DAAN PEKSALNAK 11

Bawipa Ih Cahnak

1“Bawipa nan Pathian cu duhdaw uhla amah ih thukham, a daan le a thupekmi pawl hmuahhmuah cu thlun uh. 2Cule ziangbangtuk Pathian a si ti cu nan nunnak in a tep zo ih cumi cu tuihsun ah ciing ṭha uh. Cutiih a teptu cu nan faale pawl an si lo, nanmah nan si. Bawipa ih maksaknak, a baan thacahnak le a huham pawl cu nan hmu thluh zo ih, 3mangbangza a tuahmi pawl le Izipt siangpahrang le a ram pumpi parih a tuahmi thil pawl tla nan hmu zo. 4Izipt ralkap pawl in an lo dawi tikah Bawipa in an rang le an rangleng pawl thawn Tipi Sen sungah a pilter thluh ih an hloral ṭheh ti cu nan hmu. 5Hitawk nan thlen hlanah Bawipa in nelrawn ah nan hrangah ziangvek thil a tuah ti tla nan hmu. 6Reuben hrin Eliab fapa Dathan le Abiram parah Bawipa in ziangtin a tuah ti tla vun ruat uh. An hnuai leilung cu a kak ih an sungza le an puanthlam pawl, an hnen-um pawl le an ṭilva pawl thawn a dolh thluh hai a si. 7A si, Bawipa ih tuahmi thil makzetzet a hmutu cu nanmah nan si.”

Tiamkammi Ram Ih Thlawsuahnak

8“Tuihsun ih ka lo pekmi thukham hmuahhmuah hi nan thlun thluh pei. Cutik lawngah nan luh tummi ramah cun luh theinak thazaang nan nei ding ih nan luah thei ding. 9Cule Bawipa in nan pipu pawl le an tesinfa pawl hnenah pek dingih a tiammi ram - cawhnawi le khuaitizu a luannak ram ahcun reipi nan nung ding. 10Atuih nan luah dingmi ram cu a hlanih nan rak umnak Izipt ram vek a si lo. Khatawkah cun thlaici nan tuh ih, hanghnah hangrah hmuan sung bangin, nan ke in tihriat cu harsa zetin nan ṭuan; 11asinain atuih nan luah dingmi ram cu tlang le horkuam umnak a si ih vanruah ṭhazet ih a dongmi ram a si. 12Bawipa nan Pathian in hi ram cu, kum a thok ihsin a net tiang, ṭhatein a zoh a si.

13“Curuangah tuihsun ih ka lo pekmi thukham hmuahhmuah hi thlun uh; cuih thukham cu, Bawipa nan Pathian cu nan thin le nan lung zatein duhdaw uhla amah ih hna cu ṭuan uh, tihi a si. 14Cutiih nan tuah asile, Bawipa in nan ramih a ṭulmi fur ruah le ṭhal ruah cu a tikcu caanah a surter ding ih rawl le sabitti le olif siti nan paṭha ding ih, 15nan ṭilva hrangah hrampi tla a um ding. Cuticun nan pum a puar ding. 16Bawipa hnen ihsin pial tahrat in khawzing dangdangih thlemnak ah zohman in lo hruaisual hlah seh. 17Cutiih zinpeng nan zawh asile Bawipa cu nan parah a thin a heng tengteng ding; van ruahti a kangter ding ih nan leilung in rawl a suah lo ding. Cuticun Bawipa ih a lo pek dingmi ram ṭha ihsin nan hloral mai ding a si.

18“Hi ka thupekmi pawl cu nan thin le nan lung sungah khum uh. Nan baan ah ṭem uhla a lo ṭhangphawktu dingah nan cal ah ben uh. 19Nan faate pawl hnenah zirh uh. Inn ih nan um ah siseh, khawlengih nan suah ah siseh, sim uh; nan zaunak le nan cangvaihnak khalah sim uh. 20Nan inn sangka tlunah le nan kotka parah ngan uh. 21Cutiih nan tuah ahcun Bawipa nan Pathian in nan pu le nan pa hnenah pek dingih a tiamkammi ram sungah nanmah le nan faate pawl cu reipi nan nung ding. Lei le van a um sungah cun cutawk ram ah nan um ringring ding.

22“Ka thupekmi hmuahhmuah hi felzet in thlun uh; Bawipa nan Pathian cu duhdaw uh, a lamzin sungah feltein feh uhla amah cu hngette in pom uh. 23Cuticun hmailamih nan nor tikah hi miphun pawl cu amah in a dawisuak ding ih nannih hnakin a tum deuh le a cak deuhmi pawl ih ram cu nan luah thei ding. 24Nan ke in nan palmi leiram hmuahhmuah cu nan ta an si ṭheh ding. Nan ram cu thlanglam ah nelrawn ihsin saklam ah Lebanon Tlang tiang, nisuahnak lamah Eufrates tiva in nitlaknak lamah Mediterranean tifinriat tiang a si ding. 25Zohman in an lo kham thei lo ding. Khi ramih nan fehnak kipah, a lo tiamkam zo bangtuk in, Bawipa nan Pathian ih thil titheinak ruangah mi hmuahhmuah in an lo ṭih ding a si.

26“Ngaihnik uh! Tuihsun ah nan hril dingah thlawsuahnak le siatcamnak nan hmaiah ka ret a si. 27Bawipa nan Pathian ih thukham, tuihsun ih ka lo pekmi hi nan thlun ahcun thlawsuahnak nan dong ding. 28Sikhalsehla hi thukham pawl nan thlun lo ih nan theih dah lomi khawzing dangdang hnenah biak dingih nan feh a si ahcun siatcamnak nan tong ding. 29Nan luah dingmi ramah Bawipa in a lo thlenpi hai tikah Gerizim Tlangin thlawsuahnak nan aupi ding ih Ebal Tlangin siatserhnak nan than ding. 30Hi tlang pahnih cu Jordan tiva kuamih a ummi, Kanaan mi pawl umnak Jordan tiva in nitlaknak lamah an um. Nitlaknak lam deuhah an um ih Gilgal khua kiang Moreh sasua thing kiangah an um. 31Bawipa nan Pathian in a lo pekmi ram luah dingah Jordan tiva cu nan tan thlang ding. Ram cu nan lak ih nan luah tikah, 32tuihsun ih ka lo pekmi daan pawl hi felfai tein nan thlun pei.”

Currently Selected:

DAAN PEKSALNAK 11: FCL

Highlight

Copy

Compare