SUAHLANNAK 39

Puithiam Hrangah Hnipuan An Tuah

(Suah 28.1-14)

1Puithiam pawl in hmun thiang sungah hnaṭuan caanih an hruh dingah tuuhmul in mepian, sendup le a senmi hnipuan sunglawi an tuah. Moses hnenih Bawipa ih thupek vekin Aaron hrang khalah hnipuan thianghlim an tuah.

2Ṭaangthlaih angki thianghlim cu sui, mepian, sendup le a senmi tuuhmul le phiarmi puan mankhung thawn an tuah. 3Sui cu a tlep a tlep i a phel hnuah mepian, sendup le a senmi pat lakah mawizetih ṭelhcih theih dingin paatete in an aat sal. 4Cuih ṭaangthlaih angki sihnak ah liangbah hri an tuah ih a sir ah an sih veve. 5Mawizet ih tahmi taikhap cu acuih liangbah hri pahnih thawn an peh-aw. Moses hnenih Bawipa ih thupek vekin hi taikhap khal hi sui, mepian, sendup le a senmi tuuhmul le phiarmi puan mankhung a si. 6A senmi lungmankhung an taat ih a kimvel ihsin sui in an khap. Lung parih mi hmin an kher ṭheu vekin Jakob fapa hleihnih pawl ih hmin cu cuih lungmankhung parah cun an kher. 7Moses hnenih Bawipa ih thupeknak bangtuk in, Israel miphun hleihnih pawl theihsaalnak lungmankhung ih cang dingin liangbah hri pawl parah cun cuih lungmankhung pawl cu an ben.

Puithiam Sang Ih Ṭaangben

(Suah 28.15-30)

8Ṭaangthlaih angki vekin mawizet ih ṭelhmi ṭaangben tla cu an tuah. Sui, mepian, sendup le a senmi tuuhmul le phiarmi puan mankhung in an tuah. 9A tung le a vang an can-aw ih bil hnih ah an bil; zungpi bok pakua a saumi le a kaumi a si. 10Cuih ṭaangben parah lungmankhung tlar li an ben: tlar khatnak ah a sen, a mepian le a sendupmi lungmankhung an ben. 11Tlar hnihnak ah a taangphaw, a pawl le daimon lungvar an ben. 12Tlar thumnak ah sendup, a sen le a engmi lungmankhung an ben. 13Tlar linak ah tangphaw, sendup le a varmi lungmankhung an ben. Hi lungmankhung pawl cu an kimvel in sui in an vel. 14Lungmankhung hleihnih an ben ih a parah Jakob fapa hleihnih pawl hmin kher in an ngan. Hmin khermi vekin an kher ih lungmankhung pakhat parah Israel miphun pakhat hmin ciar an kher fingfing. 15Ṭaangben hrangah hrihrual bangtuk in a hrual-awmi sui hlir in sui ṭhi an tuah. 16Sui tlangkap pahnih le sui kual pahnih an tuah ih sui kual pahnih cu ṭaangben ih tlunlam kiil veve-ah an ben. 17Cuih sui kual pahnih ah sui hri pahnih an khit ih, 18sui hri khatlam zim pahnih cu sui tlangkap pahnih ah an khih. Cuticun ṭaangthlaih angki ih hmailam liangbah parah sui tlangkap pahnih cu an thlaih. 19A dang sui kual pahnih an tuah ih ṭaangben hnuailam kiil veve ah a sunglam zim ṭaangthlaih angki sangtu-ah an sih. 20Sui kual pahnih an tuah lala ih ṭaangthlaih angki hmailam liangbah hnuailam ah an khit ih ṭhazet ih tahmi taikhap tlunlam ah an sih. 21Ṭaangben parih sui kual pahnih cu ṭaangthlaih angki ih sui kual pawl thawn mepian hrihrual in an ṭawnkom ih cuhrangah ṭaangben cu taikhap ih tlunah seep puakpo lo-in, Moses hnenih Bawipa ih thupek vek cekci in ṭaangben cu a bek thlepthli.

A Dang Puithiam Thuam An Tuah

(Suah 28.31-43)

22Ṭaangthlaih angki hnuai ih hrukmi angki fualpi cu mepianmi tuuhmul hlir in an tuah. 23Angki fualpi-ah lu hrolhnak ong pakhat an tuah. Cuih ong kimvel cu an hruk tikah tlek lo dingin a tlang an khul. 24Cuih angki hnuailam zim cu mepian, sendup le a senmi tuuhmul le puan mankhung pawl in tale rah cuangin an ṭelh. 25Sui hlir in khingte an tuah ih tale rah karlak hnuailam zim kimvelah khingte cu an thlaih. 26Moses hnenih Bawipa ih thupek vekin puithiam hna an ṭuan ih an hrukmi angki fualpi ih thuailam zim kimvelah tale rah zuk ṭelhmi le khingte thlaihmi an um.

27Aaron le a fapa pawl hrangah puan mankhungih tahmi angki pawl an tuah; 28cule lupawng le lukhum tla puan mankhung in an tuah ih, bawngbi tawi pawl cu phiarmi puan mankhung in an tuah. 29Tai ṭemnak cu Moses hnenih Bawipa ih thupeknak vekin phiarmi puan mankhung le mepian, sendup le a senmi tuuhmul thawn an tuah ih mawizetin an ṭelh. 30Sui hlir in calben thianghlim an tuah ih cakhennak parih cangan bangin a parah, “Bawipa hnenih pekmi,” tiah an khen. 31Moses hnenih Bawipa ih thupekmi vekin cuih calben pheng cu an lupawng parah an ṭemcih.

Hnaṭuan An ṭheh

(Suah 35.10-19)

32 Bawipa ih umnak inn Puanthlam cu an ṭheh. Moses hnenih Bawipa ih thupek vekin Israel pawl in an tuah ṭheh. 33Bawipa ih umnak inn Puanthlam le a thilri pawl, puan awhnak, phar le phartlang, a ṭhuam le a ṭhuam tawdam pawl; 34a par khuh hrangah tuucang phaw a senih buhmi, a khuh sintu-ah saphaw ṭha le a khaptu dingih puanṭha mankhung pawl; 35lungpheng pahnih an retnak Thukam Kuang le a sin le a zawnfung pawl; 36cabuai le cabuai ih thilri le Pathian hrangih hunmi sang; 37sui hlirih tuahmi meivannak fung, a meivannak, meivanmi a tlar ih ret ding pawl, a thilri dangdang le meivannak hrangih siti pawl, 38sui ih tuahmi biakṭheng, hriak culhnak hrangih siti, zihmui rimthaw, thlam sung luhnak sangka puanzar, 39darih tuahmi biakṭheng, khohriik vek darpheng, a zawnfung pawl le a thilri hmuahhmuah, kut kholhnak kheng le a tawdam; 40kulhnak hrangah puanzar, kulhnak ṭhuam le ṭhuam tawdam pawl, kulh luhnak puanzar, a hridai pawl le puanthlam hrangih thil bah-nak pawl, Pathian Umnak Puanthlam sungih hnaṭuan tikah a ṭulmi thilri hmuahhmuah; 41hmunthiang sungih hnaṭuan tikah puithiam pawl ih hrukmi hnipuan sunglawi, puithiam hna an ṭuan tikah Aaron le a fapa pawl ih hruk dingmi hnipuan thianghlim pawl cu Moses hnenah an rak keng. 42Moses hnenih Bawipa ih thupek vekin Israel mi pawl in hnaṭuan cu an ṭheh. 43An tuahmi hmuahhmuah cu Moses in ṭhatein a zoh ih Bawipa ih thupek vekin an tuah ṭha a si, tiah a hmu. Cuhrangah cupawl cu Moses in thluasuah a pek.

Currently Selected:

SUAHLANNAK 39: FCL

Highlight

Copy

Compare