DAAN PEKSALNAK 9

Bawipa Ih Thu An Ngai Lo

1“Maw Israel mi pawl, ngai uh! Tuih ni ah Jordan tiva nan tan thlang ding ih nanmah hnakin a tum deuh le a cak deuhmi miphun pawl ih umnak ram nan luah ding. An khawpi pawl cu an tum zetzet ih an ralhruang pawl cu van an tiang. 2An minung pawl cu an sang ih an cakzet fawn; Anakim timi mikei vek phun an si ih ‘Zovek hmanih neh ding rual an si lo,’ an ti ṭheu mi cu nan theih zomi a si. 3Sikhalsehla tuihsun ah nan mithmuh ah Bawipa nan Pathian cu nan hmaiah meisa hlio bangin a feh ding. Hmaiah nan nor deuhdeuh ding tikah amah in a neh ding ih a lo kam cia bangtuk in nan ral pawl cu nan dawisuak ding ih nan siatsuah ṭheh ding.

4“Cutiin Bawipa nan Pathian in a dawisuak tikah, ‘Mi ding kan si ruangah hi ram luah dingin in thlenpi a si,’ tiah ti hlah uh. Mi ding nan si ruangah a si lo; hi miphun pawl hi miṭha lo tuk an si ruangah Bawipa in a dawisuak a si sawn. 5Mi ṭha nan si ruangah le thil dik nan tuah ruangah Bawipa in an ram a lo pek a si lo. Hi miphun pawl an ṭhat lo ruangah le nan pupa Abraham, Isaak le Jakob pawl hnenih thukamnak a tuahmi a kimter tum ruangah a dawisuak ding a si. 6Pek tlak nan si ruangah hitluk ram ṭha hi Bawipa in a lo pe ding a si lo, ti cu fiangtein thei uh. Thungai-ih ti ahcun nannih cu milungruh phun nan si.

7“Cule nelrawn ah ziangbangtuk in Bawipa nan Pathian cu a thin nan hengter ti tla hngilh hlah uh. Izipt ram ihsin nan suah ni thokin tuihsun hitawk nan thlen ni tiangah hin Bawipa cu nan dodal ringring. 8Sinai tlang hmanah Bawipa cu a thin nan hengter; nanmah siatsuah ṭheh duh tiangin a thin a heng a si. 9Bawipa in nanmah thawn thukamnak a tuahmi ngannak lungpheng pawl la dingah tlangpar ah ka hung feh. Cutawk ahcun ni sawmli le zan sawmli ka um ih zianghman ka in ka ei lo. 10Cuih hnuah Bawipa in lungpheng pahnih i pek. Tlang parih nan tonkhawm awk ni ah meisa sungin nan hnenih a ṭongmi pawl kha amah ih kut rori in hi lungpheng parah a ngan. 11A si! Ni sawmli le zan sawmli hnuah thukam a ngannak lungpheng pahnih cu Bawipa in i pek a si.

12“Cule Bawipa in ka hnenah, ‘Zamrangte in tlangpar ihsin vung ṭum aw; ziangahtile na minung pawl, Izipt ram in na hruaisuak mi pawl in thil borhhlawh le thil sual an tuah. An thlun dingmi thu ka pekmi pawl ihsin an pial ih anmah ih hrangah milem an tuah zo a si,’ a ti.

13“Cun Bawipa in ka hnenah, ‘Milungruh pawl hrimhrim an si, tihi ka thei zo. 14Curuangah i kham duh hlah. Ka siatsuah thluh hai ding ih leilung par ihsin an hmin cu ka phiathlo ṭheh ding. Cule annih hnakin lian deuh le cak deuh miphun pakhat nangmah ih sung ihsin ka suahter ding a si,’ i ti. 15“Cuticun thukam ngannak lungpheng pahnih keng phah in tlangpar ihsin ka ṭum. Cule tlangpar cun meisa alhhlio cu a suak zukzo. 16Cuih caan rei lote sungah Bawipa nan Pathian ih thupekmi cu nan bal ih nan suingun titter tahrat in cawcang lem nanmah ih hrangah nan tuah ih Bawipa ih parah nan sual ngaingai, ti cu ka mit rori in ka hmu. 17Curuangah nan hmaika ah lungpheng pahnih cu ka deng ih sopṭheh koin ka khuai a si. 18Cuih hnuah Bawipa ih hmaika ahcun ni sawmli le zan sawmli sung leilungah ka bok sal; Bawipa ih parih nan sual ruangah le a thin nan hengter ruangah cuticun ka um ih rawl khal ka ei lo, tidai khal ka in lo. 19Nanmah siatsuah thluh tlak in a thin a heng ruangah Bawipa ih thinhennak cu ka ṭihzet a si; asinain cuih ṭum khalah Bawipa in ka thu cu i theih sak. 20Cuih tlunah Bawipa cu Aaron parah thah duh khop tiangin a thin a heng fawn; curuangah Aaron hrang khalah ka dil ciamco. 21Cule nan sual mualphonak, nan thilri in nan tuahmi cawcang lem cu ka lak ih meisa sungah ka pa ih. Ka khuai ṭheh. Ka rialdip ṭheh hnuah a vut cu tlangpar ihsin a rung luangmi tivate ah ka hlon.

22“Bawipa nan Pathian cu Taberah, Massah le Kibroth Hattaavah ih nan um lai tla-ah a thin nan hengter. 23Cule Kadesh Barnea nan um lai khalah a lo pek dingmi ramih va feh dingah le va luah dingah a lo thlah naón a thu nan el ih nan dodal thotho a si; Bawipa cu nan rinsan lo ih a thu khal nan thlun lo. 24Nanmah ka lo theihtir ihsin Bawipa dodaltu nan si ringring.

25“Cutiih nanmah siatsuah thluh a tum ruangah cun Bawipa ih hmaiah ni sawmli le zan sawmli sung ka bok. 26Cule thla ka cam ih, ‘Maw Bawipa Pathian, na baan thacak le na huham thawn Izipt ram ihsin na suahmi na minung pawl hi siatsuah hram hlah aw. 27Na salpa Abraham, Isaak le Jakob pawl vun ruat awla hi mi pawl ih lungruhnak, borhhlawhnak le sualnak pawl hi zianghman ah siar aw hlah. 28Cuti si loih na thah thluh hai a si ahcun, a thukam vekin a minung pawl cu Kanaan ramah a thlenpi thei lo a si, tiah Izipt mi pawl in an lo ti ding. A huat ruangah a suahpi ih nelrawn ah an zatein a that ṭheh a si tiah Izipt mi pawl in an lo ti ding. 29Ziangvek an va si khalle hi minung pawl cu nangmah ih miphun si dingah na hril zomi an si ih na baan phar in le na huham thawn Izipt ram ihsin na suahpi zomi an si,’ tiah ka ti.”

Currently Selected:

DAAN PEKSALNAK 9: FCL

Highlight

Copy

Compare