh. 19A khuh pawl cu a pharh ih Bawipa ih thupek vekin Puanthlam cu a khuh. 20Cun thukham ngannak lungpheng pawl cu a lak ih Thukam Kuang sungah a ret. Zawnfung pawl cu thingkuang parih thlaihmi a kual sungah a hrolh ih thingkuang cu a sin. 21Pathian umnak Puanthlam sungah Thukham Kuang cu a ret ih lang lo dingin puanzar in a phenter. Bawipa ih thupek bangtuk in thukham ngannak lungpheng pawl retnak kuang cu puanzar in hitivek in a phenter a si.

22Puanthlam sungah cun cabuai khal a ret; thlam sung saklam kap deuhah puanzar lengah a ret ih, 23Bawipa ih thupek vekin Bawipa ih hrangih hunmi sang cu cabuai parah a ret. 24Thlam sung thotho ahcun thlanglam kap cabuai ih siir zawn ah meivannak fung a ret. 25Bawipa ih thupek vekin Bawipa ih hmai ahcun meivannak parih van dingmi mei-inn pawl a ret. 26Sui ih tuahmi zihmui rimthaw urnak biakṭheng cu puanzar hmai zawn ah a ret. 27Cuih biakṭheng parah Bawipa ih thupek bangtuk in zihmui rimthaw cu mei in a ur. 28Puanthlam sung luhnak sangka ah puan a zaar. 29Mei-ur thawinak hrangih biakṭheng cu sangka hmaiah a ret. Cuih biakṭheng parah pekmi rawl a ret ih mei-ur thawinak khal a tuah ih Bawipa ih thupek vekin sa pawl cu cem koin a kangter thluh. 30Cuih biakṭheng le Puanthlam karlakah kut kholhnak kheng a ret ih kholh awknak dingah tidai khal a ret. 31Cuih tidai cun Moses, Aaron le Aaron ih fapa pawl in an kut le an ke an kholh. 32Bawipa ih Puanthlam sungih an luh tikah siseh, biakṭheng ih an feh tikah siseh, Bawipa ih thupek vekin an kholh-aw hmaisa ṭheu. 33Puanthlam le biakṭheng kimvelih kulhnak hruang tla cu Moses in a tuah ṭheh ih kulhnak kotka khalah puan a zaar. Cuticun Moses in hnaṭuan hmuahhmuah cu a ṭheh.

Bawipa ih Puanthlam Tlunih Mero

(Mipum 9.15-23)

34Puanthlam cu mero in a tuam ih Bawipa ih sunlawinak tleu in a khat. 35Cutiin Bawipa ih sunlawinak tleu in a khah ruangah a sungah Moses a lut thei lo. 36Hmunkhat ihsin hmun dangih Israel mi pawl an ṭhawn tikah Pathian umnak Puanthlam ihsin mero a kian tik lawnglawngah an ṭhawn ṭheu. 37Mero a kiang lo asile hmun dangah an ṭhawn lo. 38Ramṭhing lakih an vahvaih sung hmuahhmuahah Bawipa an hnenah a um ti langternak ah Puanthlam tlunah sunah mero an hmu ih zanah mei a vang ringring ti an hmu.

Currently Selected:

SUAHLANNAK 40: FCL

Highlight

Copy

Compare