2 SIANGPAHRANG 25

Jerusalem An Lak

(2 San. 36.13-21; Jer. 52.3b-11)

1Babilon siangpahrang Nebuchadnezzar cu a kuthnuai ih ummi Judah siangpahrang Zedekiah in a do. Curuangah Nebuchadnezzar cu a ralkap pawl thawn a ra ih Zedekiah in Judah ram a uk kum kua-nak, thla hra-nak ih ni hra ni ah Jerusalem cu a do. Jerusalem khua an kulh#Jerusalem khua an kulh hi January thla, 587 BC ah a si ih thla hleiriat sung an kulh. ih a leng kimvel in phardawl lan theinak ah leilung an khahsilh ih cutiin ṭanhmun an khuar. 2Cuticun Zedekiah in ram a uk kum hleikhatnak tiang an kulh. 3Cule cuih kum, thla linak ih ni kua ni ah, khawsung mi pawl cu zianghman ei ding an neih nawn lo tikah, 4khawpi kulhnak hruang cu an bauh#Khawpi kulhnak hruang an bauh hi July thla, 586 BC ah a si. ih Babilon ralkap pawl cun an kil ṭhepṭhep naón zanah Zedekiah le a ralkap pawl cu an suak thluh. Siangpahrang hmuan ih lamzin zawh in phar pahnih karlak kot in an suak ih Jordan Phairawn lamah an tlan. 5Asinain Babilon ralkap pawl in siangpahrang Zedekiah cu an duum ih Jerikho khua kiangih hmunrawn ah an man ih an kai; a ralkap pawl cun an tlansan thluh. 6Zedekiah cu Babilon ralkap pawl in an hruai ih Riblah khua ih siangpahrang Nebuchadnezzar a rak um laiah a hnenah an thlenpi. Cutawkah Nebuchadnezzar in a thu a ṭhen. 7Zedekiah mithmuh hngan rori ah a fapa pahnih cu an that; cule Zedekiah ih mit cu a pahnih in an phorh ih dar cikcin in an khih hnuah Babilon khua ah an hruai.

Bawipa Ih Biakinn An Siatsuah

(Jer. 52.12-33)

8Siangpahrang Nebuchadnezzar in Babilon ram a uk kum hleikuanak, thla nganak ih ni sarih ni ah siangpahrang ralkap pawl hotu le siangpahrang ruahnak petu a si mi Nebuzaradan cu Jerusalem khawsung ah a lut. 9Bawipa ih Biakinn, siangpahrang inn le Jerusalem ih bawi le upa deuhdeuh pawl ih inn pawl a ur ṭheh.#25.9 Jerusalem Biakinn, siangpahrang inn … an ur hi August thla, 586 BC ah a si. 10Cule a ralkap pawl in khawpi ralhruang cu an bal ṭheh. 11Cun Nebuzaradan in Jerusalem ih a taangmi senpi pawl, zungthiam pawl le Babilon mi hnenih a rak ṭangtu pawl cu Babilon ah a hruai ṭheh. 12Judah ram sungih a taantami pawl cu thilri zianghman a nei lomi farah bik pawl an si ih cupawl cu sabit hmuan le lo sungah hna a ṭuanter.

13Babilon ralkap pawl cun Bawipa ih Biakinn sungih a ummi dar ih tuahmi ṭhuam pawl le ṭhuam dinnak pawl cu an khiak an khuai ṭheh. Dar ih tuahmi tidai retnak maihum tumpi cu an khuai ṭheh ih dar pawl cu Babilon ah an phur ṭheh. 14Cawhleek pawl, biakṭheng ih vutcam lawhnak kheng pawl, mei-inn kilkhawinak ih hmanmi thilri pawl, thawinak ih pekmi ṭilva ih thisen donnak maihum pawl le rimhmui urnak kheng pawl le Biakinn sungih hmanmi dar ih tuahmi thilri dangdang pawl tla an lak ṭheh. 15Cuih tlunah sui le ngun ih tuahmi thilri hmuahhmuah, maihum fatete pawl le meivam kennak kheng pawl tla an lak. 16Bawipa ih Biakinn hrangih Solomon in dar ih a tuahmi ṭhuam pahnih, ṭhuam dinnak pawl le tidai retnak maihum tumpi pawl cu an tum zetzet ih a cuai khai thei ding pawl an si lo. 17Ṭhuam pahnih cu an tia-aw ih pi kul hluan sarih an sang ih ṭhuam pakhat ih lubo cu pi li le a hrek a sang. Cuih ṭhuam lubo kimvel cu dar in an tuah ih taleti zuk cuangin an mawiter.

Judah Mi Pawl Babilon An Thleng

(Jer. 52.24-27)

18Cun ralkap hotu ralbawipa Nebuzaradan cun Puithiam Sang Seraiah, a sangtu puithiam Zefaniah le a dang Biakinn upa bikbik pathum pawl a kai ih a hruai. 19Cuih tlunah khawpi sungih ralkap hotu ralbawipa, siangpahrang ruahnak petu panga, ralkap lamih cazin kaitu, ralkap hotu bawipa bawmtu le a dangdang mi upa sawmruk pawl tla a kai. 20Cupawl cu Babilon siangpahrang, Hammath ram Riblah khua ih a um laiah, 21Nebuzaradan in a fehpi ih siangpahrang ih thupek vekin cutawkah an hrem ih an that ṭheh.

Cuticun Judah mi pawl cu an ram ihsin an thawng tlaknak ramah an hruai hai a si.

Judah Ram Uktu Bawi Gedaliah

(Jer. 40.7-9; 41.1-3)

22Babilon siangpahrang Nebuchadnezzar in Ahikam fapa, Shafan ih tupa, Gedaliah cu Babilon ramih thawng thlak lomi, Judah ramih a taangmi pawl hotu ah Judah ram uktu bawi ah a tuah. 23Cumi cu siangpahrang Nebuchadnezzar kuthnuai ih a lut lomi Judah ralbawi pawl le ralkap pawl in an theih tikah Gedaliah hnenah Mizpah khua ah an ra. Cuih ralbawi pawl cu Nethaniah fapa Ishmael, Kareah fapa Johanan, Netofah khuami Tanhumeth ih fapa Seraiah le Maakath mi Jezaniah an si. 24Cule Gedaliah in anmah le an ralkap pawl hnenah cun, “Thungai in ka lo sim: Babilon bawi pawl ṭih ding zianghman a um lo. Judah ramah hin um uhla Babilon siangpahrang hna cu ṭuan uh. Cuticun ziang hmuahhmuah a rem ko ding,” tiah a ti.

25Asinain cuih kum, thla sarih thla ah Nethaniah fapa, Elishama ih tupa, Judah siangpahrang ih sungkhat a si mi Ishmael cu ralkap pahra thawn Mizpah ah an feh ih Gedaliah cu an that. Gedaliah hnenih a ummi Israel mi le Babilon mi pawl tla an that ṭheh. 26Cule Israel misenpi pawl cu a lian siseh a farah siseh, ralbawi pawl thawn Babilon mi an ṭih ruangah an suak ih Izipt ramah an tlan.

Jehoiakhin Thawng In A Suak

(Jer. 52.31-34)

27Evilmerodak#Evilmerocak in Babilon a uk kum cu 562 in 560 BC tiang hrawng a si. cu Babilon ram siangpahrang a cang ih a can kum rori ah Judah siangpahrang Jehoiakhin cu a zaangfah ih thawng ihsin a suah. A suah ni cu Jehoiakhin thawng a tlaknak kum sawmthum le kum sarihnak, thla hleihnih thla ih ni kul hluan sarih ni ah a si. 28Evilmerodak in Jehoiakhin cu ṭhazet in a zoh ih amah thawn Babilon ramih thawng an thlakmi siangpahrang dangdang hnakin upatnak a pek cuang a si. 29Jehoiakhin cu a thawngtla hnipuan a thlengter ṭheh ih a nunsung hmuahhmuah ah Babilon siangpahrang thawn rawl an ei tlang. 30A dam sung cu nitinte in a ṭulmi leinak ah paisa tla a pek ringring.

Currently Selected:

2 SIANGPAHRANG 25: FCL

Highlight

Copy

Compare