DAAN PEKSALNAK 6

A Thupi Mi Thukham

1“Bawipa nan Pathian in nanmah zirh dingih i fialmi a thu le a daan hmuahhmuah cu hihi an si. Nan luah dingmi ram nan thlen tikah hi daan pawl cu thlun uh. 2Cutawkih caan reipi nan um theinak dingah nanmah le nan tefa pawl in nan nunsung hmuahhmuah Bawipa nan Pathian cu nan ṭihzah pei ih ka lo pekmi amah ih daan pawl cu nan thlun pei. 3Maw Israel mi pawl, cuih thu cu nan ngai ih nan thlun a si ahcun nan lamzin a tluang ding ih kan pupa pawl ih Pathian, Bawipa ih in tiam vekin miphun lianzet ah nan cang ding ih cawhnawi le khuaitizu luannak ram nuam-ah cun nan um ding.

4“Maw Israel mi pawl, ṭhatein ngai uh! Bawipa Amah pakhat lawng hi kan Pathian a si. 5Bawipa nan Pathian cu nan thinlung zate, nan nunnak zate le nan thazaang zatein nan duhdawt pei. 6Tuihsun ih ka lo pekmi thukham pawl hi nan thinlung sungah caam ringring seh. 7Nan faate pawl zirh sin uh. Inn nan um tikah siseh, lengih nan feh tikah siseh, sim ringring uh. Nan colh tik le hna nan ṭuan tik khalah saal ringring uh. 8Nan baan ah ṭem uhla, a lo theitertu dingah nan cal ah ben uh. 9Nan inn sangka tlunah le nan kotka par khalah ngan uh.”

Moses In Ralrinnak A Pek

10“Bawipa kan Pathian in nanmah ih nan din lomi khawpi tum zetzet a umnak ram cu ka lo pe ding tiah nan pupa Abraham, Isaak le Jakob hnenah thu a kam. 11Cuih khawpi sungih inn pawl cu nanmah ih nan khawl lomi thil ṭhaṭha in a khat, nanmah ih nan laih lomi tikhur pawl a um ding ih nanmah ih nan tuah lomi sabit hmuan le Olif hmuan pawl an um ding. Bawipa in cuih ramih a lo thlenpi hai tikah le nan hiarmi hmuahhmuah khopzetih ei ding nan neih tikah, 12Sal nan taannak Izipt ram ihsin a lo suahtu Bawipa cu nan hngilh lonak dingah fimkhur zetin nan nung pei. 13Bawipa nan Pathian lawnglawng nan ṭihzah pei. Amah lawng nan rian pei ih amah ih hmin lawngin thukamnak nan tuah pei. 14Nan kiangkapih a ummi miphun pawl ih khawzing pawl nan biak lo pei. 15Nan biak asile Bawipa ih thinhennak nan parah meisa bangin a thleng ding ih a lo cimitter hai ding; ziangahtile Bawipa nan Pathian, nan hnenih a ummi cu thiik neimi Pathian a si.

16“Bawipa nan Pathian cu, Massah ih nan rak hniksak zo bangtuk cun hniksak nawn hlah uh. 17A lo pekmi thukham hmuahhmuah cu feltein thlun uh. 18Bawipa ih hmaika ah a dikmi le a ṭhami tuah uhla nan lam a tluang ding. Cuticun ram ṭha cu nan pupa hnenih Bawipa ih thukamnak bangin nan luah ding ih, 19a lo tiam bangin nan ral pawl nan dawisuak ding.

20“Hmailam tikcu caanah nan faale pawl in, “Zianghrangah Bawipa kan Pathian in hi thukham pawl hi thlun dingah a lo fial?’ tiih thu an lo sut tikah, 21an hnenah, ‘Izipt siangpahrang kuthnuai ah sal taangmi kan rak si ih Bawipa in a baan thacak in in runsuak. 22Mangbangza thil tampi le rapthlakza thil tampi cu Izipt mi parah le an Faro siangpahrang le a kuthnuai ih bawi pawl parah a thlentermi kha kan mit rori in kan hmu a si. 23Izipt ram ihsin in luatter ih kan pupa pawl hnenih thu a kam bangin hi ram luah dingah in fehpi. 24Curuangah Bawipa kan Pathian in hi thukham pawl le daan pawl cu thlun dingah le amah ṭihzah dingah in fial a si. Cutiih kan tuah asile kannih cu in kilkhawi ding ih in ṭhangsoter ding. 25Amah ih thupekmi hmuahhmuah felteih kan thlun thei a si ahcun Pathian cu kan parah a lung a awizet ding,’ tiah nan ti pei,” a ti.

Currently Selected:

DAAN PEKSALNAK 6: FCL

Highlight

Copy

Compare