DAAN PEKSALNAK 8

Luah Dingmi Ram ṭha

1“Tuihsun ih ka lo pekmi thukham hmuahhmuah hi feltein nan thlun thluh pei. Cutiih nan thlun asile nan nung ding, nan karhzai ding ih nan pupa hnenah Bawipa ih a tiam ciami ram cu nan luah ding. 2Nelrawn ramṭhing ah kumpi kum sawmli sung Bawipa nan Pathian in a lo hruai ih a thupekmi pawl nan thlun tum maw tum lo tiin nan thinlung sungih thuruahmi pawl theih duh ah nan hnenih harsatnak a thlenterzia pawl kha ruat uh. 3Rilrawng in a lo ret. Cuih hnuah nanmah le nan pupa pawl in nan ei dah lomi manna sang nan ei dingah a lo pek. Hitiih a tuahnak cu rawl lawngin nunnak a si lo; Pathian hmurka in a suakmi thu in nunnak a si sawn, ti nan theihnak dingah a si. 4Nan vahvaihnak kum sawmli sungah nan hnipuan a ṭet lo ih nan ke khal a thling lo. 5Pa in a faate pawl nun a sim ṭheu bangtuk in Bawipa nan Pathian cun nun a lo sim ih hremnak tla nan tuar ṭheu kha hngilh hlah uh. 6Curuangah Bawipa ih thupekmi bangin nung uh; a thukham bangtuk in nung uhla amah cu ṭihzah uh. 7Bawipa nan Pathian in ram ṭha tiva le tikhur pawl an umnak, horkuam le tlangpar ihsin a putmi tiva le cirhti pawl an umnak, 8sangvut le barli sangvut, sabit, theipi, taleti, olif le khuaitizu pawl an suahnak ramah a lo thlenpi a si. 9Cutawk ramah cun rilrawng in nan um dah lo ding; hlawhsammi tla nan nei dah lo ding. Hi ramih lungto cun thir a suah ding ih tlang pawl ahcun dar an lai ding. 10Ei ding nan hiarmi hmuahhmuah nan nei ding ih a lo petu Bawipa nan Pathian cu nan thangṭhat ding.”

Bawipa Nan Hngilh Asile

11“Bawipa nan Pathian nan hngilh lonak dingah ralring uh; tuihsun ih ka lo pekmi a daan, a thupekmi le a thu pawl hmuahhmuah pakhat hman hrelh lotein thlun uh. 12Ei ding nan hiarmi hmuahhmuah nan ngah hnu, nan umnak dingah inn ṭhaṭha nan sak hnu, 13nan caw le nan tuu pawl, nan sui le nan ngun pawl le nan sumsaw hmuahhmuah an karhzai ih an tamzet tikah, 14puarthau tahrat in salih nan taannak Izipt ram sungin a lo suahtu Bawipa nan Pathian cu hngilh hlah uh. 15Kha tluk a kaumi le ṭihnungza nelrawn, tur a neimi rul le varngen meipir pawl umnak sungin amah in a lo hruai. Kha tluk a caarmi le tidai um lonak ramṭhingah lungpi sungin nan hrangah tidai a putter. 16Nelrawn ah nan pupa pawl ih an ei dah lomi manna sang cu nan ei dingah a lo pek. Nehhnu-ih nan ṭhatnak dingah harsatnak in a lo hniksak hai a si. 17Curuangah kanmah ih cahnak le thazaang in kan lian a si, tiah ziangtik hmanah ruat hlah uh. 18Nan lennak dingah cahnak huham a lo petu cu Bawipa nan Pathian a si kha thei ringring uh. Hitiih a tuahnak cu nan pupa hnenih thukamnak a tuahmi kha a kimter ruangah a si ih tuihsun khalah cuih thukamnak cu hngetter a duh a si. 19Khawzing dangdang biak duh ah le ren duh ah Bawipa nan Pathian cu hngilh hlah uh. Nan hngilh asile, tuihsun ah fiangtein ka lo sim: siatsuah thluh nan si tengteng ding. 20Bawipa ih thu nan thlun lo a si ahcun hmailam nan nor deuhdeuh tikah hi ramih miphun pawl a hlohralter thluh vekin nannih khal hlohralter nan si ve ding.

Currently Selected:

DAAN PEKSALNAK 8: FCL

Highlight

Copy

Compare