2 SIANGPAHRANG 24

Ral Pawl In Judah An Neh

1Jehoiakim Judah siangpahrang a si laiah Babilon siangpahrang Nebuchadnezzar in Judah ram cu a do ih kum thum sung Nebuchadnezzar kuthnuai ah a um. Cuih hnuah ral a tho. 2Asinain Bawipa in Babilon mi, Siria mi, Moab mi le Ammon mi pawl cu Jehoiakim do dingah le Judah ram siatsuah dingah a thlah. Himi cu Bawipa in a hnaṭuantu profet pawl hnen in a rak sim ciami a kimternak dingah a si. 3-4Siangpahrang Manasseh sualnak hmuahhmuah ruangah le, a bik in, sualnak nei lomi pawl ih thisen tamtuk a luanter ruangah Bawipa in Judah mi pawl cu a mithmuh lonak ramih dawihlo ṭheh a tum ruangah hi thil pawl cu Amah ih thupeknak in a cangmi an si. Bawipa in Manasseh cu a ngaithiam thei lo.

5Jehoiakim ih hnaṭuanmi dangdang cu Judah Siangpahrang Thuanthu Cabu sungah an ngan a si. 6Jehoiakim cu a thi ih a fapa Jehoiakhin in a ai-ah siangpahrang a run ṭuan.

7Izipt siangpahrang le a ralkap pawl cu an ram ihsin ram dangah voikhat hman an fehsal thei nawn lo; ziangahtile Izipt ih rak ukmi ram tampi Babilon siangpahrang in a lak ṭheh ih Eufrates Tiva ihsin Izipt Tiva tiang a uk ṭheh a si.

Judah Siangpahrang Jehoiakhin

(2 San. 36.9-10)

8Jehoiakhin cu kum hleiriat a ti ah Judah siangpahrang a ṭuan ih Jerusalem ihsin thla thum sung a uk. A nu cu Jerusalem khuami Elnathan ih fanu Nehusta a si. 9Jehoiakhin cu a pa ih ziaza a thlun ruangah Bawipa ih parah a sual a si.

10Jehoiakhin Judah siangpahrang a si laiah Babilon ralkap pawl Nebuchadnezzar ih ralbawi pawl ho in Judah ram ah an rung ih Jerusalem khawpi an kulh. 11An kulh sungah cun Nebuchadnezzar amah rori Jerusalem ah a ra ih, 12siangpahrang Jehoiakhin cun a nu, amah a riantu hnen-um pawl, a kuthnuai bawi pawl le siangpahrang ralkap hotu bawi pawl thawn Nebuchadnezzar hnenah a feh ih a kuthnuai ah a lut. Nebuchadnezzar in Babilon ram a uknak kum riat kumah Jehoiakhin#Jehoiakhin a kaih hi March thla, 597 BC ah a si. cu a kaih ih, 13Bawipa ih Biakinn le siangpahrang inn ih a ummi sui le ngun pawl cu Babilon ah a phur ṭheh. Bawipa ih a rak sim cia vekin Nebuchadnezzar in Bawipa ih Biakinn ih hman dingah Solomon in sui ih a tuahmi thilri pawl a khuai ṭheh. 14Jerusalem khawsungmi, siangpahrang sungkhat le hotu pawl hmuahhmuah, an zate in thawnghra, Babilon ah Nebuchadnezzar in salah a hruai. Zungthiam pawl le sodeng pawl tiangin a hruai ṭheh ih Judah ramah cun mifarah bik pawl lawng a taan a si.

15Cun Nebuchadnezzar in siangpahrang Jehoiakhin cu a nu le a nupi pawl, a kuthnuai bawi pawl le Judah ram hotu pawl thawn Babilon ah salah a hruai. 16Micak le mi thupi pawl, ralkap ṭuan theitu le raldo dingah a tiar-aw cia pawl thawng sarih, le zungthiam pawl le sodeng pawl minung thawng khat, Babilon ah a hruai.

17Nebuchadnezzar in Jehoiakhin ih paseu, Mattaniah cu Judah siangpahrang ah a tuah ih a hmin cu Zedekiah ah a thleng.

Judah Siangpahrang Zedekiah

(2 San. 36.11-12; Jer. 52.1-3a)

18Zedekiah cu kum kul hluan khat a ti ah Judah siangpahrang a ṭuan ih Jerusalem ihsin kum hleikhat a uk. A nu cu Libnah khuami Jeremiah ih fanu Hamutal a si. 19Siangpahrang Jehoiakim ih sualnak tuahmi cu siangpahrang Zedekiah khal in a tuah ih Bawipa ih parah misual a si. 20Jerusalem le Judah mi parah Bawipa cu a thin a heng ngaingai ih a mithmuh lonak ramah a dawihlo hai.

Currently Selected:

2 SIANGPAHRANG 24: FCL

Highlight

Copy

Compare