DAAN PEKSALNAK 30

Dinsuah Salnak Le Thlawsuahnak

1“Nan hril dingah thil pahnih - thlawsuahnak le siatserhnak ka lo pek. Himi pawl nan parih an thlen tikah le Bawipa nan Pathian in a lo ṭhekdarhnak ramih nan um tikah hi ka lo simmi hi nan thei sal leh ding. 2Cule nanmah le nan tefa pawl cu Bawipa ih hnenah nan kir ding ih nan thinlung le nan nunnak zatein tuih sunih ka lo pekmi Bawipa ih thukham pawl cu nan thlun ding. 3Cutik lawngah Bawipa cun nan parah zaangfahnak a nei ding. A lo ṭhekdarhnak ram ihsin a lo kirter sal ding ih neinung zetin nan um sal ding. 4Leilung tlun a kil le a dengih ṭhekdarhmi nan si khalle Bawipa nan Pathian in a lo finkhawm sal ding ih, 5nan pu le nan pa pawl an rak umnak ramah cun nan um sal ding. Cule nan pu le nan pa pawl hnakin nan lian deuh ding ih nan tam deuh fawn ding.

6Nan thinlung zate le nan nunnak zatein nan duhdawt theinak dingah le nan nun theinak dingah Bawipa nan Pathian in nanmah le nan tefa pawl ih thinlung cu serhtannak a tuah ding ih amah ih thu ngai duhnak thinlung a lo pe ding. 7Hi camsiatnak pawl cu nanmah a lo huatu le a lo hremtu nan ral pawl ih parah Bawipa in a thlenter thluh ding ih, 8tuih sunih ka lo pekmi a daan le a thupekmi pawl cu nan ngai ding ih nan thlun sal ding a si. 9Nan ṭuannak kipah Bawipa in hlawhtlinnak a lo pe ding ih tefa le ṭilva tampi nan nei ding ih nan lo in rawl tampi a suah ding. Nan pu le nan pa pawl neinung zetih a tuah hai tikah khan a lung a awi bangtuk in nannih pawl neinung zetih tuah ding khalah a lung a awizet ding. 10Asinain a thuzirhmi pawl ngannak hi cabu sungih ummi a daan hmuahhmuah cu nan thlun ih a thu nan ngai a ṭul a si. Nan thinlung le nan nunnak cu a zatein amah ih hnenah pe uh.

11“Tuih sunih ka lo pekmi daan hi a har tukmi a si lo; nan thlun thei lo dingmi khal a si lo. 12A sang tukih van a dai ti khal a si lo. ‘Kan hna in kan thei ih kan thlun theinak dingah zoso a hung kai ding ih kan hrangah a run ṭhum ding?’ nan ti ding a um lo. 13Tipithuanthum ralih a ummi khal a si lo. ‘Kan hna in kan thei ih kan thlun theinak ding zoso tipithuanthum ralah feh tahrat in kan hrangah a rak keng ding?’ nan ti ding a um lo. 14A naite ah a um: nan kaa sung le nan thinlung sungah a um. Nan thlun ding lawng hi a sam a si.

15“Tuih sunah a ṭha le a sia, nunnak le thihnak hril dingin nan hnenah ka lo pek a si. 16Bawipa nan Pathian ih thukham, tuih sunih ka lo pekmi hi nan thlun ih amah nan duhdawt, a thu nan ngai ih a daan nan tuah a si ahcun nan ṭhangso ding ih miphun tumzet ah nan cang ding. Bawipa nan Pathian in nan luah dingmi ramah hin mal a lo sawm hai ding. 17Sikhalsehla a thu nan ngai lo ih nan thinlung hmundang hoi in khawzing dangdang tla nan biak a si ahcun, 18tuih sunah hin feltein ka lo sim: nan cimit thluh ding a si. Nan luah dingmi ram Jordan Tiva ralah khin caan sau nan nung lo ding. 19Atu-ah nan hril dingah nunnak le thihnak, a si lole Pathian thlawsuahnak le camsiatnak ka lo pek ih nan hrilmi theihpitu-ah lei le van ka ko a si. Nunnak hril uh. Cuticun nanmah le nan tesinfa pawl nan nung ding. 20Bawipa nan Pathian cu duhdaw uhla a thu ngai in amah cu pomhnget uh. Pathian cu nan nunnak a si ih nan pupa Abraham, Isaak le Jakob hnenih a kam ciami ramah kum reipi nanmah le nan tefa pawl nunkhawsau-ih nan um ding,” tiah a ti.

Currently Selected:

DAAN PEKSALNAK 30: FCL

Highlight

Copy

Compare